چارٹسٹ تحریک اخس سرسہب ئس؟ – ڈاکٹر مبارک علی | برناز بلوچ

چارٹسٹ تحریک اخس سرسہب ئس؟

ڈاکٹر مبارک علی | مٹ: برناز بلوچ

دی بلوچستان پوسٹ

چارٹسٹ نوزدہ میکو کرن ئٹ برطانیہ ٹی مزور آتا پارہ غان چلیفنگوکا اولیکو السی تحریک ئس۔ دا تحریک ئٹی خواری کشوک تپہ نا پارہ غان انت خواست مونا ہتنگاسس، دا اخس سرسہب ئس و دا تحریک نا پدندارہ انت ئس؟

انگلستان ئٹ جمہوری ادارہ غاک مدان مدان آ جوڑ مرسا کریر۔ بنائی دور ئٹ لس مخلوق ءِ جمہوری حق آک رسینگتوسر۔ ہرافتیکن اوفک چرجوئی ئٹ جہد کریر، تحریک و برانز آتا وسیلہ ئٹ تینا حق آتے دوئی کریر۔

عہدِ وسطیٰ نا انگلستان ئٹ پارلیمنٹ نا باسک آتیکن گچینکاریک مسرہ۔ گچینکاری حلقہ غاک محدود مسرہ۔ تنیا صاحبِ جائیداد ءِ ووٹ تننگ نا حق ئس۔ ووٹنگ ڈھکوکائی متوکہ بلکن دُو ءِ بڑز کرسا ووٹ تننگاکہ۔ گچینکاری نا دے اکن امیدوار ووٹر آتے بیئر و چیز (Beer & Chees) نا سینڈوچ ہم تسکہ۔ ہرا ووٹر آک پیر ءُ مسرہ، اوفتے بگھی تیٹی تُولفسہ ہتننگاکہ۔ گچینکاری تیٹی متوسط تپہ و لس الس ءِ ووٹ تننگ نا حق الو۔

صنعتی انقلاب برطانیہ نا چاگڑد ءِ چٹ مٹ کرے۔ شار آتا آبادیک ودّار ولے پارلیمنٹ ئٹی اوفتیکن ہچو سیٹ (seat) الو۔ متکن ئنگا گچینکاری حلقہ آتا آبادی کم مسوسس۔ ولے پارلیمنٹ ئٹی دافتیکن سیٹ مسکہ۔ دافتے Rotten Borougs پاریرہ، ہراڑے بھلا بندغ آک (اُمراک) اڑزانی ئٹ گچینکاری تے کھٹارہ۔

1789ء نا فرانسیسی انقلاب و نیپولین نا جنگ آتا سوب انگلستان نا سیاست ہم زیمی مس۔ صنعتی انقلاب ورکنگ کلاس ءِ ودشت تس۔ ہرافک ٹریڈ یونین آتا وسیلہ ئٹ تینا حق آتیکن جہد کریر۔ حکومت دافتا برانز آتے بھاز بے رحمی ئٹ لتاڑ تس۔ 1817ء ٹی مانچسٹر نا اسہ جلسہ اسیٹی فوج مزور آتا قتلِ عام ءِ کرے۔ دیہاڑ ئٹ دا تدینی پیٹرلُو نا پن آ پنی ءِ ۔

داڑان بیدس کہ السی تحریک آتے لتاڑنگا ولے چاگڑد ئٹ داسا پورژوہ تپہ سوگو مننگ ئس، ہرافتیتون تعلیم و دولت تومکا ئسر۔ ہندا خاطران اصلاحات آتا وسیلہ ئٹ گچینکاری تے مٹ کننگا و 1825ء ٹی گریٹ ریفارم بِل پاس کننگا، ہراٹی Rotten Borougs آتا سیٹ آتے ایسر کننگ مس و بھلا شار تیٹ پارلیمنٹ نا سیٹ آتے مقرر کننگ مس۔ متوسط تپہ ءِ ووٹ تننگ نا حق تننگا۔ ولے ورکنگ کلاس داسا ہم ووٹ تننگ نا حق آن پدماندہ ئس۔

