ماہل بلوچ نا مقدمہ ، دہشت گرد یا چاگڑدی باسک ؟
ٹی بی پی تیدری
پاکستان پولیس نا کاؤنٹر ٹیررازم ڈیپارٹمنٹ (سی ٹی ڈی) کوئٹہ نا علاقہ سیٹلائٹ ٹاؤن آن اسہ بلوچ نیاڑی ماہل بلوچ ءِ دا دوبہ ٹی دزگیر کرینے کہ او گمانی ردئٹ بلوچستان لبریشن فرنٹ ( بی ایل ایف) نا اسہ خود کش بمبار و عسکریت دوست ئس ئسک۔ بی ایل ایف دا دوبہ ءِ نمن مسونے۔ واہم ، ماہل نا خاہوت و بندغی حق آتا ٹولیک، باسک و تنظیم آتا دعویٰ ءِ کہ او بے قصور ءِ و سی ٹی ڈی نا بے گناہ بندغ آتا عسکریت دوست نشان تننگ و اوتے دروغ مقابلہ ٹی خلنگ نا اسہ تاریخ ئسے۔ ماہل نا “زوراکی ئٹ بیگواہی” تدوکا سال نا یات آتے تازہ کرے، ہراتم سی ٹی ڈی آ دئے بلوچ بیگواہ بندغ آتے زیارت ٹی اسہ دروغ مقابلہ اسیٹ کسفنگ نا دوبہ خلنگاسس ۔
ماہل بلوچ نا “زوراکی ئٹ بیگواہی” بھلو پِڑ ئسے آ برانز و بے جاراتی نا اسہ لڑ اس ودی کرینے۔ سیاسی باسک آک، خوانندہ باسک و بندغی حق آتا تنظیم آک دا تدینی نا مذمت ءِ کرینو و پاکستانی سیکورٹی فورسز کارندہ آتے اختلاف رائے ءِ لتاڑنگ کِن ” بے دادی ” و ” وے بندغی ” جلہو کاریم ئٹ ہترنگ آ نغد کاری کرینو ۔ باسک آک سوشل میڈیا آ ٹرینڈز ہم چلفیر و ماہل بلوچ نا رکھوک آجو کننگ کِن برانز ہم کننگ ءُ ۔
سی ٹی ڈی انت پائک؟
کاؤنٹر ٹیررازم ڈیپارٹمنٹ ماہل بلوچ نا دزگیر کننگ نا رِدئٹ میڈیا ئٹ شینک کروک بیان ئٹ پارے کہ اودے انٹیلی جنس حوال رسینگاسس کہ او کوئٹہ ٹی اسہ ” گچین” ہند ئسے آ خود کش جلہو کننگ نا منصوبہ بندی کننگ ئس۔
ماہل بلوچ نا برخلاف سی ٹی ڈی اسٹیشن کوئٹہ ٹی درج ایف آئی آر نا ردئٹ اودے سیٹلائٹ ٹاؤن ٹی اسہ اُلسی پارک نا رہی آ خنیسہ دزگیر کننگا۔ گمانی ردئٹ او اسہ لیٹ ٹاپ بیگ اس دننگ مسوسس ہراٹی خود کش جیکٹ اس ئس۔ اوکان بیدس، سی ٹی ڈی کوالخواہ تے اونا شناختی کارڈ و اوڑان 1500 رسینگا ۔
بلوچستان نا وزیر داخلہ ضیالانگو نا پاننگ ئس کہ انٹیلی جنس ایجنسیک حکومت ءِ مننگ کروک سیکورٹی تڑی آن خبر کریسس ۔ حکومت سیکورٹی فورسز ءِ پنت کرے کہ او زوت کاروائی کیر و تڑی نا مقابلہ ءِ کیر ۔
بی ایل ایف انت پائک ؟
بلوچستان لبریشن فرنٹ ( بی ایل ایف ) میڈیا ٹی شینک کروک بیان اس شینک کریسہ پارے کہ ماہل بلوچ ننا تنظیم تون تفوک اف ۔ تنظیم اونا ” زوراکی ئٹ بیگواہی ” نا مذمت کرے و پارے کہ اوڑا دروغ دوبہ خلنگ ءُ ۔
تنظیم نا پاننگ ئس کہ ماہل بلوچ نا تعلق بلوچستان نا ضلع کیچ نا علاقہ گومازی آن ءِ۔ او پنی آ بلوچ راج دوست ایماندار واجہ محمد حسین نا نشار و بندغی حق کونسل بلوچستان نا چیئرپرسن بی بی گل بلوچ نا بھاجئی ءِ۔ بی ایل ایف نا پاننگ ئس کہ موخر الذکر بلوچستان ٹی بندغی حق آتا لتاڑنگ آ توار ارفیسہ ءِ۔ تنظیم نا پاننگ ئس کہ پاکستان سیکیورٹی فورسز ماہل بلوچ ءِ اونا خاہوت آ زور تخنگ کن دزگیر کرینو ۔
