اشتماعی سزا نا لڑ، زوراکی ئٹ بیگواہ زہری خاہوت – ٹی بی پی تیدری

الّمی خوانبو

رخصت اف – مرید بلوچ

مزاحمت زند ءِ ’’ای، ہمو ہراکہ جہانی امن ئنا ٹیکی ءِ دوئی کرینٹ، مونجائی تون انداسرپد مریوہ کہ بیدس تشدد...

بلوچ سلہہ بند تنظیم تا کروکا گڑاس فیصلہ تا جاچ __میرین بلوچ

جنگ اٹ ہچبر رحم مفک بلکہ جنگ ءِ نفسیاتی پڑا کٹوئی مریک جسمانی طاغت آن زیات نفسیاتی طاغت جنگ...

تاریخ نا پنہ غاک (چارمیکو بشخ) | خان خدائیداد خان – محبوب شاہ

تاریخ نا پنہ غاک (چارمیکو بشخ) خان خدائیداد خان نوشت: محبوب شاہ دی بلوچستان پوسٹ - براہوئی کالم 1896ء اٹی(No.7) و 1870ء...

اشتماعی سزا نا لڑ، زوراکی ئٹ بیگواہ زہری خاہوت

ٹی بی پی تیدری

نوشت: آصف بلوچ

مُسہ فروری نا نن بلوچستان نا بنجائی شار کوئٹہ آن پاکستانی لشکر و سادہ پُچ بینوک کارندہ آک نن نیمہ آ سریاب نا علاقہ گیشکوری ٹاون ٹی اسہ اُرا ئسے آ چھاپہ خلیسہ نیاڑی و چُناتون اوار پنچ بندغ ءِ زوراکی ئٹ بیگواہ کریر ۔

زوراکی ئٹ بیگواہ کروک آتیٹ پیرو نیاڑی ئس، اِرا چُنک سن چُنا و رحیم زہری و اونا زائیفہ رشیدہ زہری اوار ئسُر، خن خنوک بندغ آک و اونا ہمسایہ آتا ردئٹ فوجی و سادہ پُچ بینوک کارندہ آک ہرا دہ آن پانزدہ اُلاخ تیٹ سوار ئسُر، اُراٹی پُترینگیسہ پِن کروک نیاڑی و چُناتے دزگیر کریسہ نا درست ہند آ دریر ۔

زوراکی ئٹ بیگواہی تا گواچی پیرانگا نیاڑی (رحیم زہری نا لمہ) و چُناتے منَہ دے مالو آجو کننگا اندن رحیم زہری و اونا زائیفہ رشیدہ دائسکان (نوشت نا وخت اسکان) زوراکی ئٹ بیگواہ ءُ۔

بلوچ نیاڑی تا زوراکی ئٹ بیگواہی تا برخلاف راج دوست و بندغی حق آتا تنظیم آتا پارہ غان زیات ڈُکھ و سوختئی نا درشان مریسہ ءِ، ہیومن رائٹس کمیشن پاکستان تدینی نا تُرند مذمت کریسہ اوتا زُوت ئٹ آجو کننگ نا خواست کرینے و راج دوست حلقہ آتا پارہ غان تُربَت، حب و کوئٹہ تون اوار بلوچستان نا جتاء شار تیٹ برانز مننگ ءِ۔

زہری خاہوت تون اوار ریاستی بے دادی

زہری خاہوت آ ریاستی بے دادی نا دا اولیکو تدینی اف داکان مالو ہم اندا خاہوت آن تعلق تخوک منَہ بندغ زوراکی ئٹ بیگواہی تا گواچی ءُ، دروغ پولیس مونتس ٹی خلنگوک و زوراکی ئٹ بیگواہی تیان گُڈ اوتا جشوک جوْن آتے گیاوان آتیٹ بٹینو۔

21 جون 2021 آ پاکستانی فورسز کارندہ آک خضدار نا علاقہ علی اسپتال نا مونا اندا زہری خاہوت آن تعلق تخوک تابش وسیم و لیاقت پِنی اِرا ورنا ءِ دزگیر کننگ آن گُڈ بیگواہ کریر و اوکان گُڈ ہفتدہ تُو اسکان زوراکی ئٹ بیگواہی آن گُڈ بلوچستان نا علاقہ خاران ٹی سی ٹی ڈی نا اسہ دروغ مونتس ٹی گیشتر چار بندغ تون اوار تابش وسیم ءِ کسیفسہ جوْن ءِ بٹیر، لیاقت دائسکان بیگواہ ءِ۔

