آپریشن ہیروف نا ہیل کاری – ٹی بی پی سرگپ
نو و دہ مئی آ ہراتم جہان نا خنک پاکستان و بھارت نا مننگ کروک جنگی جیڑہ غا خلوک ئسر، ہموتم بلوچستان نا جتا ضلع تیٹ سلہہ بند بندغ آک پاکستانی لشکر آ پنچاہ و یک ہند آتیا ہفتاد و یک جلہو کریر۔ دا جلہو آتا سوب آن پاکستانی لشکر ءِ، خاص وڑئٹ پنجگور ئٹ، بھلو نسخان ارفوئی تما۔ بلوچ لبریشن آرمی (بی ایل اے) دا جلہو تا ذمہ واری ءِ ارفسہ پارے کہ اوفتے آپریشن ’ہیروف‘ نا تیاری تا ردئٹ عسکری ہیل کاری تا بشخ گوندا۔
بی ایل اے نا دا سوگو و شابیت جلہو تیٹی اہم کسرک کیہی گھنٹہ تے اسکان اوفتا کنٹرول ئٹ مسر۔ پاکستانی لشکر نا قافلہ تے ٹک کننگا، مڈی تیان پُر ٹرک آتے خاخر تننگا، فرنٹیئر کور نا چوکی تیا ترند جلہو کننگا، و بھاز آ ہند آتیا پولیس تھانہ تیا کوزہ کریسہ ہموڑے ساڑی سلہہ تے دوئی کننگا۔
تدوکا منہ سال آتیان بلوچ سلہہ بند تنظیم آک روایتی گوریلا جنگ آن ہڑسینگسہ آجوئی نا جنگ ئٹ پوسکنی و حکمت عملی نا بدلی ءِ دوئی کرینو۔ خاص وڑئٹ بلوچ لبریشن آرمی نا ہمگرنچ کاروائی، پوسکنا اٹکل، و ودوکا آپریشنل لائخی تیان دا پاش مریک کہ دا تنظیم بروکا وخت نا جنگ آتیکن سوگو تیاری نا عمل آن گدرینگنگ ءِ۔
تیوہ بلوچستان ئٹ بی ایل اے نا سوگو، شابیت و بھیم بش کروک جلہو تا چرجوئی اونا عسکری لائخی تا شاہدی ءِ، ہرا پاکستانی لشکر و بلوچستان ئٹ کاریم کروک جہانی سرمایہ دار آتیکن خُلیس نا سوب ئسے۔ دا جلہو تیان دا نتیجہ نا پیشتمنگ سخت اف کہ بروکا وخت ئٹ ہم دا لڑ برجاء مرو، بلکن دا جلہو تا ترندی ٹی گیشتر ودکی مننگ کیک۔
خطہ نا بدل مروک حالیت آتا ردئٹ بی ایل اے بلوچستان ئٹ اسہ فیصلہ کروک فریق ئسے نا کڑد سر تننگ نا تیاری کننگ ءِ، و بروکا وخت ئنا ندارہ ئٹ تینے اسہ بنجاہی طاغت ئسے نا دروشم ئٹ منفنگ کن کاریم کننگ ءِ۔