دفعہ 144 – ٹی بی پی سرگپ
متنازعہ صوبائی حکومت تیوہ بلوچستان ئٹ دفعہ 144 نافذ کرینے تاکہ زوراکی نا بیگواہی و دزگیر ئٹ کسفنگ نا برخلاف برجاء برانز و تولوک برانز آتے ایسر کننگ کے۔ زبیر بلوچ نا زوراکی ئٹ بیگواہی نا برخلاف سوگو السی برانز نا سوب او آجو مس ولے ظریف بلوچ و نوید بلوچ نا خاہوت تینا بندغ آتا دزگیر ئٹ کسفنگ نا برخلاف ضلع کیچ نا بنجاہی شار تربت ئٹ شہید فدا چوک آ تولوک برانز کننگ ءُ۔
ظریف بلوچ ءِ تمپ ئنا علاقہ دازن آن اونا اُرا ٹی خاہوت نا مونا فرنٹیئر کور نا سپاہیک بیدادی کریسہ زوراکی ئٹ بیگواہ کریر و اسہ دے ئسے آن پد اونا جشوک جون دازن ئٹ خننگا۔ ظریف بلوچ نا خاہوت ءِ برانز آن توننگا و اوفتے تڑی و بیوس کریسہ ظریف بلوچ ءِ دفن کرفنگا۔
ضلع کیچ ئٹ ظریف بلوچ ءِ دزگیر ئٹ کسفنگ نا برخلاف مروک برانز اولیکو اف بلکن شہید فدا چوک آن بالاچ بلوچ نا دزگیر ئٹ کسفنگ آن اسہ تحریک اس بناء مسوسس، ہراڑان ریاستی تادی نا برخلاف تیوہ بلوچستان ئٹ سوگو السی برانز آک مسر و اسلام آباد ئٹ دیہاڑی تولوک برانز کننگا ولے ریاستی مقتدر ادارہ غاک دائسکان ہم پہہ مننگ افس کہ اوفتا بے قانودی گام آتیان بلوچ راجی توار چپ مننگ کپک۔
تیوہ جہان ئٹ پوسکنا سال بناء جشن آتیٹ کننگک ولے بلوچستان ئٹ پوسکنا سال نا بناء دفعہ 144 نا سیخا و دزگیر ئٹ کسفنگ آتا برخلاف برانز آتیٹ مننگ ءِ۔ زبیر بلوچ نا زوراکی ئٹ بیگواہی آ سوگو السی برانز آن پاش ءِ کہ دفعہ 144 خلنگ آن السی برانز توننگ مننگ کپک و داسہ ریاستی تادی آ چپ مننگ نا جاگہ غا بلوچ راج برانز نا کسر ءِ ہلیک۔