تابش وسیم و لیاقت بلوچ ءِ ہمو وخت دزگیر کننگاسس ہرا وخت تابش وسیم و لیاقت، وسیم نا باوہ نا خیالداری کن اسپتال ٹی ساڑی ئسُر، تابش وسیم نا باوہ آ زہری بازار ٹی نادرست سلاء بند بندغاک سُم کاری کریسہ ٹپی کریسُر، اندن سُم کاری کروک آتا باروٹ پاننگک کہ اوفتا تعلق ہم ریاستی مُخ تف آ سلاء بند ٹولی آن ئس۔

زہری خاہوت آن تعلق تخوک اسہ پین ورنا ظہور احمد نا جشوک جوْن 2017 اپریل 11 آ خضدار نا علاقہ زہری گذان آن خننگاسس، ہرادے کسفنگ آن دوانزدہ دے مالو پاکستانی فورسز کارندہ آک خضدار آن دزگیر کریسُر و دوانزدہ دے آن گُڈ اونا جشوک جون دوئی کننگا ۔

داڑان بیدس زہری خاہوت آن تعلق تخوک ورنا زکریا ءِ ہم دزگیر کننگاسس ہرا دائسکان بیگواہ ءِ۔ داسا رحیم و اونا زائیفہ رشیدہ ءِ دزگیر کننگ آن گُڈ تینتون تخانو ۔

بلوچستان ٹی نیاڑی تا زوراکی ئٹ بیگواہی نا تدینیک

بلوچستان ٹی دا اولیکو تدینی اف ہراڑے نیاڑی و چُناتے زوراکی ئٹ بیگواہی تا تدینی رپورٹ مسنے، داکان مالو نیاڑی و چُناتا زوراکی ئٹ بیگواہی تا تدینیک رپورٹ مریسہ ءُ۔

نیاڑی تا زوراکی نا بیگواہی تیٹ پاش مروک پِن بلوچ نیاڑی تیان زرینہ مری نا ءِ، ہرانا باروٹ پاننگ ءُ او اسہ اسکول ٹیچر ئس ئسک ہرا تدوکا اسہ دہائی سے آن زیات سال آن بیگواہ ءِ، پاکستان نا پِنی آ صحافی حامد میر اسہ وار پاش کریسہ مائیکرو بلاکنگ نا ویب سائیٹ ٹوئیٹر آ نوشت کریسس کہ زرینہ مری ءِ اِرا ہزار ہفت ٹی کوہلو آن بیگواہ کننگ آن گُڈ کراچی آن دزگیری بنجا ئٹ تخنگا ۔

داکان بیدس بلوچستان آن وخت وخت ئٹ نیاڑی تا زوراکی ئٹ بیگواہی تا تدینیک رپورٹ مریسہ مسونو، تدوکا سال اگست نا تُو ٹی کوئٹہ آن خڑک ضلع بولان نا علاقہ اوچ کمان آن پاکستانی فورسز کارندہ آک کم و ود سینزدہ نیاڑی و چُناتے زوراکی ئٹ بیگواہی تا گواچی کریسہ بیگواہ کریر۔ ہراتا چاہنداری زرگل مری، حنیفہ مری، درخاتون مری، سمو سمالانی، زربخت سمالانی، بانی سمالانی، سمیدہ سمالانی، فریدہ سمالانی، راجی سمالانی، و چار سال آن بیگواہ رکھیہ سمالانی نا پِن آن ہم مسس ۔

