اقوام متحدہ نا رد ئٹ او دا رکھ آتا زیم تا جاچ ءِ ہلنگ ءِ و گیشتر شابیتی ہیت اکن چار شمبے آ کابل ئٹ افغان وزارت خارجہ نا کوالخواہتون اوڑدہی کننگ ءِ۔
اوغانستان ئٹ اقوام متحدہ نا مشن چار شمبے آ کابل ئٹ طالبان کوالخواہ تون گپ و تران کرو تانکہ پوسکنا حکومتی رکھ ئنا بابت‘معلومداری دوئی کننگے‘ ہرا نا رد ئٹ زالبول تے تیوہ ڈیہہ ئٹ جہانی ادارہ تیکن کاریم کننگ آن توننگانے۔
حوال تروک ادارہ روئٹرز نا رد ئٹ طالبان نا کنڈ آن اقوام متحدہ ٹی کاریم کروک اوغان زالبول تیا رکھ ئنا حکم آن گڈ جہانی ادارہ غاکاوغانستان ئٹ ساڑی کم و ود تینا مُسہ ہزار نیم بندغ نا عملہ ءِ بروک آ اِرا دے اسکان کاریم آ ہنپننگ نا پنت کرینو۔
اقوام متحدہ نا ترجمان اسٹیفن دوجرک نیویارک ئٹ نامہ نگار آتے پارے کہ اوغانستان ئٹ اقوام متحدہ نا دفتر ءِ ‘طالبان کوالخواہ تا کنڈآن اسہ حکم نامہ اس رسینگانے ہرا ٹی جہانی ادارہ تا عملہ ٹی اوار انگا زالبول تا کاریم کننگ آ رکھ ئنا بابت ہیت کننگانے۔‘
او پارے اقوام متحدہ دا حکم نامہ نا زیم تا جاچ ءِ ہلنگ ءِ و گیشتر شابیتی ہیت اکن چار شمبے آ کابل ئٹ افغان وزارت خارجہ ناکوالخواہ تون اوڑدہی کننگ ءِ۔
ڈیہہ ئٹ کم و ود 400 افغان زالبول اقوام متحدہ کن کاریم کننگ ءُ۔
اقوام متحدہ نا اِرا ذرائع غاک روئٹرز ءِ پاریر کہ طالبان نا حکم نامہ نا شینک مننگ نا بابت خُلیس تا سوب تنظیم تینا غٹ عملہ ءِ نرینہآتون اوار 48 گھنٹہ کاریم آ ہنپننگ نا پنت کرینے۔
اوغانستان ئٹ اقوام متحدہ نا مشن (یو این اے ایم اے) اسہ دے اس مالو دے ٹکی صوبہ ننگرہار ئٹ زالبول تے کاریم آن توننگ آ ہمخُلیس نا درشانی کریسس۔
اسٹیفن پین پارے کہ ‘ننگرہار نا صوبائی بنجاہ جلال آباد ئٹ ہڑتوما کوالخواہ تا نیام ئٹ گپ و تران مسونے واہم ننے جتاء ذرائع تیانپاننگا کہ دا رکھ تیوہ ڈیہہ اکن ءِ۔‘
او پارے کہ اقوام متحدہ کن زند ءِ رکھوک کمک آتے سر کننگ ئٹ عملہ ٹی زالبول باسک آتا اواری الّمی ءِ۔