ریاستی رٹ نا نیستی – ٹی بی پی سرگپ
2 مئی نا بیگہ بلوچستان نا ضلع قلات ئٹ اسٹریٹیجک اہمیت تخوک علاقہ منگچر آ درزن آ سلہہ بند بندغ آک منظم و بھلو کچ ئسے آ جلہو کریسہ کیہی گھنٹہ تے اسکان کوزہ کریر۔ اندا وخت آ نادرا آفس، جوڈیشل کمپلیکس، بینک و کیہی سرکاری ماڑی تے ہُشار۔ پاکستانی لشکر نا بنجاہی کیمپ ءِ ٹک کننگا، اندن کیہی پولیس کارندہ تے سلہہ تیتون اوار دزگیر کننگا۔ دا جلہو نا ذمہ واری ءِ بلوچ لبریشن آرمی (بی ایل اے) ارفے۔
منگچر شار کراچی و کوئٹہ ءِ گنڈوک بنجاہی کسر (این-25) ئٹی ءِ، و دا غا کیہی گھنٹہ تے اسکان کوزہ کننگ بیرہ اسہ جلہو اس اف بلکن پاش ءُ کلہو ئسے۔ دا بی ایل اے نا برجاء سال چارمیکو بھلا و بھیم بش کروکا جلہو ءِ، ہرانا چرجوئی بلوچ سلہہ بند تحریک نا حکمت عملی ئٹ پاش بدل نا نشاندہی کیک۔ داڑان مُست ڈھاڈر نا علاقہ مشکاف ئٹ جعفر ایکسپریس بندی کننگا، نوشکے ٹی فوجی قافلہ غا جند ندری جلہو مس، اندن تربت و خضدار نا ایب کیب نا علاقہ تیٹ ہم اندا ڈول نا کارروائی کننگا، ہرافتیٹ فوج ءِ بھلو نسخان ارفوئی تما۔
منگچر آ کوزہ غان مُست، جنوری 2024 ئٹ بی ایل اے مچھ شار آ جلہو کریسہ اوڑا مُسہ دے اسکان کوزہ ءِ برجاء تخاسس۔ جنوری 2025 ئٹ خضدار نا تحصیل زہری ٹی ہم سلہہ بند کارروائی آن پد سرکاری ماڑی تے خاخر تننگا و پولیس نا سلہہ تے کوزہ کریسہ شار نا جتا بشخ آتیٹ پیری کننگا۔
بی ایل اے و بلوچستان لبریشن فرنٹ نا پارہ غان شار تیا جلہوک، مڈی تیان پُر ٹرالر آتیا ہر وخت کاروائیک، و بنجاہی کسر تیا کوزہ کریسہ سنیپ چیکنگ کون آ گام آک بلوچستان ئٹ پاکستان نا ریاستی رٹ ءِ ہڑاند آتا گواچی کرینو۔ دا جلہو تا رفتار، ڈٹ بندی و ترندی دا ہیت ئنا شاہدی ءِ کہ بلوچ سلہہ بند تنظیم آک داسہ روایتی گوریلا کارروائی تیان مونی ہنیسہ شاری کوزہ و علامتی حکمرانی نا پارہ غا ہنیسہ ءُ۔
دا حالیت آتیٹ دا سوج ترندی ئٹ بش مننگ ءِ کہ مگہ چین پاکستان اقتصادی راہداری (CPEC) کون آ ڈٹ آک بلوچستان ئٹ بلوچ راجی ادارہ تا رضا و اواری آن بیدس رکھوک مننگ کیرہ؟ منگچر کون آ شار تیا ترند رفتاری ئٹ مروک کوزہ و سلہہ بند ٹولی تا کاروائیک دا ہیت نا گواہی ایترہ کہ بلوچستان ئٹ لٹ و پلی تکوک ترقیاتی ڈٹ بندی، راجی سیاسی و راجی گواچنی تے خن تیان چپ کریسہ، تیا کاریم مننگ کپک۔