داکان مالو بلوچستان نا علاقہ ڈیرہ بگٹی، آواران، پنجگور، کیچ و کراچی آن اسہ بلوچ شاعرہ ئسیتون اوار نیاڑی تا زوراکی ئٹ بیگواہی تا تدینیک رپورٹ مسونو، کراچی آن زوراکی ئٹ بیگواہی نا گواچی شاعرہ نا چاہنداری حبیبہ پیر جان نا پِن آن مسس اندن ضلع کیچ نا علاقہ ہوشاب آن زوراکی ئٹ بیگواہی نا گواچی نیاڑی نا چاہنداری نور جان نا پِن آن مسس، ہڑتومکا تدینی تا برخلاف تُرند اُلسی مزاحمت مونا بسس، ہراڑان سی پیک کسر ءِ اِرا جتاء ہند آتیٹ بند کریسہ کہی دے اسکان برانز کننگاسس، ہراڑن گُڈ ہڑتومکا نیاڑی تے مونا ہیسوسر ۔

تدوکا سال اسہ پین تدینی اس پنجگور نا علاقہ گچک نا ہند آ مس ہراڑے اسہ خاہوت آن تعلق تخوک اِرا نیاڑی و اسہ چُنک سَن چُنا تون اوار شش بندغ ءِ دزگیر کننگا۔ ہرافتیٹ روز شاہ بی بی، شہزادی و اونا پال کُنوک چُنا عبدالرحمٰن و عبد الحق اوار ئسُر۔

ہوشاب تدینی ٹی نیاڑی تا زوراکی ئٹ بیگواہی تا برخلاف ہراتم کوئٹہ گورنر ہاؤس نا مونا برانز کننگا گُڑا دا نیام ئٹ بلوچستان ہائی کورٹ ٹی نیاڑی تا دزگیری و زوراکی ئٹ بیگواہی تا خواست دائر کننگاسس ہرا زیر بننگسہ ئس اندا نیام ئٹ غُٹ بندغ آک آجو کننگار ۔

ضلع پنجگور آن خڑک ئنا علاقہ رخشان ئٹ اندا حالیت نا اسہ پین تدینی اس مونا بس، ہراڑے چار جون 2018 آ ناگ رخشان ئٹ فوج کمکی سامان تا ونڈ کننگ نا چم ئٹ زالبول تے زور ئٹ آرمی کیمپ آ دریسہ اوفتے بے دادی نا گواچی کریسس و اوفتا عصمت دری کریسس۔ بھلو وخت ئسے اسکان زالبول تے کیمپ ئٹ بند کننگاسس، ہراڑے اسہ زالبول اس جنسی زیاتی نا سوب آن نت کُبین ہم مسوسس و پدا اودے زور ئٹ چنا بٹفنگ آ بے وس کننگاسس۔

2018 ئٹ بلوچستان نا علاقہ مشکے آن ہم 22 جولائی آ پاکستانی لشکر اسہ اُرا ئسے آ چھاپہ خلیسہ اوکان مُسہ زالبول ءِ دزگیر کریسہ بیگواہ کریسس او برمتہ مروک آتیٹ اسہ 55 سالی زالبول اللہ بخش نا زائیفہ نور ملک و اونا اِرا ورنا ءُ مسڑ 22 سالی اسحاق نا زائیفہ حسینہ و 18 سالی اللہ بخش نا مسڑ ثمینہ اوار ئسر۔

داڑان مالو اندا اُرا غان تعلقداری تخوک نور ملک نا 10 سالی مار اللہ بخش نا مار ضمیر ءِ دزگیر کریسہ بیگواہ کریسس۔ داڑان مالو بلوچ آجوئی دوست راہشون ڈاکٹر اللہ نظر نا زائیفہ فضیلہ بلوچ ءِ اونا چار سالی مسڑ پوپل ءِ بلوچ لبریشن آرمی نا مسکوہی سروک اسلم بلوچ نا ہیڑ و اونا چار چنا، اسہ تاتہ مسڑ و اسہ ایلم نا مار اسیتون اوار پاکستانی ڈھکوک ادارہ غاک کوئٹہ نا علاقہ سریاب روڈ آن برمتہ کریسہ بیگواہ کریسر۔

داڑان مالو کوئٹہ ئٹی دسمبر 2019 ئٹ نصیر آباد آن کوئٹہ غا دارو درمان کن بروک زالبول و چنا تون اوار شش بندغ ءِ دزگیر کننگا، ہرافتا چاہنداری ہفت سالی حاجی علی دوست، علی بگٹی نا مار امین، شست سالی ملوک بگٹی نا مار حاجی دوست علی، ہشتاد سالی فرید بگٹی، ملحہ بگٹی نا مسڑ عزت خاتون، نزغو بگٹی نا مسڑ مراد خاتون و فرید بگٹی نا مسڑ مہناز بی بی نا پن تیٹ مسوسس۔

