مرغن ءُ پند اس آجوئی کن
خود نوشت: نیلسن منڈیلا
جاچ: جعفر قمبرانی
(ارٹمیکو بشخ)
جوہانسبرگ اٹی پُترینگِنگ آن گڈ نیلسن ءِ ہندن گمان مس کہ اونا زند داسا موت اسکان اسہ گم و گار و نادرست ءُ بندغ اسے آنبار تدینگسا ایسر مرو۔
ہمو تم اسکان تو نیلسن نا تینا باوہ ہم الؤ کہ اودے سامبوس، لمہ تے کیہی میل مُر ‘قُنو’ نا شار اٹی تموک بے وسی نا زند تدیفنگ آ بے وس ئسک و نیلسن تینا مون جوہانسبرگ نا گلی کوچہ غاتیٹی باخو کن ارغ نا رولو کننگ ئسک۔
راست پارہ کہ بندغ نا کل آن بھلا مڈی اونا خواریک ءُ، اونا ہمو ڈُکھ آک ءُ ہرا اودے اسہ عام آن خاص و ہچ آن ہر گڑا جوڑ کیرہ۔ نیلسن نا خواری تا دیک بنا کریسر۔ اودے گمان ہم الؤ کہ او ہم وختس کنا راج انا شاعر آنبار پارو کہ:
“ہنار خواری تا دیک منظور
ہتم نا دے کو۔۔۔
نیلسن نوشت کیک کہ ہراتم ای جوہانسبرگ اٹی درستی راستی و آلی بالی مسوٹ، کنا خنک ملنگار کہ داڑے تو جہان مچ بدل ءِ۔ جوہانسبرگ اٹی اسکول کالج و پین علمی ادارہ غاتہ کمبوتی الؤ وا ایکان دہاڑی کن کاریم ملنگ ہم بھلو ویل اس الؤ ولے دا کل آسودہیک بیرہ سیرہ ہمو بندغ تیکن ئسر ہرافتا سِل اس پیہن ءُ ئس، یا اوفتا سِل مؤن و اوفتا خنک پیہن بڈی ئسر کہ تینا جند انا مؤن سلی تا غداری کریرہ۔ یانی اوفتا ڈیہہ اٹی نسل پرستی کچ آن زیات ئسک و ‘مؤن سلی’ آتیتون انسان اخا بلکن سہدار تا وڑٹ مون تسرہ۔
لکھک کہ ننا ملک اٹ گُڑا نے آسودہی دو کننگ، خواننگ یا باخو اس اِرغ نا ہلنگ کن پیہن سِلی اس مروئی تماکا یا تو پیہن خنی اس۔ ایہن گُڑا مؤن سلی آ بندغ آک سٹی ہر جاغا ہننگ آن منع ئسر، اوفتا اسکول کالج و دائے جتا جتا ئسر داڑسکان کہ اولسی آ ٹَٹی (لیٹرین) تیٹی ہم مؤن سلی آتا ٹٹیک جتا ئسر و پیہن سلی آتا جتا۔ ہرا اسہ مؤن سلی آ ردیکہ پیہن سلی ءُ سے نا اُرا، لیٹرین یا جاگہ ٹی پترینگوس اونا زیہا کیس مسکہ و پیشی پاشی اسکان ہیت سر مسکہ۔
نوشت کیک کہ دا تعصب وڑ نا رویہ غاتیان کنا است اٹ تینا مخلوق کن بے وسی نا احساس اس ودی مس۔ واہم ای شعور نا سیم و حد آتیان اینگ ئسٹ کہ کنے پیہن سلی آک دائسکان بھلو ارے لگارہ۔ پیہن سلی آتا خننگ یا اوفتیان کسس کنتون ہیت کروس تو ای تینے کل آن بختاور تکیسا دانگ اینگ ہُراٹا کہ دیر کنے دا بختاوری آ خنا۔۔۔ روہی لالا نا زند داڑسکان نن کل اکن سبخ اسے کہ تانکہ بندغ اسے ٹی شعور ودی متنے، او تینے، تینا قوم انا چوچہ پاچہ ءِ و تینا راجی دود ربیدہ غاتے ہچ سمجھپک۔ اودے لگک نن مِش اُن، ہِس اُن، انت اس ارے ہمو پیشن نا کوزہ گیر یا زوراک آک ءُ۔
ولے دن الؤ۔
جاندمی افریکہ نا آبادی نا کل آن بھلا کچ مؤن سلی آک ئسر ہراکہ ہشتاد 80 درسد مسرہ، پیہن سلی آک بیرہ غا بیست 20 درسد ئسر۔ سوچ بیرہ ترجیحات آتا ئسک و غلامی و بوتاری والا ئسک۔ نہ تو مؤن سلی آتا تینا گلزمین و کل آن ودیک اوفتا تینا بندغ آتا کچ ئسک۔ مال مڈی و خیسن پیہن اوفتا ئسر بس ہمو احساس ودی متوسس کہ ‘دیر ءِ آجو دیر غلام ءِ۔’
نیلسن زِند انا دے تے دِکا تننگ کن ازگار آتا کمپنی تیٹی کوشست کننگ بنا کرے وا تینا سنگت ‘جسٹس’ نا کمک اٹ جاغہ اس دو اڑیفے ولے بھاز زوت اودے ہمو مُزوری آن دو سلوئی تما کہ اوڑے مؤن سلی آتے مزوری کننگ کن اسہ این او سی اسے نا بکار مسکہ ہراکہ نیلسن آستون الؤکہ۔ نیلسن و جسٹس اِرا مُسہ جاگہ کوشست کریسا دُروہ اٹ دہاڑی ہلکرہ وا منا وخت اٹی پدی بے دخل کننگارہ کہ اوفتا سِل مؤن اسک وا ڈغار نا خداک اوفتا بخت اٹی آسودہی نوشت کتویسر۔
