بلوچستان نا دارالحکومت کوئٹہ ٹی ٹہیفوک جامعہ بلوچستان آن تدوکا دے تیٹ زورٹ بیگواہ کروک اِرا خوانندہ نا یلہ مفننگ نا برخلاف احتجاج نا لڑ برجاہ ءِ۔
جامعہ بلوچستان و کوئٹہ ٹی تعلیمی ادارہ آتا برانزی بند مننگ آن گڈ پد مان پد برانز نا لڑ ئٹی اینو تربت، موسیٰ خیل، نوشکی، زہری، خضدار، لورالائی، دالبندین، اوستہ محمد، قلعہ سیف اللہ تون اوار ایلو علاقہ آتیٹ کالج آک و اسکول آک بند کننگانو ۔
طلباء تنظیم آتا پارہ غان اوار وڑ ئٹ برجاہ پڑو ٹی پاننگا کہ جامعہ بلوچستان ٹی تدوکا اِرا ہفتہ آن خوانندہ آک تینتون اوار خوانندہ آتا بیگواہ نا بر خلاف برانز آ تولوک ءُ ولے داسکان بیگواہ خوانندہ آتے مونا اتنو۔
او پاریر کہ بیگواہ خوانندہ آتا یلہ کپرنگ نا برخلاف خوانندہ تنظیم آتا پارہ غان اینو 24اکتوبر آ بلوچستان نا دارالحکومت توں اوار تیوہ آ بلوچستان ٹی جامعہ، کالجز، پروپیشنل و نن پروفیشنل تعلیمی ادارہ آتیٹ تعلیمی کاریم پورو بائیکاٹ کریسہ بند کننگانو۔
پڑو ٹی پاننگا کہ ہراڑے ہم بند و بست نا پارہ غان بائیکاٹ ءِ بےسہب کننگ یا بدنظمی ودی کننگ نا کوشست کننگا گڑا اسہ ہم بد ءُ ویل ئسے نا ذمہ وار امو ادارہ نا سر کماشی و بند و بست مرو۔
یاتی مرے ہڑتوما خوانندہ آک سہیل بلوچ و فصیح اللہ ءِ یک نومبر بلوچستان یونیورسٹی آن بیگواہ کریسر، ہراڑان گڈ خوانندہ تنظیم آک برانز نا پڑو کریسہ یونیورسٹی ءِ تیوہ آ کاریم تیان بند کریسر –