کتاب: غلامی اور نسل پرستی | ڈاکٹر مبارک علی – اختر بلوچ

کتاب: غلامی اور نسل پرستی

نوشتکار: ڈاکٹر مبارک علی

چشمانک: اختر بلوچ

دی بلوچستان پوسٹ

دیہاڑ ئٹی ننے دا گڑا نظر بریک کہ اسہ ادارہ ئس اسہ مچی و ٹولی سے نا سواد آتے پورو کننگ کن جوڑ مریک، ہراتم ادارہ تا گرج آک ایسر مسر گڑا مدان مدان آ ہمو ادارہ چٹیسہ کاہک۔ اوفتا دیہاڑ ئٹی ورد و گپ آک سلیرہ، اندا سوب آن دا سوج بش مریک کہ ادارہ غاتا دود آتے خواننگ انتئے المی ءِ؟ گڑا پارہ کہ جہان نا تہذیب آک تینا کڑد آتے ایسر کننگ آن گڈ چٹار۔

پارہ چاگڑد ہراتم بدل مریک گڑا پوسکنو دود جوڑ کننگک، گڑا دا ارفنگک کہ دا انتئے بدل مسر؟ غلامی تو اندا ہم مسنے کہ بادشاہ یا حکمران تے ہراتم گرج مسنے گڑا اوفک مذہبی، اخلاقی و بندغی حق آتا بنداو ءِ جائز پاریرہ، ہراتم کہ نن دیہاڑ ئٹ پٹ و پول کینہ کہ غلام آک جہاں نا شونداری ٹی ہم بشخ الکنو گڑا ننے ارا گڑا سما تمک۔

*اوفتا نا انصافی تے پاش کننگک ہرا اوفتے تون مسر۔
*اوفک امر قربانی تسر، تہذیب آتے مون آ اتنگ کن امر خواری و کوشست کریر۔

بندغ نا بولی و دود و ربیدگ بدل مریک ولے رنگ و نسل بدل مفک ہندن غلامی نا گواچی افریقہ نا گیشتر بندغ آک مسنو۔ نسل پرستی و غلامی نا تعلقداری امپیریل ازم تون ءِ، یورپی راج آک ہراتم ایشیاء، افریقہ، امریکہ، اسٹریلیا و نیوزیلینڈ ئٹ تینا کالونی جوڑار و کوزہ کریر، اوفک “بورو نسل” نا نظریہ غاتے سوگو کریر۔

راج آتے نسلی کمتری نا مارشت ہموتم مریک ہراتم اوفتا سیالی فاتح و مفتوح نا مریک۔ غلامی و چاگڑد جہان نا تہذیب تیٹی دود مسنو، دا غلام آک جنگ ئٹ بندی مسنو، یا ہمو بندغ آک ہرا غلام آتا کاروبار ءِ کریرہ گڑا اوفک غلام آتیان تینا اُرا، کارخانہ و فوجی ٹولی تا کاریم تے الکرہ، غلام آک پدا زاتی زند ئٹ اوفتا میراث ئسرہ۔

چاگڑد ئٹ غلام آتیا زیمک دا ڈول ئٹ ئسرہ

*غلام جوڑ مننگ آن گڈ اوفتے کن شرف سلتوکہ
*اوفتے تون نیاڑی ہم ئس ہرافتے تون ہر وڑ ئنا ظلم مسکہ۔
*افریقہ نا بندغ آتے تون خاص وڑ ئٹ “مون و پیہن” رنگ ئنا فرق تخنگاکہ۔
*حکمران آک جان ئٹ سست ئسر اوفتا کاریم تے غلام آک کریرہ۔
*زیات غلام اتنگ نا سوب آن ہمو جاگہ نا غریب آتیکن کاریم سلتوکہ
*زبان تا زی آ زہم تماکہ کہ ہر سن ئنا بندغ آتے مار پاریرہ۔

افریقہ و غلامی

گیشتر جہان ئٹ ظلم افریقہ براعظم تون مسنے، اوفتا بندغ آتے خواہوک آک بھاز مسنو اوفتا سخت جان و کاریم تا سوب آن اوفتے آن ہر وڑ ئنا جنگی، زرگزرانی، رکھ و کشت و کشاری نا کاریم الکرہ۔

یورپی کوزہ گیر نا اولیکو مسخت اوفتا خیسن، چاندی و نہادی آ گڑا تیا کوزہ کننگ ئس۔ ارٹمیکو مسخت ڈغار ءِ کوزہ کننگ و پدا غلام آتیان ڈغار تا کاریم النگ۔