بی ایل ایف نا گیشتر پاننگ ئس کہ سیکورٹی فورسز اونا خاہوت ءِ تڑی تریسہ چُپ کننگ نا کوشست کرفیر۔ ماہل بلوچ، اِرا چنا نا لمہ ءِ، و اونا خاہوت 2018 ٹی سیکورٹی فورسز نا پارہ غان اونا اُرا ءِ ہُشنگ آن گُڈ کوئٹہ آ ہِننگ آ بے وس مسس۔
تنظیم نا پاننگ ءِ کہ پاکستانی سیکورٹی فورسز بی ایل ایف نا گواچنی جنگجو تے ہلنگ ئٹ بے سہب ءُ و داکان بیدس بے گناہ شاری تے دزگیر کریسہ عسکریت دوست قرار تننگ ءُ۔ تنظیم نا گیشتر پاننگ ءِ کہ او دُن جہان ءِ نشان تننگ کن کریسہ ءُ کہ او بلوچستان ٹی بُڑز مریسہ شورش نا برخلاف کاروائی کننگ ءُ۔
بندغی حق آتا تنظیم آک اول ئٹ ہم ماہل بلوچ تون کروک سلوک آ بھیم نا درشانی کرینو و بی ایل ایف نا بیان حالیت نا نازرکی ءِ گیشتر بُڑز کننگ ءِ۔ بندغی حق آتا تنظیم آتا خواست ءِ کہ پاکستان حکومت ءِ دا دوبہ آتا پٹ و پول کننگ کن زوت ئٹ کاروائی کروئی ءِ و دا ہیت ءِ یخینی جوڑ کروئی کہ ماہل بلوچ ءِ قانود نا ردئٹ منصفانہ ٹرائل نا حق تننگے۔
ماہل نا خاہوت نا انت پاننگ ءِ؟
ماہل نا خاہوت نا ردئٹ، ماہل بلوچ پارک آن دزگیر کننگتنے، ہمر کہ سی ٹی ڈی نا دعویٰ ءِ، بلکن اونا اُرا آن او و اونا اِرا چُنا تون اوار چار پین بندغ ءِ دزگیر کننگاسس ۔ ماہل نا بھاجئی بی بی گل بلوچ بی بی سی اردو ءِ پارے کہ سیکورٹی فورسز کارندہ آک اونا اُرا ءِ گھیرہ ٹی کریر و چوکیدار ءِ ہم او وخت زدوکوب کننگا ، ہراتم او اوتے توننگ نا کوشست کرے ۔
اونا پاننگ ئس کہ ہر چار دزگیر کروک بندغ آتے ارٹمی دے یلہ کننگا ۔ اوتا خنتیا پٹی تفنگا و اُرا آ پدا بننگ نا مرغنا سفر کننگ کن شار آن بھاز مُر یلہ کریسُر ۔ بی بی گل نا گیشتر پاننگ ئس کہ ماہل بدستور سی ٹی ڈی نا دزگیری ٹی ءِ ۔
بی بی گل بلوچ ہم سی ٹی ڈی نا دعویٰ تے رد کریسہ پارے کہ ماہل بلوچ نا تعلقداری ہچو “آجوئی دوست” گل ئسے آن الو و نئے کہ او خودکش بمبار اس ئس۔
کوئٹہ ئٹی برانز آن تران کریسہ ماہل بلوچ نا بلغڑ پارے کہ سکیورٹی فورسز آک اودے دزگیر کننگ آن مالو جسمانی بے دادی نا گواچی کریر۔ او پارے کہ فورسز آک اودے اسہ یکہ ءُ کوٹی ئسے ٹی بند کریسہ خلکر۔ نن اونا چیہانٹ آتے بِننگ کرینہ۔ او کوالخواہ تیان خواست کرے کہ ماہل بلوچ اِرا چنا غا رحم کننگے و اودے یلہ کننگے۔
السی ردعمل:
ماہل بلوچ نا “زوراکی ئٹ بیگواہی” نا حوال چاگڑدی میڈیا غا جنگل ئٹ خاخر نا وڑ تالان مس، ہراڑان الس ئٹ بھاز غم و سوختئی خننگا۔ سیاسی باسک آک، بندغی حق آتا گل و باسک آک تدینی نا مذمت کریر و کوالخواہ تیان خواست کریر کہ ماہل بلوچ ءِ رکھوک یلہ کننگے۔
چاگڑدی باسک و وکیل ایمان زینب مزاری ٹوئٹر آ ماہل بلوچ نا “زوراکی ئٹ بیگواہی” نا مذمت کرے و پارے کہ کوئٹہ نا ساڑی کور کمانڈر آصف غفور بلوچستان ئٹ سلاء بند بندغ آتا کچ ءِ ودفنگ خواہک۔
او پین پارے کہ انٹیلی جنس ایجنسی و سکیورٹی فورسز آتے زالبول تے ٹک کننگ نا بھلو قیمت اس تروئی تمو۔
او سقوط ڈھاکہ ءِ ہم یات کریسہ پارے کہ پاکستانی لشکر بیدس اسہ پشیوانی ئسے آن ہزار آ بنگالی زالبول تا عصمت دری کرے۔ اینو اسکان نن او جنگی ڈوہ تیا لج آن کاٹم ءِ شیف کرینن۔