دا حالیت ئٹی ٹریڈ یونین نا کسرشون آک دا مارشت ءِ ودی کریر کہ اسکان کہ دافتے ووٹ تننگ نا حق رسینگپک، اوفتا نمائندہ غاک پارلیمنٹ ئٹی ہنوفس و اوفتا حق آتیکن قانون سازی مروف گڑا ہمو وخت ئسکان اوفتے چاگڑد ئٹ شرف رسینگوف۔

ہندا خاطران تینا سیاسی خواست آتے پورو کننگ کن اوفک چارٹسٹ نا پن آ تحریک اس چلفیر۔ دا تحریک 1838ء آن 1857ء اسکان برجا مس۔ دا تحریک ئٹی اوفک شش اہم ءُ خواست مونا تخار۔ درخواست تروکا تا پارہ غان دا خواست آ زور تننگا کہ:

1- بالغ رائے دہی نا موکل تننگِہ۔ خاص وڑئٹ ہمو بندغ آتے کہ ہرافتا عمر 21 سال یا داکان ہم گیشتر مرے۔
2- رائے دہی ڈھکوک مرے
3- پارلیمنٹ نا باسک آتیکن صاحبِ جائیداد مننگ المی مف
4- پارلیمنٹ نا باسک آتا تنخواہ مقرر کننگ مرے
5- گچینکاری حلقہ غاک بریبر مریر۔
6- پارلیمنٹ نا گچینکاریک سال ئنا بنیات آ مریر

چارٹسٹ تحریک نا بنائی برانز آک 1838ء ئٹ برمنگم، گلاسکو و شمالی انگلستان نا شار آتیان بناء مسر۔ داکان گڈ تحریک نا کسرشون آتے دا ہیت ئنا اندازہ مس کہ اسکان لندن ٹی اسہ بھلو برانز اس مفرو و پارلیمنٹ آ زور شاغنگتنے گڑا او وخت ئسکان دا برانز آک سرسہب مننگ کروفس۔

ہندا خاطران لندن ئٹ برانز اس کشنگ نا تیاریک بناء مسر۔ دا تحریک نا خواست آتا ہلنگ کن 1.3 ملین ورکر آک دستخط کریر۔ جون 1839 ئٹ دا درخواست ءِ اسہ گاڑی اسیٹی تخیسہ اودے پارلیمنٹ ہاؤس آ دننگا۔ دا جلوس ئٹی کم و ود پنجاہ ہزار بندغ اوار ئس۔ جلوس پرامن ئس و بیدادی ہچو قصہ اس مونا بتو۔ پارلیمنٹ ءِ دا درخواست تننگا، ولے اونا خواست آتے خوڑتی ئٹ ہُننگ متو۔

1839 آن پد دا تحریک نزور مرسا ہنا۔ انتئیکہ ورکنگ کلاس کن اسہ تحریک ئسے مرغن تدیفنگ یا برجا تخنگ کبین مریک۔ اوفتے اُرا نا خرچہ آتیکن زر گرج مریک۔ داڑان بیدس کہ داکان گڈ ہم مچٹ بھاز برانز اڈ تننگا ولے فوج اوفتے بشخ و چانٹ کرے۔ چارٹسٹ تحریک او وخت فوری تینا خواست آتے پورو کرفنگ کتو ولے وخت ئتون اوار اونا کل خواست آک بیدس پارلیمنٹ نا سالانہ گچینکاری آن، انگلستان نا گچینکاری عمل نا بشخ مسر۔

داڑان اندازہ مریک کہ اگہ اسہ تحریک ئسے الس نا نیامٹ کڑمب ءُ ہند اس سر مرے گڑا حکمران تپہ غاک ہم اونا دباؤ ٹی بریرہ و بے وس مریرہ کہ تینا مراعات آتیان دُو ارفر و لس بندغ آتے اوفتا حق آتے ایتر۔ اگہ چارٹسٹ تحریک ءِ یورپ نا تناظر ئٹ ہُننگ مرے گڑا دا ہمو وخت ئس کہ ہراتم 1848 ئٹ تیوہ غا یورپ ئٹ انقلابی آ کاریمک چلنگ ئسر۔ ولے انگلستان ئٹ چارٹسٹ تحریک انقلاب ہتنگ نا جاگہ غا اصلاحات نا کسر ءِ گچین کرے۔