مستونگ ئٹی کوئٹہ کراچی بھلا کسر تے اوار کروک پول آتے بمب آتیٹ ٹک کننگ نا چرجوہی برجا ءِ۔ ہراڑے نادرست آ بندغ آک ارا پین پول ءِ شورہ تراک تیٹ بھس کریر۔
وسیلہ تا رد ئٹ سئے شمبے نا نن کھڈکوچہ نا علاقہ ریکی بوز نا ہند آ بھلا کسر نا زی آ کسر تے اوار کروک پول اس تراک ئسے ٹی خلنگا۔
تراک ترند وڑ ئنا اس ئسک، ہرانا سوب آن خڑک ئنا ارا تا چھت آتے ہم نسخان رسینگا۔ واہم تدینی ٹی ہچو جانی نسخان ئسے ناحوال رسینگتنے۔
ایلو تدینی ٹی چوتو مل نا خڑک اسہ پین کسر اس اوار کروک پول ئسے تراک ئسے اٹ بھس کننگا۔ ہڑتوما تدینی تیان پد کوئٹہ کراچی کسر آ ٹریفک نا ہن و بر زیمی مننگ نا خلیس نا درشانی کریسہ ءُ۔