بلوچستان نا ساحلی شار گوادر ٹی سلا بند بندغ آتا جہلو ٹی پاکستان نیوی نا کیو آر ایف نا اسہ کارندہ اس مرگ نا گواچی و اِرٹ ٹپی مسونو۔
حوال آتا رد ئٹ جیونی آن گنز آ ہنوک پاکستان نیوی نا کیو آر ایف گاڑی آ سلاء بند بندغ آک جہلو کریر ہراٹی اسہ کارندہ سہیل مرگ نا گواچی مس اندن رضا و نعمان پن نا کارندہ آک ٹپی مسونو۔
جیونی نا کمکار کمشنر راجہ اطہر عباس نا جلہو ءِ پک کریسہ پارے کہ جہلو ئٹ اسہ کارندہ اس مرگ نا گواچی و اِرٹ ٹپی مسونو، جلہو کروک آ جلہو آن گڈ نرنگ ئٹ سرسہب مسر۔
نیوی، کوسٹ گارڈ و ایلو فورسز آک ہند آ سرمریسہ جوْن و ٹپی تے ہسپتال آ سرکریر۔ اندن نروک جلہوکار آتا پٹ و پول کن علاقہ نا ایب کیب ءِ رکھ کننگانے۔
جلہو نا ذمہ واری کس ارفتنے، دا علاقہ آتیٹ بلوچ سلاء بند آجوئی خواہوک تنظیمک جلہو تیٹ اوار ءُ۔