بلوچستان نا علاقہ مشکے و کوئٹہ ٹی جتا ویل آتیٹ ارا بندغ مرگ نا گواچی و ارٹ ٹپی مسونو۔
حوال تا رد ئٹ مشکے ٹی مش ئنا کرود تمینگ آن اسہ خواری کش اس مرگ نا گواچی مس اندن اسٹ ٹپی مسونے۔ گیشتر حوال تا رد ئٹ مشکے نا علاقہ ٹی ٹریکٹر ٹرالی ٹی مش شاغینگ نا وخت آ مش ئنا کرود تما ہرانا سوب آن بیست و دو سال ئنا مزور بانڈیل گجر مشکے آن تعلقدار حسن نا مار محمد صادق مرگ نا گواچی مسونے و نوزدہ سال ئنا خواری کروک بانڈیل گجر مشکے آن تعلقدار لیاقت نا مار شہباز ٹپی مسونے، اندن ٹپی و مرگ نا گواچی مروک ہندی ہسپتال آ سر کننگانو۔
اندن پین حوال ئسے نا رد ئٹ کوئٹہ ٹی سم کاری نا جتا ویل آتیٹ اسہ بندغ اس مرگ نا گواچی و اسٹ ٹپی مسونے۔
سیکورٹی کوالخوا تیان رسینگوک حوال تا رد ئٹ یک شمبے نا دے کوئٹہ نا علاقہ علمدار روڈ آ سلاء بند بندغ آتا سم کاری آن 38 سال ئنا روستم علی نا مار صحراب مرگ نا گواچی مس ہراڑان گڈ جون دمدستی وڑ ئٹ ہسپتال آ سر کننگانے ہراڑے المی کارروائی آن گڈ خاہوت نا دو ٹی تننگا۔
اندن پین حوال ئسے نا رد ئٹ شاوکشاہ روڈ آ سلاء بند بندغ آک سم کاری کریسہ اسہ بندغ ئسے بھاز ٹپی کریر و نرار، ٹپی آ بندغ دمدستی وڑ ئٹ سول ہسپتال کوئٹہ آ سر کننگا ہراڑے اودے دوا درمان کننگا، ہڑتوما ویل آتون ہمگرنچ پین سر و سوج پولیس کننگ ءِ۔