سیال نا استاد
نوشت: کوہ زاد بلوچ
دی بلوچستان پوسٹ
خوانندہ آ ورناک راج اسیٹی آسرات ءُ زند اس ودی کننگ کن بھلو کڑد اس سر ایترہ۔ تینا راج ئنا ویل، جنجال و جیڑہ آتا ایسری مرے یا کہ جہان ئٹ چاگڑدی، زرگزرانی و ٹیکنالوجی نا پِڑ آ شون ہلنگ نا رمب ئٹ فیصلہ سازی نا تران مرے، خوانندہ ورناک تینا مٹ تینٹ ءُ۔ اواری اٹ، پیشن نا بروکا قوضہ گیر ئسے مڑنگ نا ہیت مرے یا زورآور ئسے نا مُون آ تینا دود و ربیدہ، ڈغار، راج و راجداری نا رکھ ئنا مرے، خوانندہ ورناک بھلو کچ اسیٹ راجی جیڑہ آتے ایسر کننگ نا جہد نا عملی بشخ مسنو و جیڑہ آتے ایسر کننگ ئٹ سرسہب مسنو۔
ولے تینا ڈغار نا بابت ئٹ تران مرے تو ہیت پاش مریک کہ دا راج ئٹ خوانندہ ورنا تا چنکو بشخ ئسے آن بیدس، گیشتر خوانندہ ورناک تینا راجی زمہ واری، دود و ربیدہ و جہد آن بے سما مروک سیال نا دُو تے سبک کننگ ئٹ اوار ءُ۔ داڑے سوال بڑزا مریک کہ کنا ڈغار نا خوانندہ ورنا انتئے راجی جہد آن بےچکار ءِ تینا بشخ ءِ اوار کننگ اف؟
دا بابت سوچ و تران آن پد راستی پاش مریک کہ اینو بلوچ راج خاص لُٹ و پل و زنک ایسری نا گواچی اف بلکن ننا بھلو کچ اسیٹ ورناک دماغ تیان خسّی کننگانو۔ اینو کنا راج نا خوانندہ ورنا تا عقل آک ہم سیال ئنا زورآوری نا مونا تالان ءُ۔ اوفتا مزغ آتا سوچنگ و سوج ہرفنگ نا لائخی تے ختم کننگانے۔ قوضہ گیر و اونا پالیسی تے چیلنج کروکا جیرت ءِ ایسر کننگ نا پالیسی اس ودی مسنے۔
اوفتا ذہن سازی نا عمل ہندن مننگ ءِ کہ او تینا زمہ واری تے گیرام کننگ ءُ۔ تینا راج نا ویل و راجی جہد آن بے سما ریاست نا دروغ و فریب آتا رند ئٹ گام کرسا ءُ۔ او دا گیرام کرینو کہ دا ڈیہہ دا راج دا راجی جہد اوفتا گچینو سہب اسیکن برجا ءِ۔ شومی قسمت، ننا خوانندہ ورنا بے سما قوضہ گیر نا فریب آتا گواچی ءِ.
ورنا تا سوچنگ و سیاسی عمل نا بشخ مفرنگ نا گیشتر سوب آک مننگ کیرہ۔ ولے داڑے ہمو کڑدار تا زی آ تران المی ءِ ہرا کنا اُرا نا باتی ءُ ولے قوضہ گیر ئسے نا دو ئٹ بہا مننگ نا سوب آن یا چندی پیسہ کن کنا ورنا تا چھپی ئٹ ذہن تا نسل کشی ءِ کننگ ءُ۔ جی ہئو نم راست سرپد مسرے۔ ای ہمو کڑد آتا ہیت کننگ اٹ ہرافتے ننا چاگڑد ئٹ ”استاد“ نا پن تننگانے۔ دا ہمو کڑدار آک ءُ ہرا کنا نسل کشی ئٹ اوار ءُ و دژمن نا دو تے سبک کننگ ئٹ بھلو کچ اسیٹی بشخ ہلکنو۔
اینو ہندا استاد پنی آ تنخواہ دار آک کنا ورنا تے تینا راجی زمہ واری تیان مُر کننگ نا سوب جوڑ ءُ۔ اوفتے تینا دود و ربیدہ و لمئی بولی ءِ گیرام کرفنگ ئٹ گندہ ءُ کڑد اس مون آ ہتنگ ءُ۔ خوانندہ ورنا تے بھیم ئسے نا گواچی کننگ ءُ۔ اوفتا مزغ آتیٹ ودی مروکا سوج آتے نہ بیرہ مسخ کننگ نا کوشست کننگ ءُ بلکن دا تنخواہ دار آک ہمو خوانندہ ورنا تا ذہن آتا چھپی ئٹ نسل کشی کننگ ءُ کہ دا ورنا تا مزغ ئٹ مون مُستی تینا چاگڑد نا ویل آتا ایسر کننگ نا سوب آک ہرا کہ اسلام آباد نا ماڑی تا بنیات ئٹ گنڈوک ءُ اوفتا پارہ غا چک ہم خلنگ کپس۔
گڑا سنگت، دا تنخواہ دار استاد آک ہرا کہ کنا ڈیہہ ئنا باتی تا چھپی ئٹ مزغ آتے کُنٹ کننگ ئٹ تینا بشخ آتے شاغنگ ءُ، ہرا کہ دژمن نا دو تے سبک کننگ ءُ، کنا راج ئنا شہید آتا جہد ءِ شیف خلنگ نا کوشست کننگ ءُ۔ ای دافتے تینا نہ بلکن پیشن نا بروکا ”سیال نا استاد“ پاوہ۔ ای دافتے سامراج نا استاد پاوہ ہراکہ سامراجی طاغت نا مون آ کاٹم شیف کرینو۔
جی آھو؛ سیال نا استاد؛ سامراج نا استاد و تینا ڈیہہ آن ناواخب آ استاد۔
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