سال 2023 ئٹ تیوہ بلوچستان ئٹی سلہہ بند کاریم تیٹ پاش ءُ ودکی خننگ ئٹ بس، ہراٹی بلوچ آجوئی دوست سلہہ بند گل آتا پارہ غان 612 جلہو کننگا۔ دا رپورٹ بلوچستان لبریشن فرنٹ (بی ایل ایف)، بلوچ لبریشن آرمی (بی ایل اے)، بلوچ ریپبلکن گارڈز (بی آر جی)، بلوچ نیشنلسٹ آرمی (بی این اے)، بلوچ لبریشن ٹائیگرز (بی ایل ٹی)، و یونائیٹڈ بلوچ آرمی (یو بی اے) تون اوار ایلوفتا کاریم تا اسہ جمعی جاچ اس فراوان کیک و اوفتا انفرادی و اشتماعی زیم تے پاش کیک۔
جلہو و زیمک:
خدو جمعی وڑئٹ 612 جلہو مس۔ جلہو تیٹ پاکستانی لشکر، انٹیلی جنس ایجنسی و اوفتیتون تفوک بندغ آتیتون اوار اوفتا ہندی ’کمک کار‘ تے ٹک کننگ نا سوب 557 آن زیات مرگ و 423 آن زیات ٹپی مسر۔ دا جلہو تیٹ بلوچستان نا 26 ضلع زیمی مسر ہرافتیٹ بھلا شار، خلق و مُر ئنا علاقہ تیتون اوار 134 جتا علاقہ اوار ءُ۔
بلوچستان لبریشن فرنٹ:
خدو بلوچستان لبریشن فرنٹ (بی ایل ایف) 284 جلہو تیتون اوار بلوچستان ئٹ تیوہ غاتیان زیات جلہو تا ذمہ واری ءِ ارفوکا گل جوڑ مس، بی ایل ایف نا ردئٹ دا جلہو تا سوب 287 آن زیات مرگ، 161 آن زیات پاکستانی لشکر نا کارندہ و اوفتیتون تفوک بندغ آک ٹپی مسر۔ جمعی وڑئٹ 76 آن زیات تنصیبات آتے نسخان رسینگا۔ گل 12 ضلع ئٹ کارروائی تا ذمہ واری ءِ ارفے ہرافتیٹ نود درسد آن زیات جلہوک پنچ خاص ضلع تے اسکان ئسر۔ 12 ضلع نا تہہ ئٹ 54 ہند آتیا کارروائی کننگا، ہرافتیٹ 18 بندغ ءِ دزگیر ہم کننگا۔ پاننگ نا لائخ ہیت دادے کہ بی ایل ایف ءِ تیوہ غا سال ئٹ 35 سرمچار آتا نسخان ہم ارفوئی تما، ہرا غٹ آجوئی دوست گل آتیٹ کل آن زیات ئس۔
بلوچ لبریشن آرمی:
بلوچ لبریشن آرمی (بی ایل اے) شاری جلہو تیا زور تریسہ 18 ضلع نا 67 علاقہ ئٹ شابیت کاریم تا درشانی کرے۔ 247 کارروائی کننگا، ہرافتا سوب آن 213 آن زیات فوجی کارندہ و اوفتیتون تفوک بندغ و ہندی کمک کار آک مرگ ئنا گواچی اندن دا جلہو تا سوب آن 264 آن زیات فوجی ٹپی مسر، اندن 206 تنصیبات آتے نسخان تننگا۔
بی ایل اے اِرا ’جند ندر‘ جلہو کرے ہرافتا سوب آن بھلو کچ ئسے آ پاکستانی لشکر ءِ نسخان ارفوئی تما، ہرافتیٹ چینی انجینئرز و پاکستانی ڈھکوک ادارہ تا بھلا افسر آک اوار ئسر۔ تیوہ غا سال ئٹ بی ایل اے ءِ 14 سرمچار تا نسخان ارفوئی تما ہرافتیٹ مُسہ ’جند ندر‘ باسک ہم اوار ئسر۔ بی ایل اے نا دا کارروائی تیٹ ہرنائی کون آ علاقہ تیٹ کیہی دے تے اسکان کسر تا گھیڑ و بند کننگ اوار ئس۔ گیشتر دا کہ گل 17 بندغ ءِ دزگیر کرے، ہرافتیٹ فوجی کارندہ غاک ہم اوار ءُ، و ہائی الرٹ فوجی پوسٹ آتے ٹک کریسہ اوفتیا کوزہ کرے۔ دا کاروائیک بی ایل اے ءِ بلوچستان ئٹ کل آتیان بھیم بش کروک و لائخی تخوک ءُ گل اس جوڑ کیرہ۔
