حق ایتبو تحریک نا راہشون، جماعت اسلامی بلوچستان نا جنرل سیکرٹری مولانا ہدایت الرحمان بلوچ پارینے کہ گوادر مکران ڈویژن نا مخلوق ءِ حق ترفون الّمی، مچی الوک، کاروباری و مزور ہر تپہ تون اوار مریسہ بے دادی تا برخلاف توار ارفون۔
حق ایتبو تحریک نا کمک ئٹ بلوچستان نا دژمن تے بے سہب کریسہ غریب مخلوق ءِ سر سہب کرون۔ حکمران سی پیک نا برم ءِ اہل بلوچستان نا مخلوق ءِ ایتے، سی پیک سٹی گوادر نا مخلوق ءِ حق تننگ کتو گڑا دمادم مست قلندر مرو۔ و آئینی وڑ ئٹ مخلوق ءِ حق تننگ کن ہر تلہ آ توار بڑز کرون، مخلوق حق ایتبو تحریک و جماعت اسلامی نا جہد ئٹی اوار مرے۔
دا ہیت آتا درشانی ءِ او گوادر ساحل آ مزور مچی الوک تون اوڑدئی کننگ نا وخت آ کرے۔ دا وخت جماعت اسلامی نا صوبائی سیکرٹری اطلاعات عبدالولی خان شاکر ہم ساڑی اس۔ مولانا ہدایت الرحمان بلوچ پارے کہ حق ایتبو تحریک نا تولوک برانز جائز آئینی حق کن مرو و نن نہ سی پیک نا برخلاف ان، نن ہر بے دادی نا بر خلاف و غریب آتون اوار ان۔
اونا پین پاننگ اس ننا جہد مخلوق نا جائز حق تننگ اسکان برجاہ مرو، حق ایتبو تحریک ءِ تیوہ آ بلوچستان ئٹ فعال کرون، مخلوق تولوک برانز ٹی اوار جماعت اسلامی نا مرکز صوبہ آتا راہشون و کارکن تا منتوار ءِ ہرا ہر وخت آ نن تون تیوہ اوار مسونو حکومتی معاہدے آ عمل کننگ آن اہل مکران ءِ پین فائدہ و برم رسینگو، بلوچستان نا مخلوق ءِ صوبہ آتا وڑ حق تننگ کن حق ایتبو تحریک ءِ تیوہ آ صوبہ ٹی تالان کرون۔
اونا پین پاننگ اس سی پیک، ریکوڈک، سیندک تون اوار بلوچستان نا وسائل مخلوق آ خڑچ مننگ نا جاگہ آ منہ بندغ نا ذات آ خڑچ یا اوفتا اکاؤنٹس تیٹ ہننگ ءُ ہرانا کسر توننگ نن تیوہ آتا ذمہ واری ءِ۔ دا بے دادی، لٹ و پل نا بر خلاف نن تیوہ آ سیاسی کارکن آتے دعوت تینا کہ او نن تون اوار مریر۔