ڈیرہ غازی خان: یورینیم نا خننگ آن مرک اسکان سفر
ٹی بی پی تیدری
واھگ بلوچ
پانزدہمی کرن ئنا بناء ٹی میر حاجی خان میرانی بلوچ ڈیرہ غازی خان شار ئنا بنداو ءِ تینا مار میر غازی خان نا پِنا تخا ہرا کیہی کرنتے اسکان بلوچ ریاست نا دروشم ئٹ سوگوْ مس، ہراڑا بلوچ قبیلہ میرانی و دودائی جتا وخت آتیٹ حکمرانی کریر۔
ڈیرہ غازی خان آ کیہی وخت آتیٹ کوزہ گیر آک کوزہ نا نیت ئٹ جلہو نا کوشست ہم کریر ولے بے سہب مسر۔ میر نوری نصیر خان اوّلہفدہمیکو صدی ٹی بلوچ وطن ءِ اسہ فیڈریشن ئسے نا رِدئٹ سوگوْ کرے تو ڈیرہ غازی خان ءِ ہم بلوچ فیڈریشن یعنی قلات (بلوچستان) ئٹ اوار کرے ہرا ہژدہمیکو صدی نا بناء اسکان برجاء سلیس۔
برطانیہ نا کوزہ آن گڈ بلوچستان ءِ کیہی بشخ ئٹ ونڈ کننگا، اسہ علاقہ ءِ بست و بندی بابت ئٹ اوغانستان تون تفنگا، بھلا بشخ ءِ ایرانو پاکستان ئٹ ونڈ کریسہ بلوچ آتا سیوتی ءِ ایسر کننگا، ہرانا سوب آن اینو اسکان بلوچ راج نا آباتی جتا ڈیہہ تیٹ تالان ءِ۔ ارٹمیکو بھلاجنگ آن گڈ برطانیہ دا علاقہ آتیان پیشتمنگ نا فیصلہ کرے و منَہ توہ اسکان بلوچستان نا ریاستی حیثیت دوارہ بحال مس۔ 1948 ئٹیپاکستان نا زوراکی ئٹ اوڑدئی آن پد بلوچستان نا ریاستی حیثیت 1955 ئٹی ایسر کننگا و بلوچ ڈغار ءِ سیاسی و بست و بندی سیم آتابنداو آ ونڈ کریسہ ڈیرہ غازی خان ءِ 1951 ٹی پاکستانی صوبہ پنجاب ئٹ اوار کننگا۔
ڈیرہ غازی خان نا سیم بندی تے جیوگرافیک بنداو آ ہُننگ مرے تو دانا فطری سیم آک بلوچستان تون اوار ءُ و ڈیرہ غازی خان نا مش وپٹ آتیٹ رہینگوکا غُٹ آباتیک جتا بلوچ قبیلہ آتیا ساڑی ءُ۔
ڈیرہ غازی خان ئٹ یورینیم نا خننگ:
ڈیرہ غازی خان ئٹ شست ئنا دہائی ٹی یورینیم نا مڈیک خننگار، ہراڑان گڈ پاکستان اٹامک انرجی 1977 ٹی بغلچر ٹی مائننگ بناءکرے۔ داکان یورینیم 235U، U238 یورینیم کشنگک ہرادے سائنسی بولی ئٹ ییلو کیک پاننگک، داکان سالانہ 25000 کلو گرامیورینیم کشنگ مریک۔
کوہ سلیمان نا مش تیٹ ودیک یورینیم نا ہند خننگانے و کم و وَد کوہ سلیمان نا تیوہ مش تا لڑ ئٹی یورینیم نا مننگ نا نشان ارے۔
کوہ سلیمان ٹی ہشت مائننگ پلانٹ خلنگانے ہرافتیٹ وشافی، دلانہ، زین، نگرنائی (راکھی گاج)، سوا پراگ، گوھند و بغلچر اوار ءُ۔ داپلانٹ آک ہمو علاقہ آتیٹ خلنگانو ہراڑے آبادیک بیرہ منَہ کلومیٹر نا مُری آ ساڑی ءُ۔ دا پلانٹ آتیٹ کاریم کروکا انجینئر آتا رد ئٹ داڑےبیرہ یورینیم کشنگپک یورینیم تون اوار کیہی وڑ ئنا دھات ہم کشنگک ہرافتیٹ ریڈیم و پولونیم اوار ءُ۔
