پاکستانی لشکر اُرا تیا تلاشی کننگ نا وخت ہندی تے بیدادی نا گواچی کرے، ہندن چار بندغ ءِ دزگیر کریسہ نادرست ہند آ سر کننگا۔
شابیتی حوال تا رد ئٹ بلوچستان نا ضلع خضدار نا تحصیل زہری داسکان پاکستانی لشکر نا آپریشن نا پلویڑ ئٹی ءِ، ہراڑے فورسز کرفیو خلنگ آن تیوہ ہن و بر نا کسر تے بند کرینے۔
زہری آن رسینگوک حوال آتا رد ئٹ پاکستانی لشکر نا بھلو کچ اس دا وخت آ نورگامہ شار ئٹ ساڑی ءِ، ہندن ہندی تے اُرا تیٹی مننگ نا پاننگانے۔
درو رسینگوک حوال آتا رد ئٹ پاکستانی لشکر اُرا تیا چھاپہ خلنگ نا وخت اسہ زالبول اسیتون اوار چار بندغ ءِ دزگیر کریسہ نادرست ہند آ سر کرینے۔
زہری پاکستانی لشکر نا پارہ غان دزگیر کروک زالبول نا چاہنداری صفیہ بی بی نا پن ئٹ ہندن نرینہ آتا چاہنداری زاہد ولد عزیز، آصف بلوچ و اسد نا پن تیٹ مسونے۔
یاتی مرے کہ 15 ستمبر آ پاکستانی لشکر نا آسمانی جلہو آتا نتیجہ ئٹ اِرا زالبول تون اوار ہفت بندغ مرگ ئنا گواچی مسوسر، ہرانا 10 دے آن گڈ 27 ستمبر آ پاکستانی لشکر زمینی آپریشن نا بناء ءِ کریسس۔
دا نیام ئٹ کیہی ہندی تے دزگیر کننگ نا حوال آک ہم رسینگانو۔
زہری ئٹ برجاء آپریشن نا سوب علاقہ نا بندغ آک تدوک اِرا ہفتہ غان بند ءُ، ہندن فورسز زہری آ ہن و بر نا تیوہ کسر تے بند کرینے و علاقہ ئٹ انٹرنیٹ و موبائل سروسز ہم بند ءِ۔