سوج داڑے دادے کہ افریقہ اوفتے انتئے جوان لگا؟ دا سوب آن کہ اوفتے ٹی قبائلی نظام بھاز ئس و اوفتے ٹی سیوتی و اواری الو۔ پدا غلام جوڑ کننگ آن پد 1820 ٹی اوفتے ٹی نرینہ و نیاڑی تا ود و کم 10 یا 11 ملین نا کچ بندغ پوسکنا جہان ٹی ایسر۔

غلام آتا زند

غلام خواجہ نا میراث ئس اودے ہر وڑ ئٹ خواجہ کاریم ئٹ ایسکہ
مثیل
* اوفتا زی آ سزا تخوک ئس۔
* اوفتا فعل آتیا ہر وڑ ئٹ نظر تخنگاکہ۔
* غلام آتے اسہ جاگہ غا مچ مننگ کن التورہ
* بغاوت کننگ نا سوب آن اوفتے کھسفیرہ۔
* خاہوت الو تا اوفتا وخت و وخت کشت و کشار کروکو نیاڑی سے تون برام مسکہ۔
*اوفتا چناک سودا مسرہ۔
* اوفتا مذہب ءِ بدل کریسہ اوفتے عیسائی جوڑ کننگاکہ۔
*کننگ نا مرضی الو تا۔
* اوفتا بولی ءِ چٹفنگ کن اوفتیتون انگریزی ٹی ہیت کریرہ۔
* غلامی نا سوب رنگ ئنا بنداو و نسل پرستی آن بناء مس و غلامی آن گڈ برجاء مس۔

غلام بغاوت و میرون

منہ تدینی رومیو، اسپارٹکس و 1970 نا دور ئٹ فرانسی کالونی ڈومینک ئٹ مسر، ہرا کہ بھلا بھلا سلطنت آتے سرفیرہ، ہرافتا سوب غلام آ تیتون ظلم کننگ نا ئس۔
پدان اوفک جنگل و مش تیٹی ہنار و امیڑے تینکن جاگہ جوڑ کریر پدا مزاحمت کریر ہرادے میرون (maroon) پاریرہ۔
امریکی ٹی “دلدلی” علاقہ، جمیکا ٹی میرون آک تا مش تیٹی ئسر، میرون تیٹ تینا رکھ ئکن ہر وڑ ئٹ بیدار ئسر۔

اوفتا کننگ نا وڑ و ڈول مچھی نا شکار، میوہ بوچ و درخت آک ئسر۔ نیاڑیک مچھٹ ئسر ولے اوفک پیہن سلی تا کشت و کشار تیا جلہو کریرہ ” ریڈ انڈین” نا زالبول تے بیگواہ و برام کریرہ۔

غلامی نا ایسری

غلامی ءِ ایسر کننگ نا بناء ءِ برطانیہ کرے، دیہاڑی کتاب آک پارہ کہ برطانیہ و یورپ نا بندغ آک غلام آتا زی آ ظلم و نا انصافی تیا است ہسونی شان تسرہ و غلامی ءِ ایسر کننگ نا کوشست کریر۔ منہ بندغ غلامی ءِ عیسائیت مذہب آن چپ تکارہ، گڑاس پارہ غلام آتا بغاوت ئٹ گیشتری بس، اگہ جنگ ئس غلام آتون مسکہ گڑا ہڑتوما پارہ غاتیا نسخان رسینگاکہ، بھاز آک کوزہ گیر تا برخلاف ہر وڑ نا جہد و قربانی نا کوشست کریر پدا وخت ئس دنو بس کہ 1792 آن 1799 اسکان برطانیہ ٹی غلام آتا برخلاف جنز آک اسل نزور مسر۔
1804 ٹی کوشست آک گیشتر مسر ولدا 1807 ٹی برطانیہ غلامی آ رکھ خلک و 1833 ٹی تیوہ غلامی ایسر مس۔

نسل پرستی

* نسل پرستی امر کہ ارے او تاغت و فرق نا بنداوہ غان جوڑ ءِ۔
* فرو ہرا جوزہ یا غصہ نا سوب آن خار کننگ نا بنداوہ غان جوڑ ءِ۔
*راج و ریچ آتے ٹی ارا وڑ ئنا تعلقداری ءُ۔
1: نا پُہی
:بھیم و اڑز
اینو نا دورباری ٹی ہم مسٹمیکو جہان نا ملک آک نسل پرستی نا گواچی ءُ۔