پاکستانی لشکر ضلع آواران نا تحصیل مشکے ٹی چار بندغ کسفنگانو۔ علاقائی حوالکار تا ردئٹ چار انگا بندغ آک پاکستانی لشکر نا دزگیر ئٹی ئسر۔
کسفنگوک بندغ تا چاہنداری کامران علیم، معراج، مومن اسلم و حفیظ نا پن تیٹ مسنے۔
یاتی مرے پن کروک بندغ آتے 28 فروری نا نن آواران نا تحصیل مشکے آن فورسز آک پین پنچ بندغ تون اوار زوراکی ئٹ بیگواہ کریسر اندن ایلو پنچ بندغ نا بابت دائسکان ہچو حوال اس مونا بتنے۔
اندن بلوچ یکجہتی کمیٹی پن کروک بندغ آتا کسفنگ نا ردعمل ئٹ بیان اس شینک کریسہ پارینے کہ بلوچستان نا ضلع آواران نا علاقہ مشکے ئٹ پاکستانی لشکر زوراکی ئٹ بیگواہی نا گواچی چار بلوچ ورنا کامران علیم، معراج، مومن اسلم و حفیظ بلوچ ءِ بیدس عدالت کسفینے۔
بی وائی سی نا ردئٹ پن کروک بندغ آک 28 فروری نا نن پاکستانی لشکر نا دو آن پین پنچ بندغ تون اوار زوراکی ئٹ بیگواہ کننگاسر، ایلو پنچ بندغ دائسکان پاکستانی لشکر نا بے قانونی دزگیر ئٹی ءُ ہرافتا زند ہم بھیم ئٹی ءِ۔
بیان ئٹ پاننگانے کہ بلوچستان دا وخت زوراکی نا بیگواہی و بیدس عدالت خون و بلوچ زنک ایسری نا اسہ بھیم بش کروک وخت ئسے آن تدینگ ءِ پاکستانی لشکر و ڈھکوک ادارہ غاک سوگو پالیسی تا ردئٹ بلوچ راج ئنا پجار ءِ بنیات جوڑ کریسہ سوگو زنک ایسری اسیٹی اختہ ءُ زوراکی نا بیگواہی، دزگیر ئٹ کسفنگ و دروغ نا مونتس تیٹ بلوچ ورنا تا کسفنگ ہڑدے نا کاریم اس جوڑ مسنے ہرا بلوچستان ءِ اسہ بھلو بندغی نیستی ئسے نا گواچی کرینے۔
بلوچ یکجہتی کمیٹی پارینے کہ ریاستی دہشتگری نا کل آتیان است ءِ سریفوک بیدس عدالت کسفنگ ءِ ہراڑے اول بندغ آتے زوراکی ئٹ بیگواہ کننگک اوفتے بھاز جسمانی و ذہنی بیدادی نا گواچی کننگک و پدا دروغ نا مونتس تیٹ کسفسہ اوفتے دہشت گرد پِن کننگک۔
تنظیم نا ردئٹ برجاء سال نا بیرہ اِرا توہ ئٹ درزن آ بلوچ ورنا تے بیدس عدالت کسفنگانے ہرا دا تادی نا بھلنی ءِ پاش کیک۔
او پارے کہ بلوچستان ئٹ زوراکی نا بیگواہی تا کل آتیان بھیم بش کروک پالو دادے کہ بیگواہ کننگوک بندغ آتیان بھاز آک اسُل پدا بفسہ ہرا خوش بخت ءُ او یا تو جسمانی و ذہنی بیدادی آن پد اسہ گیاوان علاقہ اسیٹی یلہ کننگرہ یا گڑا اوفتا جشوک جونک خسنگرہ۔
تنظیم جہانی برادری و بندغی حق آتا تنظیم آتیان خواست کرینے کہ اوفک بلوچ زنک ایسری آ تینا ڈوہدار آ چھپی ءِ پرغر و دا ظلم آتا برخلاف توار بڑز کیر، اگہ دا سوگو زنک ایسری توننگ متو گڑا دا نہ بیرہ بلوچ راج بلکن تیوہ خطہ کن بھس کار نتیجہ تا سوب مننگ کیک۔