نجمہ بلوچ نا خود کشی
ٹی بی پی سرگپ
پاکستان بلوچ انسرجنسی ءِ ایسر کننگ کن جتاء پالیسی تے جوڑ کرینے، ہرافتا زہم تیان بلوچستان ئٹ ہڑدے ئی بنداو آ پوسکنا تدینیک ودی مننگ ءُ۔
بلوچستان نا تیوہ غاتیان ماندہ و شورش زدہ غا ضلع آواران نا علاقہ گیشکور ئٹ منہ دے مالو نجمہ بلوچ، ہرا اسہ خوانفوک اس ئس، وت کشی کرے۔ وت کشی نا سوب آک دا پاننگرہ کہ بلوچستان لیویز نا کارندہ نور بخش نا کنڈ آن نجمہ بلوچ ءِ پاکستان نا ملٹری انٹیلیجنس کن، بلوچ جہد آجوئی نا برخلاف کاریم کننگ کن بھاز بیوس کننگاسس و تڑی تننگاسس، ہرا نا سوب او وت کشی کرے۔
نجمہ بلوچ نا تدینی بلوچستان ئٹ دن انگا اولیکو تدینی اف بلکن ریاستی سروکی ٹی کاریم کروک ڈیتھ اسکواڈ ٹولی، ملٹری انٹیلیجنس و انٹر سروس انٹیلیجنس تون تفوک کارندہ غاک چرجوئی ئٹ دن انگا تدینی تیٹ اوار مسونو۔ دا ٹولی تے بلوچ راجی آجوئی نا تحریک ءِ ایسر کننگ کن اسُل یلہ ہلنگانے ہراڑان بلوچستان ئٹ بھیم بش کروک تدینیک ودی مننگ ءُ۔
بلوچ پارلیمانی ٹولیک، سول سوسائٹی گل آک، بندغی حق آتا ادارہ غاک دن انگا تدینی تیا چرجوئی ئٹ برانز نا کسر ءِ دوئی کریسہ بھاز خُلیس نا درشانی کننگ ءُ ولے حکومت بلوچستان و پاکستانی نا بنجاہی حکومت دا تدینی تے توننگ ئٹ بے سہب مسونو۔
دا تدینی تیان بلوچستان ئٹ بے جاراتی ودنگ ءِ ہرا اسہ وخت بھلو برانز ئسے نا سوب جوڑ مننگ کیک۔ پاکستان نا ریاستی ادارہ تے تینا پالیسی تیا دوارہ اُروئی مریک انتئے کہ دا پالیسی تیان بلوچ راجی تحریک ایسر مفرو بلکن پاکستان و بلوچ الس نا نیام ئٹ مُریک ودور و اوفتا ہمدردیک بلوچ راجی آجوئی تون تفوک مرور۔