تربت ئٹ زوراکی ئٹ بیگواہ بندغ تا خاہوت آتا برانزی کیمپ ضلعی بست و بند نا دفتر نا مونا چارمیکو دے ہم برجاء مس۔
تولوک برانز ئٹ حق دو تحریک، بی ایس او نا مسکوہی راہشون تیتون اوار سیاسی و چاگڑدی جہدکار آک ہمکوپئی نا درشانی کریر۔
بلیدہ تون اوار ضلع کیچ نا جتاء علاقہ تیان بیگواہ بندغ تا خاہوت آک تدوکا چار دے آن تینا بندغ تا یلہ کننگ کن ضلعی بست و بند کیچ نا دفتر نا مونا تولوک برانز کننگ ءُ۔ برانز ئٹ بلیدہ غان تعلقداری تخوک بیگواہ مسلم عارف، فتح میار، جان محمد بلوچ نا خاہوت آتیان بیدس آپسر تربت آن تعلقداری تخوک بیگواہ جہانزیب فضل، پیدارک آن تعلقداری تخوک میران حسین، سمیر نعمت اللہ بلوچ، شے کہن نا ہندی ڈاکٹر رفیق بلوچ، اندا وڑ نثار کریم، حیات سبزل، و ولی خان نا خاہوت آک ہم اوار ءُ۔
تولوک برانز نا چارمیکو دے بی ایس او نا مسکوہی کماش ظریف رند، حق دو تحریک نا وفد ضلعی کماش حاجی ناصر پلیزئی، مولانا نصیر احمد، سعید جمعہ، صادق فتح، داد جان رند، و ایلوفک خاہوت آتا کیمپ ئنا دورہ کریسہ اوفتیتون ہمکوپئی نا درشانی کریر۔ اندن تولوک برانز ئٹ بی ایس او پجار نا ضلعی صدر یاسر بیبگر و چاگڑدی کاریم کروک حمید بلوچ ہم ساڑی ئس۔
برانزی کیمپ ئٹ تولوک خاہوت آتا خواست ءِ کہ اوفتا بیگواہ بندغ آک اگہ ڈوہ اس کرینو گڑا اوفتے ملکی راہبند و قانود نا ردئٹ عدالت آتیٹ مونا ہتنگہ، زوراکی ئٹ بیگواہ کننگ ملکی راہبند و قانود نا برخلاف ءِ ہرا ننے قبول اف و نن دانا برخلاف جہد کریسہ کرون۔