ظریف بلوچ نا کسفنگ نا برخلاف تربت ئٹ ڈی بلوچ ہند آ سی پیک کسر بند کننگا۔
سی پیک کسر ءِ ڈی بلوچ نا ہند آ زالبول آک ظریف بلوچ نا کسفنگ و جون ءِ زوراکی ئٹ توننگ نا برخلاف بند کرینو۔
برانز کروک زالبول تا ردئٹ درے ننکان ظریف ءِ اُرا غان ارفسہ پدان اونا جون خاہوت ءِ تننگا ہرانا زی آ بیدادی کننگاسس۔ خاہوت ہراتم جون ءِ تربت آ دننگ ئس گڑا اوفتے کسر آ توننگا و اوفتے تربت آ بننگ الیتور۔
اوفک پاریر کہ داڑان ودیک بلوچ آتیتون پین انت ظلم و تادی اس مننگ کیک کہ ننے تینا لاش تیا ماتم کننگ ہم اِلیپسہ۔
پوسکنا حوال تا ردئٹ خاہوت ءِ جون ئتون اوار آسیا آباد نا ہند آ فورسز آک تورینو۔
ایلو پارہ غان تمپ ئٹ پاکستانی لشکر نا زیاتی تا برخلاف تیوہ شٹرڈاؤن ہڑتال ہم مریسہ ءِ۔
تمپ ئنا علاقہ آسیا آباد آن ویڈیو کلہو اس شینک کریسہ کسفنگوک نا مسڑ نا پاننگ ءِ کہ او تینا باوہ نا میت ءِ تربت آ میڈیکل جاچ ئنا غرض ئٹ دننگ خوائک تاکہ اوفتے اونا مرگ ئنا سوب سماء تمنگ کے ولے سکیورٹی کارندہ غاک اوفتے مونی ہِننگ آن توننگ ءُ ہرانا برخلاف اوفک برانز ئٹ کسر ءِ بند کریسہ توسنو۔ اوفتا برانز ئٹ زالبول آتیتون اوار بھلو کچ اسیٹ بندغ آک اوار ءُ۔
خیال ئٹ مرے کہ ضلع کیچ نا تحصیل تمپ ئٹ پاکستانی لشکر اُرا تیا چھاپہ خلیسہ ظریف پنی ءُ بندغ ئسے تینتون درے ہرادے بیدادی نا گواچی کریسہ کسفنگا۔