بلوچ اسٹوڈنٹس آرگنائزیشن نا پارہ غان نشہ برخلاف اینو مستونگ ٹی اسہ برانز ئس ہڈ تننگا ہراٹی جتاء سیاسی جماعت آک، خوانندہ تنظیم آک اوار مسُر۔ برانز ساروان پریس کلب آن بناء مریسہ سلطان چوک آ ہڈ تننگا۔
برانز آن بلوچ اسٹوڈنٹس آرگنائزیشن نا بنجائی چیئرمین جہانگیر منظور بلوچ، سیکرٹری جنرل ماما عظیم بلوچ، ممبر سنٹرل کمیٹی صمدر بلوچ، مسکوئی جوائنٹ سیکریٹری شوکت بلوچ، بی این پی نا تحصیل صدر ظہور لہڑی، ضلعی صدر بی این پی حاجی نذر جان ابابکی، نیشنل پارٹی نا ضلعی صدر حاجی نذیر احمد سرپرہ، بی ایس او پجار نا زونل صدر نصیب، ترجمان گرینڈ الائنس مولوی ڈکریا، آغا دین محمد شاہ و ایلوفک ہیت کریر۔
برانز کروک آتا ئس کہ نشہ بہا کروک آتے مظلوم راج نا مڈی آ قوضہ گیری توننگ کن اسہ سلاء نا کاریم ئٹ ہتیرہ سامراجی قابض طاغت آک اسہ موثر منصوبہ بندی ئٹ مظلوم راج نا ڈیہہ آ دا ناسور نا روتہ آتے تُرند کریسہ تینا لُٹ و پُل و قوضہ گیری ءِ مدام بشخیسہ ءُ۔ اوفتا پاننگ ءِ کہ بلوچستان ہراڑے بندغ آک بنیاتی آسراتی زند آن محروم ءُ، سیکورٹی نا پِن آ ہر جاگہ خلقت نا بے شرفی کننگ ءُ ولے ارٹمی پارہ غان ہر علاقہ ٹی نشہ بہا کروک آتا اڈہ آک آبات ءُ۔ سینکڑوں سیکیورٹی چیک پوسٹ آتان گڈ ہم پاش نشہ بہا کروک آک ہتنگ ءُ۔
اوفتا ئس کہ بلوچستان آ ڈرگ ٹریفکنگ کسر نا ڈول آ کاریم کننگیرہ ہراڑے سرکاری سروکی ٹی دا کاروبار ءِ طاغت تننگ ءُ و داڑان سوات دوئی کریسہ نشہ بہا کروک آک اسمگلر آتے سیاست و اسمبلی تیٹ ہتنگیرہ۔
اوفکپاریر کہ بلوچ ورناتے چائسہ نشہ بہا کننگ ئٹ خسیسہ اوفتے راجی حق آتا بیگانہ کننگ نا کوشست کننگ ءُ۔ بی ایس او ہر دور ٹی نشہ بہا کننگ نا وڑ چاگڑدی ناسور نا برخلاف جہُد کرینے۔ مستونگ تون اوار تیوہ بلوچستان ٹی ڈرگ ری ہیبلٹیشن سینٹرز آتا ٹہیفنگ اسکان، نشہ بہا کروک آتا بر خلاف تیوہ بلوچستان ٹی سوگو سیاسی تحریک نا پڑو کرون۔ غُٹ ورنا و خوانندہ آتے اوار کریسہ دا ناسور نا برخلاف عملی جہُد کرون۔