آپریشن زرپہازگ نا اودیم زیم آک
ٹی بی پی سرگپ
گوادر ئٹ چین آ پد مہ پد جلہوک مننگ ءُ، مجید بریگیڈ نا چار جلہو کار مئی اِرا ہزار نوزدہ ٹی گوادر ئٹ پرل کانٹینینٹل ہوٹل آ جلہو کریسہ بیست و چار گھنٹہ آن زیات ہوٹل آ کوزہ کریر، اگست اِرا ہزار بیست و یک ئٹ چینی انجینئر آتا گاڑی آ اسہ پین جند ندری جلہو اس کننگا و برجاء دے تیٹ مجید بریگیڈ نا اِرا ”جند ندر“ چینی انجینئر آتا قافلہ ءِ جلہو ئٹ ٹک کرینو۔
بلوچ راجی آجوئی نا جنز ئتون تفوک سلہہ بند ادارہ و سیاسی جماعت آک چرجوئی ئٹ دوبہ خلنگ ءُ کہ چین ئنا کمیونسٹ حکومت بلوچ راجی آجوئی نا جنگ ءِ ایسر کننگ کن پاکستان نا کمک ءِ کننگ ءِ۔ آجوئی دوست ادارہ غاک بلوچستان نا لٹ و پُل و بلوچ نسل کشی ٹی چین ءِ پاکستان نا ہمکوپہ گوندرہ۔
پاکستان نا حکومت چرجوئی ئٹ درشانی کننگ ءِ کہ بلوچستان سرمایہ کاری کن رکھوک ڈیہہ ئسے ولے چین و اونا منصوبہ تیا پد مہ پد جلہوک اندا پاش کننگ ءُ کہ بلوچستان ئٹ بلوچ راج نا منشاء غان بیدس ہچ وڑ نا سرمایہ کاری اس رکھوک اف۔
بلوچ لبریشن آرمی آپریشن زرپہازگ نا مسٹمیکو جلہو آن گڈ چین ءِ تڑی تسنے کہ اگہ چین نوَد دے ئٹ تینا ڈٹ بندی تے ایسر کریسہ بلوچستان آن پیش تمتو گڑا بلوچ لبریشن آرمی چین ئنا برخلاف تینا جلہو تا کچ و ترندی تیٹ گیشتر ودکی ہترو۔ بلوچ لبریشن آرمی نا برجاء سال تیٹ چین آ جلہو تا دیہاڑ آن نن دا نتیجہ ءِ کشنگ کینہ کہ اگہ بلوچستان ئٹ چین ئنا ڈٹ بندیک برجاء مسر گڑا چینی مفاد آتیا بروک وخت ئٹ جُوان ڈول ئٹ جلہوک برجاء مرور۔
پاکستان اِرا دہائی آن برجاء راجی آجوئی کن بلوچ نا انسرجنسی ءِ ایسر کننگ ئٹ بے سہب مسنے۔ بلوچ ویل ءِ ایسر کننگ آن بیدس بلوچستان ئٹ جنگ برجاء مرو و پاکستان نا دعویٰ تیان چھپ بلوچستان ئٹ اسہ ڈیہہ ئسے نا ہم سرمایہ کاری رکھوک مفرو۔ بلوچ راجی تاغت آتیتون مون پہ مون گپ و تران ءِ بناء کننگ آن بیدس چین و جہان نا ایلو ڈیہہ تا سرمایہ کاری و اوفتا راجی مفاد آک بلوچستان ئٹ رکھوک مفرور۔