رملہ نا اسہ وَرخ اس – غسان کنفانی | عتیق آسکوہ بلوچ

الّمی خوانبو

رملہ نا اسہ وَرخ اس

نوشتکار: غسان کنفانی
براہوئی: عتیق آسکوہ بلوچ

دی بلوچستان پوسٹ

اوفک ننے رملہ و قدس ءِ اوار شاغوک کسر نا ہڑتوما پارہ غاتیا، اِرا چِر ئٹ سلیفیر۔ دوارہ ننے پاریر کہ تینا دُو تے بڑز کبو۔ اسہ یہودی فوجی اس کنا لمہ ءِ خنا، ہرا کنے تینا مونا سلیفنگ نا کوشست کننگ ئس کہ ای جولائی نا پُتک تروک دیمون آن رکھوک مریو۔ گڑا او کنا دو ءِ ہلیسہ بھاز ترندی تون چِکا۔ دوارہ کنے شارعِ الترب نا نیام آ اسہ نت آ سلینگ و تینا دُو تے کاٹم نا زی آ ارفنگ نا ترندی تون حکم تس۔

ای او وخت نو سال ئنا سن ئٹی ئسوٹ۔ بیرہ چار گھنٹہ مُست ای یہودی تے رملہ ئٹ پیہنگ آ خناسٹ۔ ای شارعِ رمادی نا نیام آ سلوک، اوفتا کاروائی ءِ خوڑتی تون اوننگ ئسوٹ کہ امر یہودیک پیر و ورنا زالبول تا خیسن تے پٹنگ ئسر، اوفتے تادی و زوراکی تون پُلنگ ئسر۔ اوڑے منہ سیاہ فام سپاہی ہم اندا گڑا ءِ بھاز جوش ئتون ایسری تننگ ئسر۔ ای دا ہم خناٹ کہ کنا لمہ چھپی تون سکسہ کنے اوننگ ئس۔ دا ساعت، اُست ئنا کڑمبی تون کنا اُست خوائس کہ وخ ای تینا لمہ ءِ پاننگ کیو کہ ای اسُل جُوان اٹ و دیمون کنے آ اون زیم بٹنگ اف دنکہ او گمان کننگ ئس۔

ای اسٹ سلامت سلوک آ ئسوٹ۔ دا تدینی تا بناء آن اسہ سال اس مُست کنا باوہ وفات کریسس۔ رملہ ئٹ گام تخنگ تون کنا بھلا ایلم ءِ کیز کننگاسس۔ ای دا سرپد مننگ ئٹ فریشان ئسوٹ کہ ای تینا لمہ نا انت کاریم ئنا اُٹ، ولے داسہ ٹک خلیوہ کہ اگہ ای ہمو وخت دمشق سر مننگ آن گڈ اوڑتون متوٹہ گڑا حالیت آک امر مسرہ۔ ای اونا خاطر بس اسٹاپ آتیا کوکار کریسہ روزنامہ سودا کریسہ کریٹ۔

دے ئنا باسنی زالبول و پیرانگا تا طاغت ءِ مدان مدان دیر کننگ بناء کرے۔ داکان ایکان اُست کٹہی برانز بش مسر۔ ای منہ اندنو دروشم خناٹ ہرافتے ای رملہ نا گلی تیٹ ہڑدے خناٹہ؛ او دروشم آک رنج و ڈکھ نا کڑمب علامت جوڑ ئسر، ولے ای دا دڑد ئنا ترندی ءِ ہچبر بیان کننگ کپروٹ۔ ناگمان ای کاکا عثمان ءِ خناٹ، اسہ یہودی زالبول سپاہی اس اونا ریش ئتون گوازی کریسہ مخنگ ئس۔

