پی ایچ ای و ضلعی بست و بند آ بے سمائی نا دوبہ، دیر تِننگ و دیمروی کروک ڈٹبندی تا انصاف ئٹ بشخ کننگ نا خواست
شابیتی حوال آتا رد ئٹ بلوچستان نا علاقہ کوہلو ئٹ کُننگ کن دیر مفننگ نا برخلاف ہندی شاریک برانز کرسا کوہلو، سبی کسر ءِ ہر وڑ ئنا ہن و بر کہ بند کرینو، برانز ئٹ میر ہزار وڈھ تون اوار جتا علاقہ آتا ہندیک اوار مسر۔
برانزی تا پاننگ ئس کہ علاقہ ئٹ کُننگ کہ صاف ءُ دیر مفننگ نا برابر ءِ، ہرا نا سوب شاریک بندوی گُرج آتیکن سختی تیتو مون تننگ ءُ، ہندن تعلق تخوک محکمہ پبلک ہیلتھ انجنیئرنگ ( پی ایچ آر) و ضلعی بست و بند دا جیڑہ ءِ حل کننگ نا کوشست ئٹ بے سہب مسنو۔
برانزی تا رد ئٹ برانز آن مالو کیہی وار پی ایچ ای کالخواہ و ایلو تعلق تخوک ادارہ آتے دیر ئنا مفننگ نا جیڑہ نا پاننگ مسوسس، واہم ہچو عمل مون آ خننگ ئٹ بفننگ نا سوب او برانز اڈ تننگ آ بیوس مسر۔
برانز کروک آک دوبہ خلکر کہ بلوچستان سٹین ایبل ڈیولپمنٹ انیشی ایٹو نا ردئٹ منظور مروک کیہی واٹر بوڑ و ایلو دیمروی اسکیم آک اُلسی خواست آتا جاگہ غا اسہ کچ ئسے اسکان بندغ تے سر کننگانے، ہرا نا سوب علاقہ ئٹ احساسِ محرومی و بنداوی ویل آتیٹ پین ودکی مسنے۔
برانزیک خواست کرینو کہ دیر مفننگ نا جیڑہ آ دمدستی نوٹس ہلسہ زہمی علاقہ آتیٹ کُننگ نا دیر ئنا ویل ءِ حل کیر، ہندن دیمروی کروک ڈٹبندی تا صاف و انصاف کننگ ئٹ بشخنگ ءِ یخینی جوڑ کیر۔