ریاستی تادی و سیاسی مزاحمت
ٹی بی پی سرگپ
بلوچستان ئٹ پاکستان اسہ بنجاہی ریاست ئسے نا جاگہ غا طاغت نا زور آ تینا حاکمیت ءِ چَٹی کننگ نا رویہ برجاء تخانے۔ مزاحمتی السی سیاست نا منوک آک مالو آن ریاستی ادارہ تا زوراکی نا گواچی ئسر، و داسہ پاکستان نا بنجاہی سیاست تون تفوک جماعت آتیا ہم رکھ خلیسہ ءُ۔ ریاست نا پالیسی ساز آک بلوچستان نا زمینی گواچنی تیان بے سما ءُ، اندا خاطران دا امیت کیرہ کہ بلوچ زالبول آتے بندی کریسہ بلوچ الس ءِ پاکستان نا وفاقی سیاست ئٹ اوار کننگ مریک۔
بلوچستان نیشنل پارٹی (مینگل) نا کماش سردار اختر مینگل نا سروکی ٹی ڈاکٹر ماہ رنگ بلوچ، سمی دین بلوچ، بیبرگ بلوچ، و بیبو بلوچ تون اوار سد آ سیاسی باسک آتا آجوئی کن وڈھ آن کوئٹہ اسکان لانگ مارچ نا کسر ءِ توریسہ ریاست تینا سخت انگا پالیسی تا درشانی کننگ ءِ۔ واہم بلوچستان ئٹ پاکستان نا رویہ اولیکو دے آن سخت گیر ریاست آنبار مسنے۔
پنجاہ نا دہائی نا ایسر ئٹ نواب نوروز خان ءِ قرآن نا دروئی تریسہ گپ تران کن منّفنگا، ولے پدان اودے بندی کننگا و اونا مار تے جیل ئٹ پاہو تننگا۔ 1973 ئٹ نیشنل عوامی پارٹی نا گچین مروک حکومت ءِ ایسر کریسہ مری و مینگل قبیلہ تیا تادی کننگا۔ بیست و یکمیکو صدی ٹی تدوکا بیست سال آن زوراکی نا بیگواہی و دزگیری ٹی کسفنگ نا تدینیک ہر وار مونا مننگ ءُ۔ پاکستان نا ایلو بشخ آتے بلکن سخت انگا ریاست نا تصور تون مون تروئی مف، ولے بلوچ راج ہفتاد سال آن ریاست نا اندا رویہ تون مون تننگ ءِ۔
بلوچ زالبول آتے برانز نا حق آن پدماندہ کریسہ اوفتے بندی کننگ و سردار اختر مینگل نا تولوک برانز آ خودکش جلہو کون آ کاروائی تیان اگہ ریاست نا مقتدر طاغت آک دا تکرہ کہ بلوچ تینا حقِ حاکمیت نا جہد آن پدی مرو، گڑا دا اوفتا بلوچ سیاسی دیہاڑ آن بے سمائی ءِ پاش کیک۔
بلوچ راجی سیاست ریاستی سختی تیان پد ہم برجاء مرو، ولے پاکستان نا بنجاہ تون تفوک جماعت آتیا رکھ خلیسہ ریاست نا روتہ غاک بلوچستان ئٹ پین نزور مرور، و دا خیال گیشتر سوگو مرو کہ پاکستان ئٹ سیاست نا ذریعت ئٹ راجی حق دوئی کننگ مننگ کپک۔