پاکستان اٹامک انرجی کمیشن سکیورٹی تھریٹ نا سوب آن کوہ سلیمان نا تیوہ مش تیٹ زمین دوز کسر جوڑ کریسہ اوفتے ٹنڈیل نادروشم ئٹ بنجائی بست و بند تون تفینے و دا ٹنلز تیا ودیک کاریم برجاء ءِ ہراکان یورینیم ءِ اسہ خاص رکھوک جاگہ سے آ گدرینگک۔
پاکستان اٹامک انرجی ڈیرہ غازی خان نا کیہی مشی و شاری علاقہ آتیٹ ہندی آباتی تیا رکھ خلکنے و ہندی مخلوق ءِ زوراکی ئٹ اوفتاڈغار تیان کشنگانے و دا علاقہ آتیٹ جتا وڑ ئنا پروجیکٹ ساڑی ارے ہراکان یورینیم نا ودفنگ و ایٹمی سلاء تے لانچ کننگ آ کاریم کننگک۔
ڈیری غازی خان ئٹ یورینیم کانڑ پٹنگ نا زہم آک:
کوہ سلیمان آن پیشتموکا یورینیم و ڈیرہ غازی خان ئٹ ایٹمی تابکاری نا سوب آن دا علاقہ آتیٹ کینسر نا ناجوڑ آتیٹ باز ودکی مسنے،کوہ سلیمان نا ہندی مخلوق نا رد ئٹ داڑے کینسر نا ودوکا تدینی تا سوب پاکستان اٹامک انرجی نا پروجیکٹ و اوفتیان پیشتموکاتابکاریک ءُ ہراڑان ہر سال کہی بندغ آک مرگ ئنا گواچی مننگ ءُ۔
ہندی مخلوق نا پاننگ ءِ کہ پروجیکٹ آتیان پد آن کوہ سلیمان و ڈیرہ غازی خان نا شاریک بون میرو، جغر نا کینسر،پف آتا کینسر، بِک،ہڈ آتا کینسر، مِلی شَل، مون ئنا ٹیومر ٹیوبر کلوسس، چُنا تا پِڈ ئٹ زوال مننگ، بدن شَلی، روتینک آتا کینسر نا گواچی مننگ ءُ۔
2005 ٹی بغلچر نا ہندی بندغ آک کوہ سلیمان نا مش تیٹ ویسٹ مٹیریل نا ڈمپنگ نا برخلاف عدالت ٹی کیس فائل کریر ہراڑا پاکستاناٹامک انرجی کمیشن عدالت ءِ رپورٹ نشان تسوسس ولے داٹی ہمو خواہوک ایسری دوئی متو ہچو است خواہ کمبوتی اس بتئو، داڑےرینگوک بندغ آک پاکستان نا جتا بشخ آتیان اتوک ایٹمی گند گڑس نا ڈہکنگ نا بابت کہی وار سر و سوج نا درشانی کننگا ولے اوفتا ہیتآتے بننگ متئو و نہ دا ویل ءِ سوبری ئٹ ہلکر۔
بی بی سی نا نامہ نگار سعید نوشتہ کیک کہ کوہ سلیمان نا بندغ آک سرپد مریرا کہ ہیروشیما و ناگاساکی نا بندغ تیا ایٹم بمبخسیسہ اوفتے اسہ وار تون کسفنگا ولے کوہ سلیمان ٹی ننا ہر زنک ئنا کسفنگ نا بست و بند مننگ ءِ، ہرا وخت او ہندی عدالت ٹیپاکستان اٹامک انرجی کمیشن نا راہشون تون دا بابت سوج کرے گڑا اٹامک انرجی کمیشن نا راہشون آک دا ہیت ءِ منار کہ ہموڑے جتاعلاقہ آتیان مواد ہتیسہ کڈ کننگ ءُ ولے اوفتے زمین نا تہٹی کڈ کننگ ءُ ہرافتا علاقہ غا ہچ ءُ بھس کاری نا زہم تمپ ولے کوہ سلیمان نامخلوق دا ہیت ءِ مننگ اف۔
