جاسم اسہ راجی ہیرو اس
نوشت کار: کمال جلالی
دی بلوچستان پوسٹ
جاسم اسہ اندن ءُ پِن اسے ہرا ننا دیہاڑ نا بشخ اس جوڑ مسنے و ساندہی کن ننا است آتیٹ زندہ مرو۔ او اسہ چپ ولے بھلو بندغ اس ئس ہرا تینا زند ءِ آزادی نا پاک انگا مسخت کن تِس۔ جاسم نا قربانیک، او نا مسخت و او نا ایمان ننے ہر وخت یات کرفو کہ آزادی بیرہ اسہ تغ اس آخہ بلکن اسہ گواچن اسے و دا کسر ئٹ قربانی تروئی تمک۔
جاسم نا کڑدار اسہ اندن ءُ کڑمبو چپی سے آن پُر ئس ہراٹی بے کچ طاغت ڈکوک ئس۔ او نا چپی اصل ئٹ او نا کڑمبی و او نا تہٹی ڈھکوک طاغت نا درشانی ئس۔ جاسم تینا عمل ئٹ ثابت کرے کہ آزادی نا دوئی کننگ بیرہ جنگی پڑ اسکان سلوک اف، بلکن او نا تعلق بندغ نا روح، ارادہ و ایمان تون ہم ارے۔ او چائسکہ کہ اسکان بندغ نا تہٹی آزادی کن جنگ کننگ نا جوزہ و ارادہ مف، اسکان او پیشن نا جہان نا پابندی تے پرغنگ کپک۔
“ڈغار نا عشق ہمو اسٹ انگا عشق ءِ ہرا کہنگ کن الیپک، ساندہ زندہ تِخک۔” جاسم نا دا ہیت نئے بیرہ او نا زند ئنا گواچنی ئس، بلکن او دا گواچن نا عکس ہم ئس کہ او نا تعلق تینا ڈغار تون اسہ کڑم ءُ مابت و وفاداری ئسے آ تالان ئس۔ ڈغار، ہمو لمہ ئس ہراڑ تون جاسم تینا اولیکو تعلق ءِ تخاسُس۔ او نا گامک ہر وخت تینا ڈغار تون اوار ئسر، و او نا روح ءِ ڈغار نا بطن ہر وخت جارات تِسکہ۔ جاسم کن دا ڈغار بیرہ اسہ جغرافیائی وجود اس التئو، بلکن اسہ زندہ ءُ گواچنی اس ئس ہراڑ تون او نا ہر تعلق گنڈوک ئس۔
جاسم ثابت کرے کہ آزادی کن بیرہ بدنی طاغت و سلہہ نا کمک ہلنگ مفک، بلکن اوڑکن اسہ سوگو ایمان، لپڑزہ مفروک ارادہ و سوگو عزم نا خواست مریک۔ او دا ہیت ءِ گواچن ئٹ بدل کرے کہ بندغ نا کل آن بھلا طاغت اونا ایمان و عزم مریک، ہرا اودے تیوہ سختی و چیلنجز آتون مون تننگ نا جیرت ءِ ایتک۔ جاسم نا زند دا ہیت ئنا شاہدی ءِ کہ آزادی نا جدوجہد ئٹ سرسہبی کن نئے بیرہ بدنی طاغت نا گُرج مریک بلکن داڑتون اوار اوار بندغ نا تہہ ئنا عزم و روحانی طاغت ہم درکار مریک۔
جاسم نا کلہو ہروخت ہندا ئس کہ آزادی اسہ راج اسیکن بیرہ اسہ سیاسی مفہوم اس اف، بلکن دا اسہ کڑمبو روحانی گواچنی ئسے ہرادے ہر بندغ ءِ زند ئٹ اہمیت تروئی ءِ۔ او نا قربانی تا مسخت بیرہ تینا راج ئنا آزادی اسکان سلوک الو، بلکن او خواہسکہ کہ ہر بندغ دا ہیت ءِ سرپند مرے کہ آزادی بیرہ جغرافیائی سیم آتیان ہیمون مفک، بلکن دا ہر بندغ نا تہہ ئنا آزادی نا اسہ کلہو اس ہم ارے۔ جاسم ننے ہیل تِس کہ آزادی نا گواچنی مفہوم بیرہ اسہ خاص ءُ علاقہ ئسے نا آزادی اف، بلکن بندغ نا تہہ ئنا آزادی ءِ، ہرا اودے تینا بخت ءِ تینٹ لکھنگ نا طاغت ایتک۔
جاسم نا روح اینو ہم ہندا ڈغار ئٹ رہنگک ہراڑ کن او تینا ساہ ءِ تِس۔ او پروم نا یخ انگا تہو تیٹ، بولان نا خرن انگا خلق آتیٹ، زامران نا بڑز و بالاد آ مش تیٹ، و ہمو کل ہند آتیٹی رہنگک ہراڑے آزادی کن دتر وہفنگا۔ جاسم نا قربانی و اونا جدوجہد نا زہم دا ڈغار آ ہر ساہت مارینگ مریک۔ اونا نت تا توار اینو ہم ہمو کسر تے ئٹ بِننگ مریک. ہرافتے او آزادی کن گچین کریسُس۔ جاسم ولدا برو، آزادی نا زیبا انگا سہب ئتون اوار” — دا لوز آک نئے بیرہ اومیت نا شِروخ ءُ، بلکن اسہ سوغند اس ہم اریر کہ ہمو دے برو ہراتم جاسم نا قربانیک رنگ ہتور و آزادی نا رژنائی ننا وطن ئٹی ٹک تروئے۔
جاسم نا شہیدی بیرہ اسہ بندغ ئسے نا کہنگ الو، بلکن دا اسہ اندنو تدینی اس ئس ہرا ہر بندغ ءِ دا سبخ ءِ تِس کہ آزادی نا کسر اسل اڑزان مفک۔ جاسم نا قربانی تا ہر ساہت ننے یات کرفک کہ آزادی اسہ بے نرخ ءُ ٹیکی ئسے ہرادے ہر بندغ تینا تیوہ زند ئنا عزم و جیرت ئٹ دوئی مریک۔ ننے دا سکھفے کہ آزادی نا مفہوم وختس ہم اسہ کچ ئسے اسکان مفک، بلکن دا اسہ اندنو است خواہی ئسے ہرا بندغ نا است ئٹ ساندہ زندہ مریک، و داڑکن اخس در قربانی تننگ مرے ہموخس ہی زیات آزادی نا قدر مریک۔
جاسم ساندہ ننا است آتیٹ زندہ مرو، و او نا قربانیک ننے ہروخت اندا ہیت آ باور کرفور کہ او دے الم برو ہراتم آزادی نا رژنائی ننا وطن نا آسمان ئٹ چمک ترو۔
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