مزاری گیشتر پارے کہ بے ڈوہ شاری تے دزگیر کننگ و اوفتیا بے دادی کننگ بیرہ پاکستانی لشکر نا برخلاف سوختئی ءِ ودفک و بندغ آتے “آجوئی دوست” گل آتیٹ اوار مننگ نا اُست خواہی ودی کیک۔
بلوچستان نیشنل پارٹی مینگل اسہ میڈیا بیان اسیٹ ماہل بلوچ نا زوراکی ئٹ بیگواہی نا مذمت کریسہ پارے کہ او 25 فروری آ کوئٹہ ئٹی بین برانز کرو۔ بیان ئٹ پاننگا کہ اسہ بے ڈوہ ئسے نا “برمتہ” کننگ بندغی حق آتا ترند لتاڑنگ و بلوچستان نا حالیت آتے خراب کننگ نا اسہ چاہوک و سرپد مروک منصوبہ ئسے نا بشخ ئسے۔
ماہل بلوچ نا “زوراکی ئٹ بیگواہی” تربت شار ئٹ غم و سوختئی و برانز ءِ ودی کرے، ہراتم بندغ آک اونا دمدستی یلہ کننگ نا خواست کریسہ سڑک آتیا پیشتمار۔ برانزیک سڑک آتیا پند مارچ کریر، کاؤنٹر ٹیررازم ڈیپارٹمنٹ (سی ٹی ڈی) نا برخلاف نعرہ خلنگا و انصاف نا خواست کننگا۔ برانزیک حکومت و سکیورٹی فورسز آتا برخلاف بے اومیتی نا درشانی کریسہ اوفتیا دوبہ خلکر کہ او معصوم شاری تے بیدس قانودی وڑ ئٹ دزگیر کننگ ءُ و اوفتے عسکریت دوست پن تننگ ءُ۔ تربت ئٹ برانز آتا لڑ دائسکان برجاء ءِ۔
جاچ ہلوک، باسک و بلوچ راج دوست آتا رد ئٹ پاکستان ئٹ قانود ٹہیفوک ادارہ غاک خاص وڑ ئٹ ہمو زالبول تے ٹک کننگ ءُ ہرا راج دوست سیاست نا کاریم تیٹ بشخ ہلنگ ءُ و اوفتا سروکی ءِ کننگ ءُ۔ بلوچستان ئٹ سیاسی تنازع نا بھلو تاریخ ئسے و بلوچ آجوئی نا جہد ئٹ زالبول آک اہم کڑد سر تسنو۔ اندا خاطران قانود ٹہیفوک ادارہ غاک گمانی وڑ ئٹ کاریم کروک بلوچ زالبول سیاسی باسک آتے جسمانی و ذہنی بے دادی نا گواچی کننگ ءُ تاکن زالبول سیاست نا کسر تے بند کننگ مرے۔
سیاسی جاچ ہلوک آتا پاننگ ءِ کہ دا حکمت عملی نہ بیرہ بندغی حق آتا لتاڑنگ ئسے بلکن دا نسخان تروک اس ہم ارے انتئے کہ دا بیرہ ڈیہہ ئٹ حالیت آتے پین خراب کننگ نا سوب جوڑ مرو۔ بلوچ راج دوست آک دا وڑ ئنا عمل ءِ ایسر کننگ و بلوچ زالبول تا کڑد ءِ تینا کمیونٹی نا بروک وخت ئنا ٹہیفنگ ئٹ زیات آن زیات مننگ نا خواست کرینو۔
پاکستان نا کاؤنٹر ٹیررازم ڈیپارٹمنٹ (سی ٹی ڈی) آ ہنوک وخت ئٹ بیدس عدالت خون و دروغ نا مونتس تیٹ اوار مننگ نا دوبہ خلنگانے۔ اندا سوب آن بیدس سوگوْ شاہدی آتیان بیدس بیرہ انٹیلی جنس معلومداری تا بنداو آ ماہل بلوچ نا دزگیری سی ٹی ڈی نا کارروائی تا صاف و انصاف ئٹ مننگ نا بارو ئٹ بھاز خُلیس تے ودی کننگ ءِ۔
دا وڑ ئنا گامک نہ بیرہ معصوم بندغ آتا بنداوی بندغی حق آتے لتاڑیرہ بلکن مالو آن بے سوگوْ ڈیہہ ءِ پین بے سوگوی نا گواچی کننگ ئٹ ہم کمکار پاش مریرہ۔ کوالخواہ و بندغی حق آتا ٹولی تے دا حالیت نا نوٹس الوئی تمو و دا ہیت ءِ یخینی جوڑ کروئی تمو کہ ماہل بلوچ نا انصاف ئٹ ٹرائل کننگے و اونا بنداوی بندغی حق آتے رکھنگے۔ دا الّمی ءِ کہ قانود نا رد ئٹ عمل کریسہ انصاف تننگ مرے، و سکیورٹی فورسز آتے اوفتا کاریم تیکن جوابدہ کننگے۔