پشتون تحفظ موومنٹ نا سروک منظور پشتین “پشتون راجی جرگہ” ٹی ہیت کرسا پارے کہ پاکستان نا ساڑی آ قانود ہمو فرنگی قانود ءِ ہرادے انگریز آک جوڑ کریسر، انتئے کہ او داڑے حکمران ئسر و اوفک دا کوزہ کروک ڈغار نا بندغ آتیکن اسہ قانود اس جوڑ کریر۔
او پارے کہ ہمو قانود اینو ہم داڑے ارے و داٹی اصلاح نا ہچو گنجائش اف۔ مسکوہی وزیراعظم تینٹ پائک کہ او ہرا قانود آتے جوڑ کرے او کل پنڈی نا لشکری بنجاہ (جی ایچ کیو) آن بسرہ۔ نن جرگہ آن خواست کینہ کہ او دا بارث ئٹ فیصلہ کیر کہ پشتون آتا ساہ امر رکھنگ مرے۔
منظور پشتین پشتون علاقہ آتیان فوج ءِ کشنگ نا خواست کرے۔ او جرگہ ٹی اوار مروکا تیان خواست کرے کہ او فیصلہ کیر کہ فوجی و طالبان تومکا تہ علاقہ آن کشنگ مرے انتئے کہ اندا علاقہ ٹی بے ایمنی تالان کننگ ءُ۔
او پارے کہ پشتون راج ءِ فوج، آئی ایس آئی ،ایم آئی “گُڈ طالبان” و “بیڈ طالبان” دا پنچ ءِ دہشت گرد تنظیم ڈیکلییر کیر۔
منظور پشتین پارے کہ قبائل آتا بھلا تے دا فیصلہ کروئی ءِ کہ “ڈیورنڈ لائن” پشتون آتیکن ہچ حیثیت تخپک۔ ڈیورنڈ لائن نہ تو پشتون آتیکن قانودی حیثیت تخک و نئے کہ سرکاری حیثیت۔ دا سیم ہن و بر و تجارت کن اندن ملوک مرے امر کہ مہالو اس تاکہ پشتون آتا نیام ئٹ ہچو فرخ مف۔