اشتماعی سزا نا گواچی بلوچ زالبول آک
ٹی بی پی سرگپ
مُسہ فروری نا نن گیشکوری ٹاؤن کوئٹہ ئٹی رحیم زہری ءِ اونا زائیفہ رشیدہ زہری، لُمہ و چنا تے پاکستانی لشکر نا وردی بینوک بندغ آک زوراکی ئٹ بیگواہ کریر۔ رحیم زہری نا لُمہ و چنا تے اِرا دے آن گڈ یلہ کننگا و رحیم زہری نا زائیفہ رشیدہ زہری ءِ یانزدہ دے اسکان دزگیر کننگ آن گڈ یلہ کننگا اندن رحیم زہری گمانی وڑ ئٹ دائسکان فوج ئنا دو ٹی ءِ۔
زوراکی ئٹ بیگواہ رحیم زہری، تابش وسیم نا سیال ئسے۔ تابش وسیم ءِ اونا تاتہ مار لیاقت تون اوار زوراکی ئٹ بیگواہ کننگاسس و خاران ئٹ سی ٹی ڈی دروغ نا مونتس ئٹ اونا خوْن ءِ کریسس اندن لیاقت دائسکان بیگواہ ءِ۔ زہری خاہوت نا بندغ آک مالو آن ہم زوراکی ئٹ بیگواہی نا گواچی مسنو و اوفتا جشوک جوْنک خسنگانو۔ رحیم زہری نا خاہوت دا خُلیس نا درشانی ءِ کیک کہ ریاستی ادارہ غاک رحیم زہری و لیاقت ءِ ہم تابش نا وڑ اسہ دروغ نا مونتس اسیٹ شہید کپس۔
زہری خاہوت نا یلہ مننگ کن کراچی و کوئٹہ تون اوار بلوچستان نا جتاء علاقہ تیٹ برانز کننگا و تیوہ بلوچ چاگڑد ئٹ اوفتا زوراکی ئٹ بیگواہی نا بر خلاف غم و سوختئی نا درشانی کننگک۔ سیاسی راہشون تا پاننگ ءِ کہ اشتماعی سزا نا چرجوئی بند مرے، پاکستانی لشکر بلوچ سیاسی باسک آتے جہد آن مُر تخنگ ئٹ بے سہبی آن گڈ اوفتا خاہوت آتا بندغ تے اشتماعی سزا نا گواچی کننگ ءِ۔ رحیم زہری نا یلہ مننگ کن برانز آک برجاء ئسر کہ تربت آن ڈاکٹر واحد بخش ئنا اُرا غا فوج چھاپہ خلیسہ زمان بلوچ ءِ زوراکی ئٹ بیگواہ کرے۔
بلوچستان ئٹ زوراکی نا بیگواہی تا بر خلاف اِرا دہائی تیان برانز مننگ ءِ۔ وائس فار بلوچ مسنگ پرسنز دوانزدہ سال آن کراچی و کوئٹہ پریس کلب نا مونا برانز ئٹ تولوک ءِ، کوئٹہ آن کراچی و کراچی آن اسلام آباد اسکان پند مارچ کننگا و اِرا سال مالو پاکستان نا مسکوہی سر وزیر عمران خان زوراکی ئٹ بیگواہ بندغ تا خاہوت آتون اوڑدہی کریسہ اوفتے باوری ترفے کہ اوفتے یلہ کننگو ولے دا کل آتیان بیدس بلوچستان ئٹ زوراکی نا بیگواہی تا تدینی تیٹ پاش ودکی مننگ ءِ۔
دفاعی جاچ ہلوک آک دعویٰ کیرہ کہ پاکستانی لشکر سرپد مریک کہ اشتماعی سزا آن بندغ تے راجی آجوئی نا تحریک آن مُر تخنگ مریک، ولے گواچنیک داڑان چپ خننگرہ۔ زوراکی نا بیگواہی و اشتماعی سزا تیان بندغ آتا ہمدردیک راجی آجوئی نا تحریک تون تفنگرہ، ہراڑان بلوچستان ئٹ ریاست نا سختی تیٹ ودکی مرو۔