غلامی
نوشتکار: جعفر قمبرانی
دی بلوچستان پوسٹ
نے سما اف مگہ کہ غلامی انت ئسے؟ غلام آ قوم ئنا کل آن بھلا غلامی تو ہندادے کہ اودے تینا حالیت نا سما تمپک۔ بلوچ نا بھلا ویل دا پہہ مفرنگ ءِ کہ ای اسہ غلام ءُ قوم ئسے اٹ۔ حالانکہ دا تیوہ غا خطہ ٹی بلوچستان و فلسطین آنبارو زدہ ءُ ڈے پین افک۔ چندیک ہر وخت فلسطین کن ماتم و پریاد کیرہ ولے دن اف کہ بلوچستان نا حالیت اوفتیان جتا مرے۔ اوڑے ماڑیک دڑنگ ءُ تو داڑے ننا کچہ انگا اُراک و گدان آک۔ ننے تو ہندن غلام تخنگانے کہ نن تینا بھلا ڈیہہ ئٹی بھلو ماڑی جِک کننگ کتنن۔ اگہ اینو داڑے ماڑی مروس تو اوفتے ہم الٌم دڑنگ آ خناسا۔
غلامی نا کل آن بھلا چاہنداری دادے کہ ہراڑے غلامی ارے ہموڑے کوزہ گیر نا زوراکی، بندغی مڈی تا لٹ و پل، راجی آ دود آتا بندی کننگ تون اوار چاگڑدی گندئی تیٹی ودکی و کل آن ودیک دا کہ بِین ئنا گواچی کریسا چھپی نا سبخ تننگ۔ اینو نن کل چانہ کہ زوراک ننا ڈیہہ آ انت کننگ ئٹی ءِ ہُر؟ ولے نن انتئے چھپ اُنک انتئے؟ مگہ نی سرپد افیس؟
غلامی ءِ ہر بندغ تینا وڑئٹ درستی راستی کرفسا کرو ولے بلوچ نا خڑک آ غلامی نا اسہ ہندن ءُ چاہنداری ئسے ہرادے بیان کننگ کچ آن بڑزا بھیم بش کروک ءِ۔ راست چاس تو بلوچ قوم نا نن و دے غلامی ٹی تدینگرہ۔ سہب و نن اسہ چاگڑدی بے آسودہی ئسے نا گواچی ءُ۔ ایلو ننا بھلا ویل دادے کہ ننا قوم نا باتی تیان بھلو کچ اس دائسکان غلامی نا درستی راستی ءِ اسہ آجو ءُ راج ئسے آنبار ہریرہ اخاکہ تینا جند ئنا حالیت نا وڑئٹ۔ دا تو پک ءِ کہ غلامی بیرہ زندان ئٹ گواچی مروک اسہ بندغ ئسے نا حالیت ءِ پاپسہ ولے ہر ہمو بندغ ہرا زندہ ءِ ٹاپرینگک ولے زند ئنا ہر ہمو گرج آتیان نا واخب ءِ ہرا اسہ آجو ءُ قوم اسیکن المی ءُ۔
ننا خاہوت ئٹ چنکا گودی ءِ سوج کننگا کہ ”رُژن کامریڈ اس مریسا؟“ او بیدس ہیت کننگ آن اشارہ کریسا باء غا دو درے و خف تیٹی ہلک کہ چھپ کبو۔
یانی غلامی نا اولیکو نشانی ءِ ہُر کہ ہر بندغ بھیم ئنا گواچی ءِ۔ چنک بھلن پیر ورنا، شئے و نا شئے! پک مس کہ غلامی قوم ئنا ہر ہمو چنا آن بنا کیک ہرانا با آن پاڷ ئنا گند بریک۔ ہر ہمو بھلا پیر مڑد اسکان سر مریک ہرادے راجی وڑئٹ ہچبر پین بکار کننگ مفک۔ بلوچستان اٹ ہر ہمو بندغ غلام ءِ ہرا دا ڈیہہ ئنا والی و وارث ءِ یا بلوچ نا پن ئٹ چاہندار ءِ۔
دا قوم نا حالیت داڑاسکان پراگندہ ءِ کہ کہوک مِش تا بندی زالبول ئسے نا عزت، جیرت نا پن آ پیشخانڈِنگک ولے زند ئٹی بھیم بش کروک انگا حالیت آتا گواچی مروک آ زالبول تیکن کس ہچبر کچیپک۔ پین ہچ آخہ نن بیرہ دا سوج آتا زی آ ٹک خلین گڑا ننے انت ورندی رسینگو: ننکان اجمب کریسا بش مننگ و دانگ اینگ ہریسا پدی بے وسی ئٹ تینا لیپ ئٹی پترینگ مگہ غلامی اس اف؟ تینا اُرانا کتاب آتے چاڑ کریسا منا کتاب ءِ بے ڈس کننگ مگہ غلامی اس اف؟
