ریاستی بیانیہ و گواچنیک
ٹی بی پی سرگپ
پاکستان نا اقتدار ئٹ تولوک جماعت آتا سروک آک و مقتدر طاغت آتا خڑک تکوک بندغ آک دا بیانیہ ءِ جوڑ کننگ ءُ کہ بلوچ یکجہتی کمیٹی و سردار اختر مینگل ءِ بلوچستان ئٹ مخلوق نا ہمکوپئی دوئی اف و اوفتے دہشتگردی تون تفنگ نا کوشست کننگ ءُ۔ واہم، عئید ئنا دے بلوچ یکجہتی کمیٹی نا توار آ کراچی و تیوہ بلوچستان آن لکھ آ بندغ آتا مُچیک پاش کلہو تننگ ءُ کہ الس ریاستی تادی و بیدادی آن پد ہم سخت انگا حالیت آتیٹی تینا راہشون ماہ رنگ بلوچ، سمی دین، بیبرگ و صبغت اللہ تون سلوک ءُ۔
بلوچستان نا متنازعہ حکومتی اوغدیدار آتا بیان آتیان پاش ءِ کہ او بلوچستان نا زمینی گواچنی تینا بے سما ءُ و السی مزاحمتی سیاست تون تفوک بندغی حق آتیکن کاریم کروک راہشون تے دہشتگردی تون گنڈنگ ءُ، ہرا گواچنی تیان چپ ءِ۔ بلوچستان نا چنکا و بھلا شار تیٹ ماہ رنگ بلوچ و سمی دین ءِ بندی کننگ نا برخلاف چرجوئی ئٹ برانز دا ہیت ئنا شاہدی ءِ کہ اوفتے بلوچ چاگڑد نا ہر تپہ نا ہمکوپئی دوئی ءِ۔
پاکستان نا مقتدر طاغت آتا بلوچستان نا ردئٹ داسہ نا پالیسی تیان دا نتیجہ کشنگ سخت اف کہ اوفک بلوچستان ئٹ بھلو کچ ئسے آ لشکر کشی کننگ نا ارادہ تخرہ، ولے دا رد فیصلہ تا نتیجہ ہنوک وخت ئنا گام تیان جتا مروف۔ بلوچستان ئٹ پارلیمانی و بے پارلیمانی سیاسی جماعت آک ہر وخت تینا خُلیس آتا درشانی کننگ ءُ کہ لشکر کشی آن حالیت آک جوان مننگ نا جاگہ غا گیشتر خراب مرور۔ السی مزاحمتی تحریک ریاستی تادی و ناانصافی تا برخلاف بش مسنے و بلوچستان ئٹ لشکر کشی آن بلوچ راج نا ٹپ آک پین کڑمب مرور۔ پاکستان نا اقتدار ئٹ تولوک بندغ آک لشکر کشی نا بیانیہ جوڑ کریسہ سیاسی ویل آتے پین غنجل کننگ نا سوب جوڑ مرور۔
لشکر کشی و ریاستی تادی آن بلوچ راجی تحریک نہ مُست آن ایسر کننگ مسنے و نئے کہ داسہ اونا ایسر کننگ مننگ کیک، انتیکہ بلوچ راجی تحریک السی مخ تفی نا بنماس آ تخوک ءِ و بلوچ راج ئنا ہمدردیک راجی تحریک تون اوار ءُ۔ بلوچ مسئلہ سیاسی ئسے ہرا بلوچستان ئٹ لشکر کشی ئٹ نہ بلکہ زمینی گواچنی تے ماریسہ، راجی حق تننگ و حق حاکمیت منّنگ ئٹ ہی ایسر کننگ مریک۔