کاکا ابو عثمان کنا گواچنی کاکا اَف، بلکن او رملہ نا مہروان طبیب و نائی ءِ۔ اودے اولیکو وار خننگ تون بندغ اونا مابت و شخصیت نا شہدائی مسکہ۔ تیوہ مخلوق شرف ئتون اودے کاکا پاریسہ توار کریکہ۔ او تینا چنکا مسڑ فاطمہ ءِ تینتون خمب ہلوک ئس، ہرا تینا شابیت و سرمئی خن تیان سیاہ فام یہودی زالبول ءِ بھاز پامداری تون اوننگ ئس۔
“دا نا مسڑ ءِ؟”
ابو عثمان خُلیسہ کاٹم ءِ سرفے، ولے اوفتا خنک گوڑیفوک، تہار ءُ پیشن گوئی اسیتون گروشک تننگ ئسر۔ بھاز بے پروائی تون، یہودی زالبول تینا چُنکا توپ ءِ ارفے و فاطمہ غا نشان ءِ ہلک، ہراکہ چنک غلہ رنگ و سرمئی خن والا، ساندہ باپڑدہ چُنا اس ئس۔

اندا ساہت اسہ یہودی سپاہی اس کنا مونا پیری کریسہ بس و اونا خنک کنے ٹی خلوک مسر، او کنا و ندارہ نا نیامٹ اڑاند مریسہ سلیس۔ ولے ای مسہ جتا سُم ئنا توار ءِ بنگٹ۔ دوارہ ای ابو عثمان ءِ خناٹ، ہرانا دروشم بھیم بش کروک دڑد و بے دادی آن پُر مسوسس۔ انداڑتون کنا خنک فاطمہ نا پارہ غا ہنار، ہرانا کاٹم مون نا پارہ غان ڈول مسوسس و دتر نا پُڑیک اونا مَونا پژہ غاتیان باسن آ زمین آ چُٹنگ ئسر۔

دیخہ اُرے آ، ابو عثمان کنا رہی آن گدرینگا۔ او فاطمہ نا جوْن ءِ تینا پیرانگا دو تیٹ ارفوک ئس، گنگ و ہبکہ ئس، بھیم بش کروک چُپی ئٹ، مونا نا پارہ غا ژدغئی تون اوننگ ئس۔ ترند آ گام تیتون ہڑتوما صف تا نیام آن اولیکو چوٹ اسکان چُپی تون ہنیسہ کرے۔ ای پدی چَک خلیسہ اُراٹ گڑا اونا زائیفہ ڈغار آ تولوک ئس، ہرانا کاٹم ہڑتوما دو تا نیامٹ ئس۔ او مونجھا، مودہ کریسہ ہوغنگ ئس۔ اسہ یہودی سپاہی اس اونا پارہ غا مون کرے و اودے بش مننگ کن اشارہ کرے، ولے پیرانگا زالبول بش مننگ کتئو، او اُست کٹہی و بے جاراتی ئٹ گیمرینگوک ئس۔

دا وار انتس کہ مس، ای تیوہ غاتے پاش پاش خناٹ۔ ای تینا خن تیٹ خناٹ کہ امر سپاہی اودے تینا نت ئٹ لغت اس خلک و پیرانگا زالبول امر پد ئنا زیلہ غا تما، اونا مون آن دتر نا فوارہ بش مس۔ دوارہ ای پاش وڑئٹ خناٹ، سپاہی تینا توفک نا نل ءِ اونا سینہ غا تخا و بیرہ اسہ سم اس خلک۔

ایلو ساعت، ہمو سپاہی کنا پارہ غا مون کرے، بھاز جارات ئتون کنے نت ءِ بڑز ارفنگ نا پارے، ہرادے بیدس سما تمنگ آن، ای ڈغار آ تخاسٹ۔ ہراتم ای کاٹم ءِ شیف کریسہ تینا نت ءِ بڑز ارفیٹ، گڑا او کنے اِرا ترند ءُ شامات خلک و تینا دو ءِ کنا دتری کوْس ئٹ ساف کرے۔ ترند دڑد کنا بدن نا حالیت ءِ بھاز بد زیمی کرے، ولے ای تینا لمہ نا پارہ غا اُراٹ، ہرا زالبول تا کُڑدہ ئٹ تینا دو ءِ تہو ئٹ بڑز کروک، چُپی تون ہوغسہ ئس۔ ہوغنگ نا وختا، اونا دروشم آ اسہ مدان ءُ خڑینکی بشخندہ اس ہم تالان مس۔ ای ماراٹ کہ کنا نک تینا باریم آن شیف مننگ ءُ۔ و اسہ پُردڑد بلا اس کم و وَد کنا ران ءِ کشکنگ نا خڑک ئس۔ ولے ای بیدس خواہنگ آن مخاٹ و اُست ئنا ہب ئتون خواہسوٹ کہ وخ ای تینا لمہ نا رہی آ ددینگسہ ہننگ کیو، اودے پاؤ کہ اِرا شامات آن کنے ہچو تکلیف اس متئو، ای جُوان اٹ۔ خڑینک خلیسہ اوڑان خواست کیو کہ او ہوغپ، دنکہ ابو عثمان اسہ ساعت اس مالو کریسس، او ہم ہمون مرے۔

