بلوچ یکجہتی کمیٹی تینا اسہ بیان اسیٹ پارینے کہ بی وائی سی نا بندی راہشون آتا خاہوت و آل پارٹیز آتا پارہ غان درو کوئٹہ پریس کلب ئٹ ڈاکٹر ماہ رنگ بلوچ، صبغت اللہ شاہ جی و ایلو بندی راہشون آتے بنفوک غیر منصفانہ سزا تا برخلاف اسہ اہم پریس کانفرنس اس اڈ تروئی ئس۔ واہم بست و بند تینا خیال آتا درشانی کننگ و سیاسی مسخت ءِ مون آ تخنگ نا بنداوی جمہوری حق ءِ پُلیسہ پریس کلب ئٹ پریس کانفرنس نا موکل تننگ آن نمن مس۔
ترجمان پارے کہ پریس کلب نا دروازہ بند مننگ آن گڈ ہم خاہوت آک چُپ متوس و او بیوسی آن وائس فار بلوچ مسنگ پرسنس نا برانزی کیمپ ئٹ تینا پریس کانفرنس ءِ اڈ تسر ولے اوڑے ہم پولیس و ڈھکوک ادارہ آتا بھلو کچ اس مُچ مریسہ خاہوت، سیاسی باسک و اوار مروک آ بندغ آتے بھیم ئنا گواچی کننگ ءِ بنا کرے۔
او پارے کہ پریس کانفرنس نا ایسری آ ڈھکوک ادارہ آتا ایجنسی تا کارندہ و پولیس آک کانفرنس ئٹ پشتون تحفظ مومومنٹ نا راہشون زبیر شاہ ءِ زوراکی ئٹ تینتو دریر۔ بیرہ ہندا آخہ بلکن اِرا ہندی دکاندار، ہرا بندغی ہمدردی نا بنداؤ آ اوار مروک آتے دیر تسوسر ، اوفتے ہم دزگیر کریسہ نادرست ہند آ سر کننگا۔
ترجمان پارے کہ دا تدینیک ہمو گواچن ءِ پاش کیرہ کہ ریاست داسا بیرہ سیاسی باسک و بندغی حق آتیکن توار بڑز کروک آتے ٹک کپک بلکن ہمو بندغ آتے ہم سزا تننگسہ ءِ ہرا بیرہ بندغی ہمدردی و اخلاقی ذمہ واری ءِ پاش کیرہ۔ ہراتم پریس کانفرنس آتیا رکھ خلوک مرے، ہراتم زہمی خاہوت آتے تینا ہیت آتے کننگ کہ جاگہ تننگ مف، گڑا دا اسہ جمہوری چاگڑد ئسے نا آخہ بلکن زوراکی، خلیس و سیاسی بدل نا نشانی ءِ۔
ترجمان پارے کہ نن خواست کینہ کہ دزگیر مروک بندغ آتے دمدستی یلہ کننگ مرے، سیاسی کاریم تا بیدس پڑو آن خلوک رکھ آتے ایسر کننگ مرے، و زہمی خاہوت آتے تینا توار بڑز کننگ نا حق ءِ تننگ مرے۔