ای اسلام آباد ٹی انت اس خناٹ
نوشت: سعدیہ بلوچ
دی بلوچستان پوسٹ
اسلام آباد نن بلوچ راج ئکن اسہ بیگانہ ءُ شار ئسے، داڑے ہراتم ننے بلوچی پُچ ئٹی خنیرہ بندغ آک شار ئنا گڑا اندن نا خنوک آتیان بار خنتے خلیرہ ہریرہ کس پائے نن جتا ءُ سیارہ ئسے آن شیف دڑانن۔ کنا اولیکو وار ءِ نہ ای چکر کننگ کن بسونٹ نہ گِڑاس ہلنگ کن کنا بننگ نا مسخت دا بیگانہ غاتا شار ئٹی اندادے کہ داڑے تینا ایلم سلمان ءِ پٹیو و اونا پد و رند ئٹ بسونٹ، اونا حوال اس ہلنگ کن اونا پٹ و پول کن، داڑے بھلو بھلو ماڑی ءُ ہرافتے ای زند ئٹ اولیکو وار خننگ اُٹ داڑے ایوان صدر، وزیراعظم نا اُرا، پارلیمنٹ، سینیٹ، سپریم کورٹ و میڈیا والا تا اُراک اوار ءُ جتاء جتاء ملک آتا سفارت خانہ غاک ساڑی ءُ۔ اقوام متحدہ، یورپی یونین و جہانی بندغی حق آتا بندغ آک ہم ساڑی ءُ ولے افسوز داڑے بندغی حق آتیکن ہیت کروکو کس اف، انصاف نا تصور ہم خنتیان چپ ءِ منہ وکیل صحافیک، سیاسی راہشون و بندغی حق آتا باسک آتیان بیدس دا بھلا شار اسہ چُھپ ءُ قبرستان ئسے نا ڈول خننگک، اندنو چھپی ئسے دن کہ بندغی کسکونے داڑے۔
نن 16 جولائی آ اسلام آباد ءِ سر مسن اینو ننے داڑے سینزدہمیکو دے ءِ، کیمپ ئنا اولیکو دے اسُل بھاز پِر کننگ ئس ولے پریس کلب نا مونا ٹینٹ خلنگ نا موکل رسینگتو ننے۔ اِرا دے ئنا پِر و مسٹمیکو دے ئنا باسن انگا دے ننا اُست ءِ ہُشاکہ ولے نن ہمو پِر و ہمو باسن انگا دے ئنا شیف آ تولوک ئسن و اینو اسکان ہمو ڈول ننا دیک گدرینگیسہ ءُ باسنی ئسے اندنو کہ ہرا سگ آن پیشن ءِ ولے ننا دوٹی ہرا عکس آک ءُ ہمو ننے حوصلہ ہمت و سگ اس تتنگ ءُ کہ دا بےدادی تے سگیسہ ان و مُستی ہم سگون، اسیکہ دے ئنا باسنی نا قہر وا پِر ئنا ظالمیک، ولے نن کل ءِ سگنگ ان ریاستی بےدادیک جتاء ءُ و ریاستی ایجنٹ آتا پارہ غان رسینگوکا بےدادیک جتاء۔
ننتون تولوک پیر انگا لمہ و بیوس انگا چُناک ءُ ہرا پِر ئٹی چُڑیسہ و یخ آن لڑزیرہ، باسنی نا ترندی آن تُسینگرہ، ولے اسلام آباد نا بست و بند نا است ئٹ زرس ہم رحم اف بلکہ دا ایہن رحم والو اُست تخیر ولے ہراتم کہ ”بلوچ“ نا ہیت بریک گڑا اوفتا سینہ غان اُست ہم اودیم مریک او اسہ ظالم ءُ دروشم اس کشیک۔
بلوچ ورنا تا جشوک جون آک اندا خار ئنا گواہی ایترہ کہ بلوچستان نا مڈی تیتون اوفتے مابت ارے اسلام آباد نا گروشک تروک آ ماڑی تیٹ لگوک آ ٹائل آک بلوچستان آن کشوک ءُ، اوفتا چُل آک بلوچستان نا گیس آن لگیرہ، کسر تیا ہنوک آ اُلاخ آک ننا مڈی تا سوب آن چلنگ ءُ، سی پیک، گوادر و بلوچستان نا پن آ لاہور و اسلام آباد ٹی میٹرو و بس آک چلیرہ ولے اسُل کس اس پاتو کہ نن بلوچ مڈی تے کاریم ئٹ ہتنگ آن نمن مرون، نن داڑے اندا امیت آ بسونن کہ بلکہ ریاست ننے بِنے بلکہ سپریم کورٹ تینٹ نوٹس ہلے، بلکہ میڈیا نا نمائندہ غاک ننے آن بلوچستان نا زمینی گواچن ءِ چاننگ کن بریر، نن سوچاسن کہ گوادر ءِ شہ رغ و بلوچستان ءِ ”ایلم“ پِن کروک آ قیادت بلوچ لمہ و ایڑ تا کاٹم آ مہر ئنا دُو ءِ تخو، مریم نواز ہرا اپوزیشن ٹی ئس گڑا بیگواہ بندغ آتا خاہوت آتا کیمپ آ بریسہ اوفتے است بڈی تس، داسا حکمران جوڑ مس حکومت نا طاغت اونا دوٹی ءِ داسا ننا پارہ غا تینا اسہ نظر اس ہم شاغنگ کن تیار اف۔