ڈیرہ غازی خان نا ڈاکٹر محمد ارشد ہراکہ لاہور ٹی آنکلوجسٹ مننگ تون اوار سرجیکل آنکولوجی شعبہ نا سرکماش ءِ اونا رد ئٹ ڈیرہغازی خان و کوہ سلیمان نا علاقہ آتیٹ کینسر نا کچ لاہور نا حساب ئٹ بھاز ءِ ولے واپس ہم داعلاقہ آتیٹ جانجوڑی نا اسہ وڑ ئنا ہمبست و بند ساڑی اف۔
اٹیمی سائنس نا ماہر باسک ڈاکٹر پرویز ہود بھائی نا سوج ئٹ دا چپی نا سوب دادے کہ ڈیرہ غازی خان و اونا ایب کیب بندغ آتیٹیورینیم نا مزور کار تا بابت جائز گمان آتے ہر وخت راجی سلامتی نا پن آ شیف شاغیرا، اونا رد ئٹ دا سوب آن علاقائی مخلوق ٹی داخلیس ودی مسونے کہ دا ویل آ ہیت کننگ آ پاکستانی ایجنسی تا پارہ غان بد ءُ عمل ئسے نا گواچی مروئی تمو، اندارِدئٹ او تینا ذاتیآزمودہ ءِ پائک کہ ہرا وخت 2000 ٹی او تینا گڑاس سنگت تون اوار دا علاقہ آ ہننگ نا چم جوڑ کرے ہراکان یورینیم پیش تمینگ ءِ تاکناوڑے دانا زہم تا جائزہ ہلینگ کے ولے اودے اونگ ہننگ آن توریر۔
مارچ 2021 ٹی ڈیرہ غازی خان نا ڈسٹرکٹ ہیڈ کوارٹر ہسپتال ٹی معدہ و روتینک نا چاہندار ڈاکٹر ہدایت دا ہیت تون امنائی کریسہپارے کہ سد آ ناجوڑ آتا داسکان داڑے جاچ کننگانے، اوفتیٹ لڑ ئنا دروشم ئٹ 60 آن 80 فیصد بندغ آک جغر و کینسر نا گواچی ءُہراکہ ایلو شار تا حساب ئٹ بھاز زیات ءِ۔
ڈاکٹر ہدایت نا رد ئٹ ڈیرہ غازی خان ٹی دا جانجوڑی تا کچ بڑز مننگ نا منکن سوب یورینیم نا کانڑ تا ایب کیب ٹہیفوک خلق ئنا بندغآک یورینیم زدہ دیر ءِ کاریم ٹی ہتیرہ، او پین پارے کہ ڈیرہ غازی خان ٹی چنکا چنکا چناک و ورنا بندغ آتا بھلو کچ اس جغر نا ناجوڑ وکینسر نا گواچی مننگ ءِ ولے لس وڑ ئٹ دا ناجوڑی بھلا سن ئنا بندغ آتےگواچی کیک۔
ڈیرہ غازی خان ٹی ٹہیفوک غازی میڈیکل کالج کینسر نا شعبہ تون ہمگرینچ ڈاکٹر پن پاش نہ کننگ نا شڑط آ ہیت کننگ کن تیار مس، اوکوہ سلیمان و اوڑتون اوار علاقہ آتیٹ دا ناجوڑی تا تالان مننگ نا سوب لڑد دیر و تہو ءِ پارے۔ دا لُڑری نا سوب مروک گڑا تا بابت ہیتکریسہ او پارے کہ یورینیم نا کانڑ آن گڈ اودے صاف کریسہ اندن انگا ٹکر تا دروشم ایترا ہرادے پوشکن کیک پارا اوفتا رد ئٹ ہرا وخت داباریر گڑا اوفتا چنکا چنکا ٹکر آک جتا مریسہ تہو و دیر ئٹی اوار مریرا ہراکان او بندغی بدن ٹی اوار مریرا۔