ایلو سلہہ بند گل آک:
بلوچ ریپبلکن گارڈز، بلوچ نیشنلسٹ آرمی، بلوچ لبریشن ٹائیگرز، یونائیٹڈ بلوچ آرمی و ایلوفک جمعی وڑئٹ 81 جلہو تا ذمہ واری ءِ ارفیر۔ اہم کارروائی تیٹ بی این اے نا پنجاب ئٹ جعفر ایکسپریس ءِ ٹک کننگ و بی آر جی نا پارہ غان سندھ (خیرپور) و پنجاب نا بست و بند آ ڈیرہ غازی خان ئٹ جلہو تا ذمہ واری ارفنگ اوار ئس۔ دا گل آک جمعی وڑئٹ 49 فورسز کارندہ و اوفتیتون تفوک بندغ تے مرگ ئنا گواچی و 60 آن زیات ٹپی کریر اندن 58 تنصیبات آتے نسخان تننگ و چار بندغ ءِ دزگیر کننگ نا ذمہ واری ارفیر۔ دا تدینیک 11 ضلع ئٹ تالان 15 علاقہ ئٹ مسر۔
بی ایل ایف، بی ایل اے و ایلو گل آتا کاریم تا نیامٹ جاچ:
خدو، بلوچستان لبریشن فرنٹ غٹ جلہو آتیان کم و ود 46.41 درسد نا ذمہ واری ءِ ارفے، اندن بلوچ لبریشن آرمی کم و ود 40.36 درسد جلہو تا ذمہ واری ءِ ارفے۔ دا ہڑتوم آ گل آک جمعی وڑ ئٹ رپورٹ کروک غٹ جلہو تیان کم و ود 86.76 درسد نا ذمہ واری ءِ ارفیر۔ ایلو سلہہ بند گل آک بلوچ ریپبلکن گارڈز، بلوچ نیشنلسٹ آرمی، بلوچ لبریشن ٹائیگرز، یونائیٹڈ بلوچ آرمی و ایلو ٹولیک 13.24 درسد جلہو تیٹ بشخ ہلکر۔ دا کچ آن گمان کننگ مریک کہ بلوچستان ئٹ برجاء شورش ئٹ اینو ہم بی ایل ایف و بی ایل اے تیوہ غاتیان زیات پاش آ گل آک ءُ۔
سال 2022 و 2023 ئٹ جمعی کاریم تا جاچ:
سال 2023 ئٹ بلوچ سلہہ بند گل آک تینا کاریم تے ترند کریر، جمعی جلہو تا کچ جوانو ودکی اسیتون اوار 612 اسکان سر مس، ہرا تدوکا سال ئنا 475 نا مون ٹی 28.42 درسد ودکی ءِ پاش کیک۔ دا کچ ئٹ 557 آن زیات مرگ آک اوار ءُ (سال 2022 نا 804 کہوک آتا کچ ئٹ 30.94 درسد کمبوتی) 423 ٹپی و تنصیبات آتا نسخان تیٹ جوانو ودکی اس مس، ہرافتا کچ 340 آن زیات اسکان سر مس و 2022 ئٹ رپورٹ کروک 98 آن زیات نا کچ ئٹ 246.94 درسد ودکی ءِ پاش کیک۔ کارروائی تا علاقہ تیٹ 26 ضلع نا شار و مُر ئنا علاقہ غاک اوار مسر ہرافتیان زیمی مروک علاقہ تا کچ 134 اسکان سر مس۔ خدو بلوچ سلہہ بند گل آتا جانی نسخان تیٹ 50 درسد کمبوتی خننگ ئٹ بس۔