میڈیا، عدلیہ، سول سوسائٹی، و سیاست دان آک ہم ننے آن خنتے ڈھکیرہ۔ مریم نواز نا سوشل میڈیا ٹیم داسا ننے غدار پِن تننگ ءِ۔ اونا باسک آک ننا پروفائلنگ ءِ کننگ ءُ، سوشل میڈیا غا ننے کھرینگ تننگ ءُ۔ درو اسکان تحریک انصاف نا باسک آک ننا ٹپ آتا بے شاغارہ و مسلم لیگ ئنا بندغ آک ننے ٹپ تریسہ ئسر و تحریک انصاف ننتون ہمدردی نا ہیت کریکہ۔
نن بلوچ آک ریاستی بےدادی تیان بھاز سبخ سکھانن ولے پاکستان نا سیاسی ٹولیک ہر منہ سال آن گڈ خلنگ کنیرہ ولے سبخ سکھپسہ۔ اینو اوفک اقتدار نا نشہ ٹی مظلوم آتا زی آ ظلم کننگ ءُ و پگہ ہمو مظلومیت نا چادر شاغیسہ اُلس نا مونا برور۔ ننے مالو آن سما ئس کہ داڑے انصاف رسینگوف انتئے کہ ہرافتا گام تیا نن داڑے رسینگان اوفتے ہم دانگان ہچس رسینگو بیدس بےدادی آن، بےدادی نا گواچی کننگار و دروغ نا مقدمہ آتیٹ جیل ئٹ بند کننگار۔ اینو ڈاکٹر ماہرنگ، شاہ جی و گلزادی آنبار انگاک ہرا درو اسکان اسلام آباد آ بریسہ انصاف نا امیت نا خاطر تولوک ئسر، اینو جیل آتیٹ قیز ءُ۔ نن اینو نادیہ تون اوار اندا خاہوت آتیکن و زوراکی ئٹ بیگواہ مروک آ ایلم تیکن انصاف خواہنگ کن بسونن ولے داڑے حکومت نا رویہ بدلینگوک ءِ، درو نگران حکومت ئس، اینو بیرہ پن ئنا جمہوری حکومت ءِ۔ حکمرانی نا ڈول ہمو آمرانہ ءِ امرو کہ بے دادی فرزانہ مجید و سمی ءِ سگوئی تما، امرو کہ بےدادی ڈاکٹر ماہرنگ سگا، ہمونو بےدادی نن ہم سگنگ ان، ولے دا لڑ داڑے سلوف ننے آن گُڈ پین ہم برور بلوچ ایڑک اسلام آباد نا ظالم آ دروشم ءِ جہان نا مونا پاش کرور۔
دا ظالم و مظلوم نا جنگ ہمو دے اسکان برجاء مرو، ایسکان کہ راست کَھٹپ ایسکان کہ انصاف نا دے بلوچستان نا مش تیان ٹک تف۔ ننے دہشتگردی، آجوئی دوستی یا غداری نا شغان تروک آک بلکہ استان درینو کہ نن ہمو ریاست نا در آ ٹک ٹک کننگ اُن ہرادے نن دائسکان تینا تکنگ ان نن آئین و قانود و بندغی حق آتا رکھ ئنا جنگ کننگ ان ننا برانز اسہ پرامن مزاحمت ئسے ہرا سم، تڑی یا ٹپ آن شیف خلنگ مفک۔ بلوچستان نا اصل وارث نن ان نن مش تیا پٹ و میدان تیا ہم ظلم نا برخلاف توار بڑز کرینن۔ ننا زنک آک چھپ متنو نہ کہ چھپ مرون ننا لمہ غاتا خڑینک آک ننا ایڑتا خیسکہ غاک اسہ دے دا ملک ئنا اشتعماعی ضمیر ءِ سُرفور۔ نن پدا ہنون ولے ہورک انگا دُو تیٹ نہ یا انصاف ہلون یا مظلومیت نا اسہ پین گواہی اس جوڑ مریسہ، ننا جنگ ایسر مروف، دا جنگ داسا بناء مسونے۔
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