یورینیم نا مزور کار و کاریم اٹ ہتنگ نا ذمہ وار بنجائی ادارہ پاکستان ایٹمی توانائی کمیشن نا ہر وخت آن دا پاننگ مسونے کہ بغلچرنا کانڑ تان کشوک یورینیم اسہ وڑ ئنا ہم ناجوڑی ویل ئنا سوب مننگ افس، اونا دا ہم دعویٰ ءِ کہ یورینیم تے کانڑ آن کشینگ نا وخت واودے صاف کننگ نا وخت جہانی اصول و راہبند نا سخت خیال کننگک۔
کمیشن نا لس مخلوق تعلقداری منیجر شاہد ریاض نا پاننگ ءِ کہ اونا ادارہ نہ بیرہ سائنسی اصول آتے مونا تخیسہ یورینیم نا کانڑ تےپٹک بلکن اونا صفائی نا وخت آ ودی مروک گڑس آتے ہم گچینی تون ہندی کیک بلکن اونا رد ئٹ کمیشن تینا چاگڑدی ذمہ واری تے پوررکریسہ بغل چر نا بندغ آتے جانجوڑی، خواننگ و کننگ نا صاف دیر ئنا آسراتی تیک۔ اونا پاننگ ءِ کہ کوہ سلیمان آن یورینیم نا کانڑپٹنگ ءِ سنہ 2000 آن توننگا اندا سوب آن تیوہ علاقہ و ڈاکٹر تا دا پاننگ سہی اف کہ دا عمل ہندی آباتی تیٹ کینسر و جغر ناناجوڑی تیٹ ودکی نا سوب جوڑ مننگ ءِ۔
داسکان 2021-22 نا بنجائی بجٹ اونا ایسری دعویٰ نا نمن کریسہ خننگیک انتئے کہ اوٹی کوہ سلیمان آن یورینیم نا کانڑ پٹنگ کن 14 کروڑ رپئی تخنگا۔
شاہد ریاض پائک کہ کوہ سلیمان نا علاقہ بغلچر ٹی مروک یورینیم نا کیمیائی دروشم دا وڑ نا ئسے کہ اودے ایٹمی سلہہ ٹی کاریم ئٹہتنگپک بلکن داکان بیرہ دارو درمان و بجلی جوڑ کننگیک دا بنیات آ اوفتا دا دعویٰ ءِ کہ دا یورینیم نا بندغی ایب کیب و جانجوڑی آنسخان آک وے مننگ تون برابر ءُ۔
پرویز ہودبھائی، شاہد ریاض تون امنائی کپک کہ اگہ او منیرہ کہ بغلچر ٹی زیات یورینیم 238 رسینگیک ہرا لس دارو و بجلی ودیکننگ کن کاریم ئٹ ہتنگیرہ ولے اوفتا مننگ ءِ کہ دا دروشم یورینیم 235 نا وڑ خننگیرہ اندا خاطر اوفتا نظر ئٹ دا ہڑتومکا قسم آکبندغی جانجوڑی و ماحول کن اسہ ڈول بھیم بش کروک ءِ۔
پرویز ہودبھائی نا ہیت نا پک 1990 ٹی مروک آ امریکی و عراق جنگ آن ہم مریک، ہرانا ایسر مننگ آن بھاز آ امریکی فوجیک زیات کاٹمخڷ، جغر نا خرابی، بِک آتا ہشنگنگ نا ڈول ناجوڑی تا گواچی مسوسر ہراتم جانجوڑی چاہندار آک اوفتا ناجوڑی تا سوب چاننگ کنکوشست کریر گڑا سما تما دا زیم آک یورینیم 238 نا ودی کروک ئسے، ہرا ہمو میزائیل آتیٹ کاریم ئٹ ہتنگاسر ہرافتے جنگ نا وختعراقی ٹینک آتے بھس کننگ کن امریکہ و اونا فوجی سنگت آتیا خلکسر۔
