مُسہ میجر افسر نا مرگ ئنا گواچی مننگ – ٹی بی پی سرگپ
بلوچستان ئٹ تدوکا اِرا ہفتہ غاک پاکستانی لشکر کن مرگ ئنا گواچی کروک پاش مسنو۔ ضلع آواران نا تحصیل جھاؤ ئٹ بلوچستان لبریشن فرنٹ نا سنگر ہلوک جلہو ئٹ میجر سید ربنواز طارق خلنگا، اندن بلوچستان نا بنجاہی شار کوئٹہ ئٹ جبل نور نا ہند آ بی ایل اے نا ایس ٹی او ایس اسکواڈ نا مقناطیسی بمب جلہو ئٹ فوج ئنا میجر انور کاکڑ مرگ ئنا گواچی مس۔ اندا وڑ ضلع مستونگ نا مَش تیٹ بلوچ لبریشن آرمی نا مزاحمت کار و پاکستانی لشکر نا نیام ئٹ مُرغن جھڑپ آتیٹ فوج ئنا میجر زید سلیم تون اوار کیہی کارندہ غاک مرگ ئنا گواچی کننگار۔
بلوچستان نا آجوئی کن کاریم کروک سلہہ بند تنظیم آتا ڈٹ بند جلہو آتیٹ ترندی بننگ آن پد پاکستانی لشکر نا جانی نسخان تیٹ پاش ودکی مریسہ ءِ، و بلوچستان نا اہم کسرک ہم بے رکھوک مسنو۔ دانا پوسکنا مثیل پاکستان نا وزارت داخلہ نا دا فیصلہ ءِ کہ شیعہ سیل و سواتی تیکن زیارتِ اربعین نا مسخت ئٹ ایران و عراق آ ہنوک آتیکن بلوچستان نا زمینی کسر ءِ بے رکھوک گوندسہ اوڑا رکھ خلنگانے۔
پاکستان نا وزارت خارجہ، وزارت داخلہ، بلوچستان حکومت و سکیورٹی ایجنسی تا دا اوار انگا فیصلہ غان پاش مریک کہ بھلو کچ ئسے آ فوجی جانی نسخان و بلوچ مزاحمت کار تا ڈٹ بند مرگ ئنا گواچی کروک جلہو آتیان پد پاکستان نا فوجی ادارہ غاک بلوچستان نا اہم کسر تیا تینا رٹ ٹہفنگ ئٹ بے سہب مریسہ ءُ۔
میجر افسر آتا مرگ ئنا گواچی مننگ بلوچستان ئٹ کاریم کروک تنظیم آتا سوگو طاغت و انٹیلی جنس لائخی نا پاش شاہدی ءِ۔ دا مرگ آک نہ بیرہ دا ہیت ءِ پاش کیرہ کہ مزاحمت کار آک داسہ فوجی درجہ بندی ٹی نیامئی تلہ نا افسر آتے ہم ٹک کننگ نا لائخی تخرہ بلکن دا ہم کہ اوفتا جلہوک آک بیرہ وختی کاروائی افس بلکن مرغنو ڈٹ بندی و راست معلومداری تیا تالان ءُ۔ دن انگا حالیت آتیٹ ریاست نا دا دعویٰ کہ بلوچستان ئٹ مزاحمت کار آتا زہم دیخس ءِ، زمینی گواچنی آن کشکنگانے۔ مُسہ میجر افسر نا مرگ ئنا گواچی مننگ پاش ءُ کلہو ئسے کہ سلہہ بند تنظیم آک نہ بیرہ تینا کاروائی تے شابیت کرینو بلکن او فوجی ڈھانچہ غا نفسیاتی زور شاغنگ نا حالیت ئٹ ہم بسنو۔