اسہ دم تون کنا خیال پنا۔ ابو عثمان فاطمہ ءِ کڈ کننگ آن گڈ تینا جاگہ غا اسیکہ وا بننگ ئس۔ ہراتم او کنا رہی آ بس، او کنا پارہ غا اسُل ارتئو۔ کنے یات بس کہ یہودیک اونا زائیفہ ءِ ہم کسفینو۔ داسہ اودے اسہ پین تدینی اسیتون مون تروئی تمک۔ ای تڑس کنوک اُست و دیخہ در لپڑزوک کیفیت اسیتون، اودے برجا اریسہ کریٹ، داڑاسکان کہ او تینا جاگہ غا سر مس۔ او اسہ ساعت اسیکن سلیس، تینا ڈول، خید آن اسٹ آ بج ءِ اڑسا۔ ای اونا دروشم نا کیفیت ءِ سرپد مننگ کریٹہ: بیدس سُرنگ، سلوک، و گروشک تروک خید ئنا پڑیک اونا بدن آ تفوک ئسر۔ ابو عثمان تینا زائیفہ نا جوْن ءِ تینا پیرانگا دو تیٹ ارفنگ کن ڈول مس، دنکہ ای ساندہ اونا دکان نا مونا، نت تون نت تے خلوک، خناٹہ۔ او ابو عثمان نا نیمروچ نا اِرغ نا ودار کریکہ کہ خالی رزان تے تینتون ارفیسہ اُراغا کائے۔

انداٹی او مسٹمیکو وار کنا رہی آن گدرینگا، برجاء تسیسہ۔ اونا کوْن آ دروشم آ خید ئنا پڑیک بے کچ وہنگ ئسر۔ کنے اسُل ہم ارتئو۔ ای اسیکہ وا خید آن چُڑوک اونا ڈول مُخ ءِ خناٹ۔ او ہڑتوما چِر آتا نیامٹ مدان مدان ہننگ ئس۔

مخلوق گار پریات ءِ بند کریسس، زالبول و پیرانگا تیٹ اسہ دڑد آن پُر ءُ چُپی اس تالان مسوسس۔ اندن گمان مسکہ کہ ابو عثمان نا یات آک برجائی تون مخلوق نا ہڈ آتے کُننگ آ مریر، ہمو یات آک ہرافتے ابو عثمان نائی نا کڑسی آ تولوک رملہ نا مخلوق ءِ بنفیسس۔ ہمو یات آک ہرافک مخلوق نا اُست آتیٹ تینا گچین ءُ ہند اس جوڑ کریسر، داسہ مخلوق نا ہڈ آتیٹ برجائیت آن جومب لگیسہ ہننگ ئسر۔

ابو عثمان تیوہ زند اسہ پرامن و مابت والا بندغ اس مسوسس، ہرا ہر گڑا غا باوری تخاکہ، تیوہ غاتیان زیات تینے غا باوری تخاکہ۔ او تینا زند ءِ لا شیئی آن بناء کریسس۔ ہراتم جبل النار انقلاب اودے رملہ ئٹ چغل تسوسس، گڑا او تیوہ غاتیان ہورک مسوسس۔ او اسیکہ وا زند ئنا بناء ءِ کرے، دنکہ رملہ نا ڈغار نا خرسی و مخلوق نا مابت و خوشی تے دوئی کرے۔ ہراتم فلسطینی نا ایسری جنگ بناء مس، گڑا او تیوہ غا گڑاتے بہا کریسہ سلہہ ہلک، ہرافتے او تینا سیال آتیٹ بشخا کہ او جنگ ئٹ تینا فرض ءِ ایسری ایتنگ کیر۔ اونا دکان شورہ و سلہہ نا گدام ئٹ بدل مسوسس، او دا قربانی نا ہچ ءُ زر اس خواہتوکہ۔ اونا تیوہ غاتیان بھلا اُست خواہی دا ئس کہ او رملہ نا زیبا، درخت آتیتون شون تروک قبرستان ئٹ کڈ کننگ مرے۔

