پاپوا نیو گنی ءِ 7.6 ترند زمین جمب چنڈا اِلا، ماڑی تے نسخان رسینگا، لینڈ سلائیڈنگ مس و کم آن کم 5 شاری بیران و کیہیک باز ٹپیمسر۔
پیشن ملکی خبر تروک ادارہ ‘اے ایف پی‘ نا رپورٹ نا رد ئٹ بنجاء نا خڑک ساڑی قطبی خلق آتا ہندی مخلوق سہب ئنا وخت آ زمینجمب نا ترند جھٹکہ آتا حوال تسنے، ہراڑان کسرک تل کرینو و ماڑی تا چت آک تمانو۔
ہندی باسک پارلیمنٹ کیسی ساوانگ نا پاننگ ءِ کہ مُر مُر ئنا مشی آ خلق آتیٹ کم آن کم 2 بندغ مرگ ئنا گواچی مسنو و کم آن کم 4 پین بندغ ءِ بیم تروک حالیت ئٹی جاز ئٹ اسپتال آ سر کننگانے۔
اونا پاننگ ئس کہ اوڑے بھلو کچ اسیٹ نسخان رسینگانے، لینڈ سلائیڈنگ نا سوب آن اُراک تمانو و اسہ خلق ئسے نا بندغ آک بے اُرامسنو۔
زمین جمب آن زیمی مروکا علاقہ آ تیٹ حال حوالی بست و بند محدود، حکومت نا کم وسائل و منَہ پکَو ءُ کسر ءُ، ہرا نا سوب آن علاقہ ٹینسخان تا کچ ءِ ہُننگ کن و کمک کن آپریشن ئٹ ہڑاند مننگ ءِ۔
چنکا ایوی ایشن کمپنیک و مشنری ٹولیک منَہ ڈغار آتے علاقہ آن ایئر لفٹ کریسہ ریسکیو کننگ نا کوشست کننگ ءُ۔
اسہ بندغ ئسے ریسکیو کریسہ دوارہ ہننگ نا کوشست کروکا منولوس ایوی ایشن نا باسک آک پاریر کہ دا علاقہ ٹی، دا مُد ئنا وخت آکمکی کارروائیک باز کبین ءُ، دا اسہ چیلنج ئسے۔
گوروکا نا قطبی خلق آتیٹ رہینگوک آک ہندی یونیورسٹی نا پنوکا دیوال تیان تموکا دریچہ آتا عکس ہلکنو۔
جیس ابین ریزورٹ نا باسک اس زمین جمب ئنا ترندی نا بابت ئٹ ہیت کریسہ پارے کہ زمین جمب نا ترندی باز زیات ئس، گبان آ ہر گڑاسمندر ئٹ تار کننگ ئس۔
زمین جمب نا جھٹکہ آک اونا بنجاء آن تقریباً 480 کلومیٹر مُر بنجائی شار پورٹ مورسبی اسکان محسوس کننگاسر۔
امریکی جیولوجیکل سروے زمین جمب آن گڈ دمدستی خڑک ئنا دریابی علاقہ آتیکن سونامی وارننگ شینک کریسس دوارہ وارننگ ءِ واپسہلیسہ پاریسس کہ داسا او علاقہ آتے سونامی نا خطرہ اف۔