آئی ایس آئی نا مسکوئی چیف جنرل حمید گل نا ہیت آک پرویز ہود بھائی و شاہد ریاض نا خیال آتیان جتاء ءُ و اوفتا ہیت آتیان پرویزہود بھائی و شاہد ریاض نا منہ ہیت آتا بر خلاف ہم مریک، اوفک پاکستان ءِ ایٹمی طاغت جوڑ کننگ ٹی بغلچر نا یورینیم نا یاتی کریسہپاریسر کہ پاکستان ءِ ایٹمی طاغت جوڑ کننگ کن ڈیرہ غازی خان نا علاقہ بغلچر نا ہند آن یورینیم کشنگاسس ۔
پاکستان اٹامک انرجی کمیشن بغلچر نا پروجیکٹ منیجر یعقوب چوہان ءِ 1989 ٹی رہی سندھ نا ہند آ ہراتم خلنگاسس، ہراڑان گڈپاکستان اٹامک انرجی کمیشن بغلچر و ارٹمی پلانٹس آتے فعال تخنگ و رکھ بھیم نا سوب آن بغلچر پلانٹس نا چارمیکو کنڈان تار خلنگنا عمل بناء کننگا ہرا دائسکان ہم برجاء ءِ۔
کوہ سلیمان نا تیوہ مشی آ لڑ ٹی تمن قیصرانی آن ہلیس تمن کھوسہ اسکان جانجوڑی کن آسراتیک خننگپسہ۔ اٹامک انرجی کمیشن ناپارہ غان اِرا بی ایچ یو جوڑ کننگانے زین و رونگھڑ نا ہند آ ولے اوڑے اسہ وڑ ئنا بنماسی دارو درمان و ڈاکٹر ساڑی افس۔ کوہ سلیماننا ہندی تیتون بجلی، کسر، دیر، اسکول، کالج آک، جانجوڑی نا ڈول آسراتی ساڑی اف اگہ دافتیکن توار ارفنگے گڑا ہندی سڑدار وایجنسی تا پارہ غان اوفتے چپ کرفنگ نا کوشست کننگیک ۔
کوہ سلیمان و اونا ایب کیب ٹی کینسر نا ناجوڑی تے بڑز شرح ئٹ ہریسہ سیاسی جماعت بلوچ راج اونا برخلاف توار ارفیر و ڈیرہ غازیخان ٹی ودوکا کینسر نا زیم آک و جانجوڑی نا حوالہ آن اسہ پاروکو مہم نا بناء اس کننگا، ہراٹی بندغ آک بھلو کچ ئسیٹ بشخ ہلکر ولےپاکستان اٹامک انرجی کمیشن و ڈھکوک ادارہ نا پارہ غان اوفتے خلفنگ و تڑی تننگ نا ہر مننگ مروک کوشست کننگ ءِ۔ تونسہ شریفو ڈیرہ غازی خان ٹی دا بندغ آتا پروفائلنگ مننگ ءِ و اوفتے ڈیرہ غازی خان و تونسہ شریف نا تھانہ ٹی خوائفنگاسس ۔
بلوچ راج نا باسک آتا پاننگ ءِ کہ اوفتے پاننگا کہ تابکاری زیم آک و کینسر نا برخلاف تینا مہم ءِ بند کبو و وے بند کننگ نا دروشم ئٹسخت آن سخت سوب آتا تڑی تننگا۔
تونسہ شریف نا اسہ ہندی تنظیم بزدار اتحاد ءِ ہم کینسر نا برخلاف برانز کننگ آن توننگا و ڈھکوک ایجنسی تا پارہ غان سخت سوبآتا تڑی تننگاسس۔
پاکستان اٹامک کمیشن و حکومت تینا ذمہ واری تیان بے پام ءِ۔ ڈیرہ غازی خان ڈویژن نا اسہ ہم اسپتال ٹی کینسر نا وارڈ اف۔ کینسرنا حساب و کچ نا حوالہ آن ڈسٹرکٹ ہیلتھ آفیسر ڈاکٹر احسن اعوان نا پاننگ ئس کہ اوفتیتون کینسر نا مریض آتا کچ ساڑی ئس۔کینسر نا کہنگ آتا سرکاری کچ ءِ ڈھکنگ ءُ کہ بھلا ویم ءِ بش مننگ آن توننگ مرے۔
