امریکہ نا ریاست مشی گن ٹی سم کاری آن مسہ بندغ بیران و 8 ٹپی مسونو۔ سم کاری نا ویل مشی گن ہائی اسکول ئٹ مونا بس، کہوک آتیٹ 14 و 17 سن ئنا مسڑ و 16 سن ئنا مار اوار ءُ۔ ٹپی مروک آتیٹ استاد آک ہم اوار ءُ۔
اسکول ئٹ جلہو کروک ہم 15 سال ئنا ورنا ئس اس ہرادے پولیس دزگیر کرینے۔ سم کاری آکلینڈی کاونٹی نا آکسفورڈ ہائی اسکول ئٹ کننگا، رپورٹ آتا رد ئٹ جلہو ئٹ استعمال مروکا توفک ءِ جلہو کروک نا باوہ چار دے مست ہلکس۔
جلہو کروکا ورنا جلہو آن مست توفک نا عکس ءِ سوشل میڈیا غا شینک ہم کرے۔ داسکان دا درست متنے کہ جلہو کروک او مسہ چنا تے ٹک کرینے یا اونا پین مقصد ئس اس۔ ہندی گورنر نا پاننگ اس کہ دا لمہ باوہ کن اسہ خوفناک و تغ ئسے، و دا مسئلہ امریکہ ٹی بھاز مونی ہنانے، ہرادے تورنگ کن زوت سخت موکل ہرفوئی تمک۔
2021 ئنا نیام ئٹ امریکہ نا اسکول آتیٹ سم کاری نا 28 ویل رپورٹ مسونو، امریکہ نا میڈیا نا رد ئٹ اسکول آتیٹ سم کاری نا ویل آتیٹ 9 مرگ مسونو، اندن ٹپی تا کچ 46 ء۔
2021 ئٹ امریکہ نا 19 جتا ریاست آتیٹ سم کاری نا ویل آک مسر۔