بلوچستان نا ضلع قلات نا علاقہ منگچر ٹی بجلی نا بیدس پڑو و مرغن ہننگ نا برخلاف برانزی وڑ ئٹ کراچی کوئٹہ بھلا روڈ بند کننگانے، ہرانا سوب آن ہزار آ مسافر و مال دروک گاڑیک گٹ مسونو و کسر نا ہڑتوما پارہ آتیان گاڑیک مرغنو لیک اسیٹ سلوک ءُ ۔
برانز کروک آک پاریر بجلی نا بیدس پڑو ہننگ آن کشت کشار آک بھس مسونو بیست و چار گھنٹہ ٹی بیرہ ارا گھنٹہ بجلی تننگ اُست ہسونی نا ہیت ئسے۔
او پاریر کہ کیسکو نا بے دادی ننے شل کرو تخو، ارا گھٹنہ بجلی تننگ نا سوب آن کشت و کشار آتے دیر تننگ بھاز مر ئنا ہیت ئسے موبائل آک ہم چارج مننگ کپسہ، زمیندار تپہ کیسکو نا بے دادی نا سوب آن لڈ و ہنپ کننگ آ بیوس مننگ ءِ۔
اوفتا پین پاننگ اس کہ بجلی آن مروک کاریم تا سوب آن ارائی و کاروباری بندغ آک ہم بجلی نا بیدس پڑو ہننگ کن سختی تا گواچی مننگ ءُ اگہ کیسکو بجلی ءِ بحال کتو گڑا تیوہ تپہ آتیان تعلق تخوک بندغ آک واپڈا نا برخلاف بش مرور و دانا تیو ذمہ واری کیسکو آ خلینگو۔