یورینیم نا کانڑ پٹنگ کن انٹرنیشنل اٹامک انرجی ایجنسی نا قانود آک:
جہان نا ہرا ڈیہہ تیٹ یورینیم نا پروجیکٹ آک مننگ ءُ اوفتیکن آئی اے ای اے ( انٹرنیشنل اٹامک انرجی ایجنسی) نا بک آف انٹرنیشنل لاءئٹ جتاء وڑ ئنا قانود آک ساڑی ءُ ہرا نیوکلیئر سلہہ تا رکھنگ آن بیدس بندغی جانجوڑی تا ضمانت ایترہ، ہرانا اسہ بشخ اسیٹ پاشنوشتہ ءِ کہ حکومت ءِ پروجیکٹ علاقہ تا تہٹی کاریم کروک ملازم آتیان بیدس ایب کیب ئنا لس آباتی ءِ دا تابکاری نا زیم تیان رکھنگ کنرکھوک وڑ ڈول کروئی ءِ۔
انٹرنیشنل اٹامک انرجی ایجنسی بک آف انٹرنیشنل لاء نا شق نمبر 1.5 ئٹ نوشتہ ءِ کہ آسمانی و دیر ئنا آلودگی آن بیدس اوڑے ناجنگلی سہدار تا رکھنگ ءِ یخینی جوڑ کننگ پی اے ای سی نا ذمہ واری ءِ۔
شق نمبر 8 ئٹ نوشتہ ءِ کہ اسہ مائنز ئسے آن پیشن مروک ‘تابکار‘ گڑس پین جاگہ ئسے نا ریڈیو ایکٹو گند گڑس آن جتا افس، کانڑپٹنگ نا گڑس نا ڈغار نا زی آ اسہ بھلو کچ اس ساڑی مننگ آن زیات آن زیات ‘تابکار تجلہ‘ نا سوب مریرہ، اندا خاطر قانود ٹہیفوکادارہ تیا الّمیءِ کہ دا گڑا ءِ سائنسی بنماس آ یخینی کیر کہ ہرا کمپنی تے ‘ویسٹ مٹیریل منیجمنٹ‘ نا لائسنس تننگک اوفک دا گڑس آتےہند کننگ و تابکار تجلہ آتیان رکھ اکن الّمی گام ارفور۔
کمپنی نا ذمہ واری مرو کہ کانڑ آن خڑک علاقہ تا آباتی تا رکھ نہ بیرہ کانڑ پٹنگ نا وختا کننگے بلکن اسہ ہم علاقہ اسیٹ کانڑ نا بندمننگ آن گڈ ہم دا علاقہ نا مخلوق و او جاگہ نا ایب کیب ءِ تابکار تجلہ تیان رکھنگ نا کوشست کیر و مالو نا گڑس آتے کانڑ تیان کشیہکانڑ آتا صفائی کننگے و چیرزمین دیر آن ‘ہیوی میلٹز‘ نا ایسری کن دا علاقہ آتیٹ پلانٹس خلنگ مرے۔
جہان اٹ تابکاری و اوڑان مروک بھس کاریک:
26 اپریل 1986 ئنا سہب چرنوبل ایٹمی پلانٹ نا ریکٹر آ اسہ آزموندہ اس مننگ ئس کہ آزموندہ نا وختا اوڑے باسنی زیات مننگ بناءکرے ہرانا سوب اوڑے پلانٹ ئٹ باف مُچ مس ہرانا سوب ریکٹر تراک آن ترخا ہراٹی 30 بندغ ہند آ مرگ ئنا گواچی مسر۔