تینا پیرہ نا زنگی آ توفک ءِ لیپ آتا کیرغ آن غُت تریسا اودیم کننگ ہرا آجو آ قوم آتا کاریم ئسے؟ تینا ایڑ لمہ تا وہوک آ خڑینک آتے ہریسا خن تے شیف کننگ ءِ آجو قوم ئسے نا نشانی پاسا مگہ؟ قوم ئنا زالبول تا دا حالیت آن مغول مننگ ءِ غلامی آخہ گڑا انت پاسا کہ اوفک پِر ئنا شنزہ و بدن ءِ ٹنگ کروک دے ئنا جوژ تروک انگا لارہ ٹی سیال ئنا پانادہ آ یک تنیا تموک مریر؟
اسہ خالی آ سیٹ و نوکری کن ہزار آ ورنا تے لین ئٹ سرہ مُسن خنس نے انت لگک نن آجو اُن؟ ڈیہہ ئنا فکر ءِ کہوک و جیب ئنا ءِ کاٹم آ سوار خننگ اُس انتئے؟ یخین ئٹ نن اینو کسر آن چھپ اُنک۔ نن کہ جیب ئنا فکر بھلن و ڈیہہ ئنا فکر ہچ آن حساب ءِ۔ دن افک کہ قوم اس آجو مرے گڑا اودے داخس ہم سما مف کہ کنا گواچن آ کسر انت ءِ؟ تپرہ ننا جیرت اودیم مسونے یا ننا ڈیہہ آن خدا بے ڈس ءِ؟ نئے جیرت وخت آ بکار بننگ ءِ نئے کہ خدا توار ءِ خف تورک۔ وخت اس سوچ خلیوہ کہ ننا توار ترند اف یا ننا گلزمین ہنداخس کڑمب ءِ کہ آزمان آن مر و اسل بھاز مر ءِ؟ ہفتاد سال مس ولے توار ہچبر اوڑے سر مننگ اف۔ انتئے؟
غلامی داکان بڑزا انت مریک کہ نی تینا مڈی تیان تینٹ ہچبر سواد ارفنگ کپیس۔ گیس، کولہ، خیسن پتل و دائے تے یلہ کر، اوفتا پاپرہ، وختس کہ نی تینا بندغی مڈی تے بھرم ئٹی بے ڈس کیس۔ لمہ غاک چنا تے بیرہ دا سوب آن ودی کریسا کیر تانکہ ورنائی ٹی بھلا اژدہا نا باٹی بٹوئی ءِ تا۔
بے ڈس، بے جون و جوژ ہلوک۔
غلامی نا داکان پد نی امر درستی راستی ءِ کروس کہ نا ہزار انگا ورنا تا دِتر نا پڑی ہم تینا ڈیہہ آ تمنگ کن سِٹوکاہی خلیک ولے نئے۔ غلامی ہندا اف مگہ کہ راج ئنا شاعر ادیب نوشتکار، چاہندار و دائے بیرہ ہندا خاطران چھپ جوڑ گنڈوک ءُ کہ نوائے کنا اِرغ نا باخو پُلنگو۔ پک انگا ہیت دا کہ نن تینا اِرغ نا باخو کن ہم سیال نا دو تیا ہروکن و ننے تینا غلامی آ باور بفک، انتئے؟
دا حالیت ئٹی کل آن بھلا کلہو انت مننگ کیک نے سما ءِ؟ دا کہ بلوچ نا ہر چنا ءِ سما مرے کہ ای غلام اٹ، کنا لُٹ پل مننگ ءِ۔ کنے کنا اِلہ مڷ، ہمسایہ و ایلم آن بھلو دژمن اس ارے ہرا پیشن نا کوزہ گیر ئسے۔ کنا بھلا دژمن ہمودے ہرا کنے آن کنا بلوچی دستار، پڑس، بجار ایلو دود آتیتون اوار کنا بلوچی ایمان و جیرت ءِ ہم پلانے کہ ہرا جیرت اوڑکن قہر اس مسکہ۔
ای دن غلام اُٹ کہ کنا چوچہ پاچہ نیاڑی نرینہ غاک ہم کنے آن پلنگیسا بے ڈس مسنو ہرافتا سوب آن گلزمین ساہ ہلیک۔ مننگ کیک کہ نن غلام متونہ تو اینو گلزمین ساہ ہلککا و ہمو باتیک ہم ہرافتا ساہ تہار آ کوٹی ٹی ہنیسہ ءِ۔ نن مغول اُن یا آجو مننگ نا اہمیت آن ناواخب!
باوہ آدم بہشت نا بندی گری آن آجو مننگ کن خطاواری نا پن ءِ ارفنگ کن تیار مننگ کیک گڑا نن انتئے نت دو خلنگ کپنہ؟ باور کیس بلوچ نا غلامی اگہ پہہ مننگ مرے تو است دڑد آن ہندن موڷ کرو دنکہ جوژ ہلوک آ بدن۔ اینو دا قوم نا کل آن بھلا ویل دادے کہ قوم ئنا پدریچ دا پہہ مننگ اف کہ نن غلام اُن و ننا زند تہار ءِ۔ تانکسکان ننا دا حالیت ننے ٹی بے جاراتی ودی کننگ کتنے، چاس کہ نن تینا مزل آن اسل مُر اُنک، اسُل مر۔
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