سرمچار آک خل تا وڑ سخت و پر حوصلہ ءُ
نوشتہ کار: دلوش بلوچ
دی بلوچستان پوسٹ
نن اسہ گشت اسیکن ہِنان دے و نن اس مرغنو پند خلیسہ تینا کاریم ءِ مچہ خڑک مسون بیگہ نا اِرغ
کرین مُسہ دے ئکن تینا گڑا مُستی روان مسون تینا کاریم کن، استار تا روشنائی ئٹ ہنسہ ئسون گُڑا نن نا 10 بجہ غا جاگہ اس سر مسون سہب ئنا وختی بش مسون چاہ کرین کُنگن رائی مسون چار بھلو بھلو مَش ئسر ہمو تا ہنوئی ئس ہر اسہ مَش آ مُسٹ یا چار گھنٹہ لگاکہ ننے نن ہمو جاگہ غا ہنان سر مسون پیشیم آ، دیگر آ کاریم کن ہنوئی ئسک گڑا پیشتمانک نن نا 9 بجہ غا سر مسون، ننا کاریم متو ننے داسا ولدا تینا جاگہ غا ہنوئی ءِ، ہمو مَش تیا لگن تینا ہند ءِ سر مرینہ نن تینا ہند ءِ سہب ئنا سر مسون چاہ اس کرین کنگن گِڑاس سنگت مچہ خاچار، او بش مسر ولدا ایلو سنگت آک خاچار انتئے کہ اسہ پین کاریم اسیکن ہنوئی ئس، ننے دیگر نا پیشتموئی ئس نن گڑا دیگر آ تینکن اِرغ و ایلو گڑاتے کل ءِ ارفین پڈّا ہنسہ مُرغنا پند ءِ شام ئنا نماز آ سر مسون۔
کاریمی آ جاگہ غا ہنان اُران تے ہچ اس متو داڑے ہم واپس مسون دا جاگہ خڑک ئس ہموڑے بسون جاگہ اس ارغ کُنگن ولدا رائی مسون تینا ہند ءِ نن نا 11 غا سر مسون گڑا خاچان سہب ئنا سنگت آک مشفرہ کرین کہ ننے داکا لڈّوئی ءِ پین جاگہ ئسے ہموڑے کاریم اس ارے اُرن تے بلکہ ہموڑے کاریم ننا مرے گُڑا لڈان اسہ گھنٹہ اس پند کرین سر مسون ہمو جاگہ ءِ گُڑا چاہ مس، اِرغ مس، دم کشان مچہ ای خاچاٹ 1 بجہ غا بش مسوٹ ارغ کنگن چاہ اس، گُڑا ولدا تیاریک ءُ 4 بجہ غا پیشتمان ہنانک اسہ گھنٹہ و بیست منٹ اندا وڑ پند ئس دربین کرین مطلب خڑک اُروکا ٹے اُران تے دا جاگہ سہی الّو واپس مسون تینا مُست ئنا وتاخ آ ہنان، اِرا دے لگا ننے سہب ئنا اسہ پوسکنو سنگت اس کنے پارے ”داخہ پند کینہ انتئے ننا کاریم مفک سوب انت ءِ؟“
ای چُپ کریٹ اسہ وار ئتو مخاٹ کنے پارے ”انتئے ای خراب ءُ سوال اس کریٹ؟“
”جی نہ پُھل نا اسہ جوانو سوال ئسے قربان نا سوال نا ورندی ءِ نن داسا انت اسیکن مَش تا ہمرا اُن؟“
سنگت پارے ”وطن ءِ تینا آجو کننگ کن۔“
ای پاریٹ ”جی اگہ نن جنگ کپن گُڑا آجو مریک یا نہ؟“
سنگت پارے ”جی نہ۔“
”گڑا سنگت نا ورندی اندادے کہ ننے کوشست زیات کروئی ءِ انتئے کہ ننا دژمن دا وخت ئٹ اسُل بھاز زوراکی کرسہ ءِ گڑا ای و نی انت انت کین یا ایلو سنگت آک جی نن جنگ کین توفک ءِ توفک اس تورک سنگت ای پاوہ کہ نن تینتو حکمت عملی بھاز تخن وڑ وڑو مطلب دادے کہ نن ہر اسہ حکمت عملی نا زی آ پین حکمت عملی اس جوڑ کین تخن اگہ دژمن دا جاگہ غا سُر پُر اس کرے نی پین وڑئٹ پین ٹیکٹک اس بنا کر دماغی مریض جوڑ کر تے، نن دژمن ءِ وار تفن، ننے انداخہ سوچوئی تمک کہ نن دا کاریم ءِ کرین دژمن امر کیک ننے امر کروئی تمک۔
سنگت کنا خیال دادے کہ نن انداخہ سخت مرین کہ ننا حوصلہ تے ہچو طاغت اس پرغنگ کپ کل آن بھلا طاغت جہان ٹے حوصلہ ءِ فکر ءِ، تینے سخت جوڑ کننگ کن ننے خواہش ہچ مف بیرہ اسہ خواہش اس، او خواہش انت ءِ او خواہش لمہ ڈغار نا آجوئی ءِ اوڑکن کہنگ ءِ ندر مننگ ءِ، اینو ننا ایلمک ننا ایڑک دا گِڑا ءِ نشان تسر جہان ءِ کل آ کہ بلوچ اسہ دلیر ءُ راج ئسے تینا ڈغار آ کس ءِ الپک ہچ وڑ ئٹ۔
دا کل ہیت آتا نیام ئٹ ہیت ہمو بریک کہ سخت مرین ہر کاریم ءِ اُست ئٹ کین، خواری کین پُر حوصلہ مرین، دژمن نا آخری زور ءِ، دژمن کشانے پنانے ژدغہ ءِ ہمت کروئی ءِ وخت اندادے انشاءاللہ سہب ئنا دے ٹک خُڑک ءِ۔“
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