دننگا چنکا چنکا ہیت آک مخلوق ءِ چُپ کریفرہ۔ خید آن پالن دروشمک دا یات آتا باریم نا شیف لڑزنگ ئسر۔ ای تینا لمہ نا پارہ غا اُراٹ، ہرا تینا دُو تے تہو ئٹ بڑز کروک، تینا بالاد ءِ ودفسہ، دنکہ او داسہ جِک مروک مرے و ابو عثمان ءِ اوننگ آ مرے۔ چُپی سُرف ئنا کوڑ نا ڈول ئس۔ ابو عثمان اسہ یہودی محافظ ئسے نا مونا سلوک ہیت کننگ ئس و تینا دکان نا پارہ غا اشارہ کننگ ئس۔ زور او تنیا دکان نا پارہ غا ترند گام تیتون ہنا، اسہ پیہن ءُ توال اس ارفیسہ واپس بس، ہراٹی تینا زائیفہ نا جوْن ءِ پیڑا و قبرستان نا پارہ غا سر ہلک۔

دوارہ ای اودے مُر آن کبین آ گام تیتون واپس بریسہ خناٹ۔ اونا مُخ ڈول ئس، اونا دوک دمدرینگ نا حالیت ئٹ لڑونج ئسر۔ بریسہ بریسہ کنا رہی آ بس، مالو آن زیات بھلن سن خننگسہ ئس۔ مِش ئٹ اسٹ، اُرے اسکان تسیسہ ئس، اونا سینہ غا مِش ئٹ اسٹ دتر نا بھازا لپ آک ئسر۔ ہراتم او کنا مونا بس، کنے اندن اُرا دنکہ او اولیکو وار کنا رہی آ گدرینگ آ مرے، کنے جولائی نا پُتک تروک دیمون آ، گلی نا نیامٹ سلوک خننگ آ مرے: مِش ئٹ ڈم، خید آتیٹ چُڑوک، ترغوک جوڑ تیتون، ہرافتیا دترک تفیسر۔ او جوان اُرے اسکان تسیسہ اُریسہ کرے، اونا خن تیٹ بھاز آ مارشت آک ئسر ہرافتے ای پوہ مننگ کتئوٹ ولے محسوس کننگ ئسوٹ۔ دوارہ او مدان مدان، مِش ئٹ اسٹ و تسیسہ، تینا جاگہ نا پارہ غا سر ہلک، تینا مون ءِ سڑک نا پارہ غا اڑسیسہ دو تے آسمان ئٹ بڑز کرے۔

مخلوق کن ابو عثمان ءِ اونا اُست خواہی نا ردئٹ کڈ کننگ مننگ کتوکہ، انتیکہ ہراتم او کمانڈر نا کمرہ ئٹ تینا چاہنداری نا امنائی کننگ آ مس، گڑا مخلوق اسہ ترند ءُ تراک ئسے نا توار ءِ بنگ، ہراڑان اُرا ڈھیر مس و ابو عثمان نا ازبہ غاک ڈھیر ئٹ ڈم ہلیسہ ضائع مسر۔

کنا لمہ ءِ پاننگا، ہراتم او کنے مش تیان ایپار اردن آ دننگ ئس، کہ ابو عثمان تینا زائیفہ ءِ کڈ کننگ آن مست تینا دکان آ ہنا، ولے بیرہ توال ارفیسہ واپس بتئو۔


اصل سرحال: ورقة من رملة
کتاب: أرض البرتقال الحزين
عربی آن اردو مَٹ: اسد اللہ میر الحسنی (کراچی)


دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔

پُوسکنا حوالک

چین نا دورہ و بلوچستان ئٹ سکیورٹی سختیک – ٹی بی پی سرگپ

چین نا دورہ و بلوچستان ئٹ سکیورٹی سختیک – ٹی بی پی سرگپ پاکستان نا صدر آصف علی زرداری پنچ...