اوغانستان و ایران نا نیامٹ شرہ انتکن زیات مس؟

الّمی خوانبو

اوغانستان و ایران نا نیامٹ تدوکا دے تیٹ شرہ داخہ در زیات مس کہ اسہ سیمی چوکی ئسے نا رہی آ اسٹ ایلو آ تُرند سم کاری آن کم آن کم مُسہ بندغ مرگ ئنا گواچی و کہیک ٹپی مسر۔

عرب نیوز نا اسہ جاچی تیدری ئسے نا ردئٹ اندن گمان مریک کہ دا جھڑپ نا روتہ غاک ہڑتوما ہمسایہ ملک آتا دیری مڈی تیا حق ئنا شرہ تون تفوک ءُ۔

یک شمبے نا دے احوالک بسر کہ ایرانی و اوغان سیمی رکھوک لشکر تا نیامٹ جنگ ئٹ کمبوتی بسونے و ہڑتوماک چِک و تاڑ ءِ کم کننگ کن ہیت کننگ ئٹ گٹ ءُ۔

جانچ ہلوک آتا پاننگ ءِ کہ ڈیہہ ئنا ملک آک، خاص وڑئٹ اوغانستان ہچ ءُ چِک و تاڑ ئسے نا حالیت خواپک۔ دا ڈول نا جھڑپ آتا بناء توفک نا نَل آن مریک دنکہ ایران ئٹ ٹہیفوک ساسولی سیمی چوکی آ تدوک دے تیٹ خننگا ولے دا جنگ ئنا ایسری دوارہ علاقائی طاغت آتا پارہ غان کس ئسے نا مُخ تفی آ مریک۔

دا سیمی جھڑپ ایرانی صدر ابراہیم رئیسی نا ہمو بیان نا منہ دے آن گڈ مس ہراٹی او طالبان تے پامدار کریسس کہ او اسٹی دیائے ہلمند آ ایران نا دیر نا حق آتے لتاڑپ، دنکہ 1973 ئٹ ہڑتوما پارہ غاتا معاہدہ ئٹ ٹہیفنگاسس۔

دریائے ہلمند اسہ ہزار کلومیٹر آن زیات شابیت ءِ و اوغانستان آن ایران نا گیاوان دے ٹکی علاقہ آتیٹ وہیک، کابل نا پارہ غان بجلی ودی کننگ و کشت کشاری زمین تے سیر دیر کننگ کن ڈیم ٹہیفنگ نا فیصلہ نا سوب آن تہران بھیم بش کننگ نا سوب ءِ۔

ایران زوت سال آتیٹ دیر نا کمبوتی نا زیات مروک ویل نا گواچی ءِ۔ دا حالیت 2021 ئٹ بزغر تا برانز ءِ ودی کرے۔

ایران نا محکمہ مُد پارے کہ اسہ گمان ئسے نا رِدئٹ 97 در سد ملک ءِ اسہ نہ اسہ کچ ئسے آ خشک سالی  نا مونتس ءِ۔ ہلمند نا دیر نا بشخنگ نا معاملہ غا 18 مئی آ اوغانستان نا قائم مقام وزیر خارجہ امیر خان متقی و اونا ایرانی ہم منصب حسین امیر عبداللہیان نا نیامت گپ تران مسوسس۔

ہفتہ نا دے اسیکہ وا امیر خان متقی کابل ئٹ ایرانی سفیر حسن کاظمی تون اوڑدئی کرے ہراٹی دیر ئنا ویل تون اوار ہڑتوما پارہ غا تعلقداری تیا خیال تا درشانی کننگا۔
اوغان وزارت خارجہ نا نائب ترجمان ٹوئٹر آ پارے کہ ‘وزیر خارجہ دا ہم پارے کہ ہڑتوم آ ملک آتا نیامٹ ویل آتے گپ تران و بشخنداری تون گچین ڈول اٹ ایسر کننگ مریک۔’

امیر خان متقی ہفتہ نا بناء ئٹ پاریسس کہ طالبان 1973 نا معاہدہ غا سلوک ءِ۔ او مُستی پارے کہ ‘اوغانستان و ڈیہہ ئٹ مرغن خشک سالی آن بے پام مننگ مفک۔’

اوغانستان ہم چرجوئی تون مسٹمیکو سال خشک سالی تون مون تننگ ءِ۔ ملک ءِ جہانی کمکاری کمیٹی نا پارہ غان شینک کروک 2023 نا ہلہلہی چمشانکی لڑ ئٹ مسٹمیکو ٹِک آ تخنگاسس۔

تیدری ئٹ دا ہیت آ پام تننگاسس کہ امر مُد نا بدلی اوغانستان ئٹ نیستی ءِ پین زیات غنجل کیک۔

سیستان و بلوچستان نا مخلوق ءِ پاریسہ امیر خان متقی پاریسس کہ ‘اوغانستان نما ڈکھ دڑد ئٹ اوڑدہ ءِ۔”

بیان تا منہ دے آن گڈ دیر ئنا بشخنگ آ ہڑتوما ملک آتا نیامٹ ئٹ شرہ زیات مس۔

طالبان اوغدیدار آک ایران آ دوبہ خلکنو کہ ہفتہ نا سُہب اوغانستان نا صوبہ نمروز و ایرانی صوبہ سیستان و بلوچستان نا سیم تون اوار اسیکہ ایلو پارہ غان سُم کاری کننگا۔

دیر نا حق آ اوغان ایران شرہ ئٹ ودکی سنہ 2021 ئٹ طالبان نا اوغانستان ءِ دوٹی ہلنگ آن گڈ ہڑتوما حکومت آتا نیامت ہمو ایلو ویل آتیا شرہ تا وختا مونا بسونے ہرافتیٹ سیم آ مالو مروک جھڑپ آک و اوغان باہوٹی تیتون بے دادی نا احوال آک ہم اوار ءُ۔

دنکہ ایران سرکاری رِدئٹ طالبان بست و بند ءِ منیپک ولے او اوغانستان نا پوسکنا حکمران آتیتون تعلقداری تے برجاء تخوک ءِ۔
باہوٹی تیکن اقوام متحدہ نا ہائی کمشنر نا 2022 نا حساب آتا رِدئٹ کم و وَد شش لکھ اوغان پاسپورٹ تخوک آک ایران ئٹ ہندی ءُ و کم و وَد ہفت لکھ ہشتاد ہزار باہوٹی نا ڈول ئٹ رجسٹرد ءُ، و بیست و یک لکھ اوغان بیدس کاغد ہندی ءُ۔

پُوسکنا حوالک

بلوچ راجی مچی نا بشخ مرِسہ جہان ءِ نشان ایتبو کہ نن زندہ و شرفدار ءُ راج ئسے اُن۔ ماہ رنگ بلوچ

بلوچ راج 28 جولائی نا دے گوادر ئٹ سرمریر و جہان ئے کلہو ایتر کہ نن زندہ و خوددار...