بلوچستان نا صنعتی شار حب چوکی آن پاکستانی لشکر نا دو آن بیگواہ کننگوک ورنا صحافی زبیر بلوچ کن تولوک برانز، اندن قلات ئٹ اختر شاہ نا زوراکی نا بیگواہی نا برخلاف اِرا دے آن برانز برجاء اس ہرا اینو انتظامیہ تون گپ تران آن گڈ ایسر مس۔
زوراکی ئٹ بیگواہ کننگوک ورنا صحافی زبیر بلوچ نا ایڑ ئنا پاننگ ءِ کہ استو نن ئنا 3 بجہ غا ویگو گاڑی تیٹی سوار سلاہ بند بندغ آک اُرا غا چھاپہ خلسہ کنا ایلم ءِ زورکی ئٹ دزگیر کرسا بیگواہ کریر۔
اونا زوراکی ئٹ بیگواہی نا برخلاف خاہوت کیچ تجابان نا ہند آ برانز کرسا سی پیک کسر ءِ بند کرینے۔
ماہ رنگ بلوچ دا بارو ئٹ پارینے کہ بلوچستان ریاست پاکستان نا ہمو کالونی ءِ ہراڑے راہبند و قانود مننگ آن بیدس ہم ظلم و زوراکی برجاء ءِ، بلوچ زنک کشی نا پالیسی ٹی دے پہ دے ودکی مننگ ءِ۔
ماہ رنگ بلوچ پارے کہ ظریف بلوچ ءِ بیدس عدالت کھسفنگ نا برخلاف تربت فدا چوک آ برانز برجاء ءِ۔ قلات آن زوراکی ئٹ بیگواہ کننگوک اختر شاہ نا خاہوت تدوکا 48 ساہت آن منفی 10 ڈگری نا یخ ئٹی بھلا کسر آ تولوک برانز کننگ ءُ۔
ماہ رنگ بلوچ پارے کہ ہندا وڑ، استو ریاستی لشکر و ڈھکوک ادارہ غاک حب چوکی آن بلوچستان یونیورسٹی نا خوانندہ زبیر بلوچ ءِ زوراکی ئٹ بیگواہ کریر، اونا خاہوت ہوشاب ئٹ برانز کننگ ءِ۔ او پارے کہ تیبہ بلوچستان دا وخت آ تینا سرزمین آ زندہ مننگ نا بنداوی حق کن اسہ وڑ برانز کننگ ءِ۔
یاتی مرے کہ زبیر بلوچ اسہ صحافی و نوشتہ کار ئسے و مُست بلوچستان نا پِنی آ اخبار انتخاب ئٹ کاریم کرینے۔
اندن قلات نا ہند آ اختر شاہ نا وے آجو مننگ نا برخلاف اِرا دے آن برانز برجاء ئس ہرا اینو انتظامیہ تون گپ تران آن گڈ ایسر کننگانے۔
دا تولوک برانز زوراکی ئٹ بیگواہ کننگوک اختر شاہ نا وے آجو مننگ نا برخلاف بناء کننگاسس ہراٹی چُنا نیاڑی، کماش و ناجوڑو بندغ ہم اوار ئس۔
انتظامیہ نا کنڈ آن خاہوت ءِ باور تننگانے کہ اختر شاہ ءِ پنچ دے ئٹی یلہ کننگو۔
اختر شاہ نا خاہوت نا پاننگ ءِ کہ اگہ اودے پنچ دے ئٹی یلہ کتور گُڑا نن دوارہ بنجائی کسر ءِ بند کرسا برانز کرون۔