دن انگا تدینی تا مزاحمتی تحریک آ زیم آک:

بلوچستان ئٹ برجاء سلاء بند آجوئی نا تحریک و سلاء بند گل آتا تاغت ئٹ دے پہ دے آن ودکی مریسہ ءِ، جاچ ہلوک آتا پاننگ ءِ کہ بلوچ سلاء بند گل آتا تاغت ئٹ ودکی نا سوب پاکستانی لشکر نا اندا وڑ ئنا ظلم و بے دادی نا کسہ آکو، دن انگا بیم بش کروک تدینی تا مونا بننگ آن بلوچ ورناک سلاء بند کسر ءِ تینائی کریسہ تینا خار و سوختئی نا درشانی ءِ مزاحمتی گل آتیٹ اوار مریسہ کیرہ ہرا نا نسخان بیرہ ریاست ءِ مریک و سواد بلوچ آجوئی دوست سلاء بند گل آتے مرو۔

جاچ ہلوک آتا پاننگ ءِ کہ بلوچستان نا حالیت آتے دا ہد اسکان سر کننگ ئٹ اہم کڑد ریاستی پالیسیک سر تسنو، بلوچستان نا ویل ءِ ایسر کننگ کن گپ و تران نا جاگہ غا بے دادی آ زیات پام تننگک و دانا رد عمل ئٹ ورناک بیدس بے دادی نا فلسفہ نا جاگہ غا سلاء بند کسر ءِ اہمیت ایترہ، ہرافتا یخین ءِ کہ ریاست و ریاستی پالیسیک اوفتیکن پین ہچو کسر اس ہلیتنو۔

گڈ سر ئٹ:

بلوچ چاگڑد زالبول تا بارو ئٹ بھاز نازرک ءِ، برجاء زہری خاہوت تون مروک تدینی ءِ بلوچ کُڑدہ غاک بلوچ ننگ و سدی تیان بلوچ چاگڑد ئٹ شرف ئنا لائخ روایت آتیا سیدھا جلہو اس سرپد مریرہ، دا وڑ ئنا تدینی تا نتیجہ غاک ریاست کن بھاز خراب مرور و دا تدینی تیان بلوچ ویل ئٹ ودکی مرو۔

(یاتی: پوسکنا حوال تا رد ئٹ رشیدہ زہری بلوچ ءِ اینو یلہ کننگانے واہم دا حوال دائسکان خاہوت نا کنڈ آن پک متنے)

پُوسکنا حوالک

سی ٹی ڈی نا دزگیر ئٹ بندغ تا منوک ویڈیوک – ٹی بی پی سرگپ

سی ٹی ڈی نا دزگیر ئٹ بندغ تا منوک ویڈیوک ٹی بی پی سرگپ بیست و دو مارچ آ بلوچستان سول...

ایران ئٹ زمی جمب آن 82 بندغ ٹپی

اینو سہب ئنا مروک زمی جمب نا چنڈیک ترکیہ نا شار حقاری و وان ئٹ ہم مارنگار۔ ایران نا دے کہی آذربائیجان صوبہ تون گنڈوک...

نصیر آباد: ہفت سالی مسڑ ئسے تون زور ئٹ برام نا کوشست

بلوچستان نا ضلع نصیر آباد ئٹ پولیس تھانہ فلیجی نا ہند آتیٹ ہفت سالی مسڑ ئسے تون زور ئٹ برام کننگ نا کوشست، دوبہ...

کوئٹہ تون اوار تیوہ بلوچستان ئٹ طوفانی پِر

حوال تا رد ئٹ کوئٹہ تون اوار تیوہ  بلوچستان نا بھاز آ ضلع آتیٹ طوفانی پر آن جتا ویل آتیٹ زالبول مرگ ئنا گواچی...

ودار | ہیمنگوے – سعدیہ بلوچ

ودار نوشت: ہیمنگوے ( امریکہ) مٹ : سعدیہ بلوچ دی بلوچستان پوسٹ او کوٹی نا دریچہ آتے بند کننگ کن بسک، او وخت نن بسترہ آ ئسون و...