بلوچستان نا ضلع لسبیلہ ٹی اوتھل نا ہند وایار فارم آن خڑک پنجگور آن کراچی کن ہنوکا مسافر کوچ ویل نا گواچی مس، ہرانا سوب آن 14 مسافر بیران و 15 ٹپی مسونو.
ایدھی حوال آتا رد ئٹ جوْن و ٹپیک سول ہسپتال اوتھل کن دننگار. بیران مروکا بندغ آتیٹی چنا تون اوار پنچ زالبول اوار ءُ، اندن ٹپی تیٹی 8 بندغ نا حالیت خلیس نا ہد اسکان بد پاننگک ہرافتے بنائی دوا درمان آن گڈ کراچی آ دننگا.
ٹپی تا رد ئٹ مسافر کوچ ءِ شکست ہندی وخت نا رد ئٹ نن نا دو بجہ غا مونا بس، بنائی ٹیم و بست و بندی کوالخواک مسہ گھنٹہ آن گڈ جاگہ غا سر مسر ہرانا سوب آن بندغی ساہ تا پوک مننگ ئٹ ودکی مس۔
یاتی مرے کہ بلوچستان ٹی داسہ منہ وخت آن روڈ ویل آتیٹی ہڑدے ودکی مریسہ ءِ و روڈ ویل آتا بنماسی سوب آتیٹی تنک و بد حالیت آ روڈ آتیان بیدس ڈرائیور تا بے پرواہی ہم ارے.