امریکہ نا صدر ڈونلڈ ٹرمپ حماس ءِ گڈی تڑی تریسہ غزہ ئٹ بندی کروک غٹ قیدی تے دمدستی یلہ کننگ نا پارینے۔
چاگڑدی حوالکاری تلہ ٹروتھ سوشل آ شینک کروک تینا کلہو ئٹ ڈونلڈ ٹرمپ نا پاننگ ئس کہ ’ای اسرائیل ءِ ہر ہمو گِڑا ءِ ایتوٹ ہرا دا کاریم (حماس ءِ مات تننگ) ءِ ایسر کننگ کن المی ءِ، اگہ دنکہ ای پاننگ اُٹ اندن متو گڑا حماس نا اسہ باسک اس ہم رکھنگپرو۔‘
ٹرمپ نا پاننگ ئس کہ اگہ بندی تے یلہ کننگتو گڑا دانا بھلو نہاد اس تروئی تمو واہم امریکی صدر دا بابت شابیتی ہیت کتنے کہ او اسرائیل ءِ ہرا وڑ نا کمک فراوان کرو۔
ڈونلڈ ٹرمپ نا دا بیان وائٹ ہاؤس نا پارہ غان دا ہیت ئنا پک کننگ نا منہ گھنٹہ آن پد مونا بس کہ امریکہ حماس تون بندی تا یلہ کننگ کن پاش گپ تران کننگ ءِ۔
داڑان مُست امریکہ حماس تون مون پہ مون گپ تران آن تینے مُر تخسہ بسنے۔ بھلو وخت ئسے آن امریکی بست و بند نا پالیسی مسنے کہ اوفک دنو تنظیم اسیتون مون پہ مون گپ تران کپسہ ہرادے اوفک ’دہشت گرد‘ پِن کروک مریر۔
امریکی صدر نا پاننگ ءِ کہ ’غٹ بندی تے یلہ کبو، پدان آخہ داسہ و ہمو غٹ بندغ آتا جون تے ایتبو ہرافتے نم کسفینرے، نہ گڑا نما گوازی ایسر۔‘
’(حماس نا) قیادت تون دائسکان ہم وخت ارے کہ او غزہ آن پیشتمر۔‘
او غزہ نا ہندی تے پاش تڑی تریسہ پارے کہ اسہ جوانو آخبت اس نمکن اُروک ءِ ولے اگہ بندی تے ڈھکورے گڑا خلنگورے۔
دا اولیکو وار اف کہ ڈونلڈ ٹرمپ حماس ءِ تڑی تسنے۔ داڑان مالو او دسمبر ئٹ پاریسس کہ اگہ اونا اوغدہ دوئی کننگ اسکان غٹ بندیک یلہ کننگتور گڑا دانا بھلو نہاد اس تروئی تمو۔
ٹرمپ ئنا داسہ نا بیان وائٹ ہاؤس ئٹ اونا جنگ بندی معاہدہ نا ردئٹ یلہ مروک بندی تیتون اوڑدہی آن پد مونا بس۔
ایلو پارہ غان وائٹ ہاؤس نا پریس سیکریٹری کیرولین لیویٹ دا ہیت ءِ پک کرینے کہ امریکہ بندی تا یلہ کننگ کن حماس تون مون پہ مون گپ تران کننگ ءِ۔
اونا پاننگ ءِ کہ گپ تران نا بناء آن مُست اسرائیل تون دا بابت سَلاہ کننگاسس۔
کیرولین لیویٹ صحافی تے پارینے کہ صدر ڈونلڈ ٹرمپ ہر ہمو کاریم ءِ کننگ آ باور کیک ہرا امریکی تا حق ئٹی ءِ۔
اونا پین پاننگ ئس کہ بندی تیکن خاص سفیر ایڈم ایلچی بوہلر نا پارہ غان نیک نیتی ئٹ کننگا کوشست آک امریکی مخلوق نا سواد کن ئسر۔
اسہ فلسطینی حوالکار اس بی بی سی ءِ پارے کہ حماس و امریکی کوالخواہ تا نیام ئٹ اِرا مون پہ مون اوڑدہی مسنے و داکان مالو کیہی حوالکاریک ہم مسنو۔
اسرائیل نا پاننگ ءِ کہ دائسکان ہم غزہ ئٹ 59 بندی ساڑی ءُ ہرافتیان 24 ئنا بابت گمان ارے کہ اوفک زندہ ءُ۔ دا بندی تیٹ امریکی شاری ہم ارے۔
امریکہ و حماس نا نیام ئٹ گپ تران نا بابت حوال ءِ کل آتیان مالو حوال تروک ادارہ ایگزیوس تسوسس۔ ہراٹی امریکی بندی نا یلہ کننگ آن بیدس جنگ بندی نا معاہدہ غا ہم ہیت مسوسس۔
نیامئی دے ٹک اکن مسکوہی نائب کمک وزیر دماغ پارے کہ امریکہ ءِ تینا شاری تا واپسی کن ’زیات متحرک‘ مننگ نا گرج ءِ۔
مک ملرائے، ہرا سی آئی اے افسر ہم مسنے، گیشتر پارے کہ اگہ دا بابت اسرائیلی تیتون امنائی ئٹ کاریم ہلنگ متو گڑا اوفتے تینا شاری تے پدا ہتنگ ئٹ سختی تیتون مون تروئی تمنگ کیک۔
اسرائیل نا سز وزیر نا دفتر نا پارہ غان شینک کروک اسہ بیان اسیٹی پاننگانے کہ اسرائیل امریکہ و حماس نا نیام ئٹ مون پہ مون ہیت کننگ نا بابت ’تینا خیال ءِ مونا تخانے‘ ولے دا بابت گیشتر معلومداری فراوان کننگتنے۔
حوال تا ردئٹ بوہلر برجاء ہفتہ تیٹ قطر نا بنجاہی شار دوحہ ئٹ حماس نا نمائندہ تیتون اوڑدہی کرینے۔
یاتی مرے 2012 آن دوحہ ٹی حماس نا دفتر ساڑی ءِ۔ گمانی وڑئٹ اوڑے دا دفتر اوباما بست و بند ئنا خواست آ ٹہفنگاسس۔
قطر اسہ چنکو ولے زہم تخوک خلیجی ریاست ئسے ہرا امریکہ نا جوان انگا سیوت آتیان اسٹ ءِ۔ اوڑے اسہ بھلو امریکی فضائی اڈہ اس ہم ساڑی ءِ و او ایران، طالبان و روس اتون اوار کیہی اہم سیاسی گپ تران تا مہمانداری کرینے۔
امریکہ و مصر ئتون اوار اوار قطر ہم غزہ ٹی اسرائیل و حماس نا نیام ئٹ جنگ بندی کن گپ تران ئٹ اہم کڑد سر تسنے۔