بلوچی میوزک پروموٹر سوسائٹی نا پارہ غان ادارہ ثقافت بلوچستان نا کمک ئٹ بلوچی بولی نا بڑز کردار نا خلقی شئر پاروک ناکو فیض محمد بلوچ نا یات ئٹ یاتگاری مجلس ئس ہڈ تنگا ہراٹی بلوچی بولی تون خڑکی تخوکا تا بھلو کچ ئس ساڑی مس۔
مجلس آن ڈائریکٹر کلچر داؤد ترین، اسحاق خاموش، اسحاق رحیم، پروفیسر ڈاکٹر اے آر داد بلوچ، گلزار گچکی، رمضان نوشیروانی، واجہ عبداللہ بلوچ، فرزند تاج محمد تاجل و ایلوفک ناکو فیض محمد بلوچ نا خذمت آتے دروت ندر کرسہ پاریر کہ ناکو فیض محمد دگرزہی نا ودشت 1901 ئٹ مس و اونا کذیت 6 مئی 1982 ئٹ مس، او بلوچی خلقی زیمل کار و شئر پاروک ئس اس۔
او پارے کہ ناکو فیض تیوہ پاکستان ئٹ بلوچی خلقی شئیر تا ربیدگی ساز نا اسہ پوسکن و گچین ڈول ءُ درستی راستی ئس کرفے ہرادے تیوہ جہان ئٹ پن ئس رسینگا۔
او بلوچی و فارسی ٹی زھیروک نا ساز ءِ تینا وڑٹ دروشم تسکہ، ناکو فیض محمد بلوچ بلوچی شئیر پاروک آتا بابت ئٹ اسہ بھاز بھلو پن ئسے ہرانا فن ہر دورباری ٹی تینا دیمروی ءِ کرسہ کرو۔
فیض محمد نا شئیر پاننگ نا ڈول و موسیقی نا تینا وڑ ئس اس ہرادے اینو ام انداخس پنی و است خواہی دوئی ءِ ہراخس مالو نا دور ئٹ ئس۔ فیض محمد تینا وڑ ئنا اسٹ انگا شئیر پاروک ئس ہرانا شئیر پاننگ نا ڈول (دھنبورہ) تون اوار بھاز پنی ئس و او داسکان است وڑوک ءِ۔ زھیروک اونا چاہند جوڑ مس۔
نن تکنہ کہ اونا سوب آن اینو ننا دود و ربیدگ اسہ کچ ئسے اسکان رکھوک و زندہ ءِ۔ فیض محمد بلوچ درزن آ ملک آتیٹ تینا فن ئنا جادو ءِ بش کرے و ہر ہند آ تینا فن ئنا سوب آن سرخرو ءِ۔ پنی آ فنکار فیض محمد نا کہیی پنی آ شئیر تے عابدہ پروین، محمد علی شیکی، سلیم جاوید، پروین خانم و ایلوفک تینا توار ئٹ پاریر۔
بلوچی میوزک پروموٹر سوسائٹی نا صفت ئٹ ہیت کروک آک پاریر کہ دا سوسائٹی 2018 ئٹ اندا مسخت ئٹ جوڑنگاسس کہ بلوچی بولی نا فنکار آتے اوفتا ہمو ہند ءِ تننگے ہراڑان فن و فنکار تینا فن ئٹ پین جوانی ہتسہ بولی، ادب، لبزانک، میوزک، فن ئٹ پین زیبائی ہتسہ بلوچی بولی نا شابیت تننگ کن کاریم کننگ کیر۔
او پاریر کہ بلوچی پروموٹر سوسائٹی تینا مچہ مڈی تون مرسہ فن موسیقی نا دیمروی کہ جوان کاریم کننگ ءِ ہرانا سوب آن دادے بلوچی بولی تون خڑکی تخوکاک دوست تخرہ ولے گرج دا گڑا نا ءِ کہ خلقی میرات و ربیدگی بولی تا شونداری کن حکومت تینا ذمہ واری تے سر ایتے۔