ریکٹر نا بھس مننگ نا سوب ایٹمی تابکاری چرنوبل نا رہی ئنا شار آتیٹ تالان مس و پلانٹ ئٹ خاخر لگا، بست و بندی کوالخواک ہیلیکاپٹر نا کمک ئٹ خاخر ءِ ایسر کننگ نا کوشست کریر ولے بے سہب مسر۔ شار ءِ خالی کننگ نا حکم تننگا و او جاگہ نا ہندیک اینواسکان واپس ہننگ کتور۔ تابکاری نا زیم آک تہو نا ذریعت یوکرین، بیلاروس، روس و دے ٹکی یورپ آن بیدس دے کہی یورپ نا بھلو بشخاسکان سر مس۔ ہزار آ باسک آتے تدینی نا ہند آ کمکاری کاریم تیکن رادہ کننگا ہرافک بھس مروک پلانٹس آتے ڈھکسہ تابکاری نا زیمآتے کم کننگ نا کوشست کریر ولے تیوہ غاک بے سہب مسر و ہرافک تعمیری کاریم تیٹ بشخ ہلکر دوارہ او ہم ناجوڑی نا گواچی مسر۔
جہانی احوال شینکاری ادارہ آتا و اقوام متحدہ نا حساب آتا رِدئٹ چرنوبل تدینی آن گڈ ریڈیائی لہر آتا زیم آتیان چار ہزار بندغ کینسرنا گواچی مسر۔ ایب کیب بست و بند نا رکھ ئنا ادارہ گرین پیس نا پارہ غان 2006 ئٹ مونا بروک رپورٹ ئٹ دعویٰ کننگاسس کہ اسہلکھ آن زیات بندغ دا تدینی آن زیمی مسر ہراٹی یوکرائن، روس و بیلا روس نا شاریک اوار ءُ۔
تابکاری نا سوب سوویت یونین چرنوبل نا رہی 30 کلومیٹر نا علاقہ ئٹ بندغی آباتی کن بھیم بش کروک پِن کریسس و گواچن ئٹ داڑانبھاز زیات علاقہ جوہری گند نا گواچی ءُ۔
تیوہ غا جہان ئٹ ایٹمی جلہو و اوڑان تابکاری زیم آتیان رکھنگ کن باہوٹی ہند ٹہیفنگک، ہرافتے فال آوٹ شیلٹر پاننگک۔ ریڈ کراسسوسائٹی کوْنا ادارہ غاک ہر ڈول نا تدینی تیتون مون تننگ کن ہر وخت تیار مریرہ ولے تیاری آن بیدس ہم او ہچس کننگ کپسہ انتیکہجوہری جلہو نا زیم آک تیاری آن زیات طاغتور مریرہ۔
ایسری
تیوہ غا جہان ئٹ جوہری پروجیکٹ آن پیشن مروک ‘ریڈی ایشن‘ آن او جاغہ نا بندغ آتے رکھنگ کن جتا ڈول نا رکھوک چم آتا بنست وبند کننگک کہ تابکار تجلہ آتیان تالان مروک ناجوڑی تیان رکھنگ مرے ولے بغلچر نا کانڑ آتیٹ گند گڑس آتے ڈرمب آتیٹ شاغیسہ دیر ئٹملوک یلہ کننگا ہرانا سوب گند گڑس چیرزمین دیر نا بشخ اس مریسہ ‘ہیوی میٹلز‘ و ریڈی ایٹڈ دیر نا سوب مننگ ءُ۔
ڈیرہ غازی خان و رہی ئنا علاقہ آتیٹ شاریک بون میرو، جغر نا کینسر، پف آتا کینسر، بک و ہڈ ئنا کینسر، مِلی شَل، موْن نا ٹیومر،ٹیوبر کلوسس، چُنا خننگ نا ویل، بدنی شَلی، روتینک آتا کینسر نا گواچی مننگ ءُ اگہ ڈیرہ غازی خان ئٹ پاکستان اٹامک انرجی کمیشننا پارہ غان جتا علاقہ تا مخلوق و ایب کیب ءِ یورینیم نا تابکاری زیم آتیان رکھنگ کن زوت گام ارفنگتئو گڑا بلکن تونسہ شریف، ڈیرہغازی خان و کوہ سلیمان ئٹ نا مخلوق برابر سَن کچ اسکان سرمننگ مریر۔