باور کیس کہ غلام آ قوم آتیکن زمین و آزمانی آ خداک آسودہی نوشت اسل کپسہ تانکہ دا قوم آک تینا بخت ءِ تینٹ نوشت کننگ نا کوشست کتنو۔ غلام قوم ءِ آجو مننگ کن تینا جند انا قلم، کاغذ و لُغت اس دوئی کروئی تمک تانکہ تینا بخت ءِ نوشتہ کے۔
نیلسن منڈیلا شیر اسے نا چوری ئسک و دائسکان تینا باوہ پیرئی آ سیم و حد آتے گیرام کریسس کہ او مزور اس اف بلکن خواجہ اسے۔
ہندا خواری و زاری تیٹی نیلسن کمپنی تیٹی مزوری کریسا داکان تینا ‘بی اے’ نا ڈگری ءِ ایسر کننگ نا رندٹ ہم لگا ہرادے کہ او نیام کسر آ ہلاسس داڑے بسوسس۔ نیلسن ءِ منا سال خواری تیٹی لگا، پدی او قانون نا شعبہ ٹی تینا بی اے ءِ ایسر کرے گڑا داسا اودے پین جاگہ مزوری اخا بلکن وکیل و دائے سے نا چیمبر ٹی کاریم دوئی کننگ نا موقع دو بس۔
داسا او کل پیہن سِلی آ خوانندہ تا نیام اٹی تینے بخت والو اس تکنگ ئسک دے اس اودے سما تما کہ اوڑے ہم مؤن سلی اتا چاء کنوک آ کوپ آک جتا ئسر، اوفتے پیہن سلی آتا کڑسی آ تولنگ یا اودے دو خلنگ کن ہم بے عزت مروئی تماکہ۔ یانی ہر ہر وڑٹ اوفتے دا احساس تننگاکہ کہ نم انسان نا چنا اخا بلکن اسہ مؤن ءُ غلیز ءُ سہدار اسے نا چناک اُرے۔
داکان نیلسن ءِ اسہ اِرا سنگت، رادیبے و والٹر سیسولوں، دو بسر ہرافتا نیلسن نا زند اٹی بھلو کڑد اس مس۔ خاص وڑٹ والٹر نیلسن تون تول بش کریسا افریکن نیشنل کانگریس نا بابت نیلسن تون تران کریکہ، کانگریس نا مسخت آتے، پیہن سلی تا دژمنی و جاندمی افریکہ ٹی مؤن سلی تا بے وسی تے بیان کریکہ۔ والٹر نا سنگتی، تول بش و پیہن سلی آتا غلامی کروک انگا رویہ غاک ایسری کہ نیلسن نا خن تے ملار۔ نیلسن ہم پہہ مس کہ نن غلام اُن و ننے نوکری، پیسہ، تعلیمی ادارہ و باخو ارغ آن زیات آجوئی نا گُرج ءِ۔ اودے سما تما کہ گرج دا اف کہ نن پیسہ نا رندٹ دودینگن، بلکن گرج دادے کہ نن غلامی آن آجو مرین۔
نوشت کیک کہ داسا گڑا کنکے اسہ سرسہب و کیرئر و نوکری و بھلو کچ اس تنخا نا کنا بھلا مزّل الؤر۔ داسا نیلسن افریکن نیشنل کانگریس (ANC) نا باقائدہ دیوان تیٹی ہناکا، سنگت آتیتون توسکا و تینا وڑٹ تینا سوچ فکر نظریہ ءِ پختہ کریسا ہناکہ۔
گوڑیفوکا ہیت دادے کہ ننے تینا راجی فکر و ویل آتا ایسری، غلامی نا ایسری و وطن کن تو تینا ککڑ اس ہم است مفک، ولے دعویٰ تو نن ہندن بھلو کینہ کہ تلار توپ تا۔ نیلسن ٹی پین ہچڑہ اس خاص ءُ الؤ بس اونا سوگؤ آ فکر و اونا قربانیک اودے جہانی پڑ آ اسہ بھلو راہشون اس جوڑ کریر۔ نیلسن نا فکر سوگؤ و جند تے قربانی نا جوزہ غان شُپ ئسک۔
ہندا فکر ئسک کہ نیلسن تینا اولیکو زائیفہ ‘اویلین میس’ ءِ ہنداڑے جوہانسبرگ اٹی برام کرے و پدی بیرہ ہندا سوب آن مُسٹ تس تا کہ اویلین ءِ نیلسن نا سیاسی فکر و آجوئی نا سوچ اتون خاص ءُ خڑکی مننگ کتؤ ہراکہ نیلسن نا رِداٹ اونا فکر انا نیام اٹی اسہ ہڑاند اس مننگ کریکہ۔ دا سوب ہم ئسک کہ نیلسن تینا فکر انا سوب آن پیہن سلی تا مون اٹی دوست مفروک ءُ بندغ اس ئسک ہرادے ہمو راج اٹی بھلو کچ اسیٹی پیسہ کٹنگ نا موقع تننگ متؤکہ، وا ہندا بزّگی، بے پیسئی اونا زائیفہ ءِ دوست بتؤکہ ہرانا بھلا سوب نیلسن نا فکر ئسک۔ ہندا سوب آن نیلسن تینا اُرائی زند ءِ ویل آتا گواچی کرے و تینا اولیکو زائیفہ ءِ مسٹ تریسا تینا جہد ءِ برجا تخا۔
(برجا ءِ)
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک