بلوچستان نا دریابی شار گوادر ئٹ اینو دو شمبے نا دے خوانندہ غاک سڑک ءِ بند کریسہ جی ڈی اے اسکول گوادر وائس پرنسپل نا خوانندہ تون گمانی وڑ ئٹ تعصب تخوک رویہ و بست و بندی بے پامی نا برخلاف گوادر ڈولپمنٹ اتھارٹی آفس نا مونا تولوک برانز کریر۔
تولوک برانز نا باروٹ اسہ خوانندہ ئس دی بلوچستان پوسٹ تون ہیت کریسہ پارے کہ ہراتم وائس پرنسپل خوانندہ نا اُست ئٹ خار نا بِج ءِ ردیفے گڑا اونا اُست ئٹ ہم پرنسپل کن بیرہ خار ودی مرو۔
اوفک دوبہ خلکر کہ پرنسپل ہر وخت ننے خُلیفک کہ نما تعلقداری بلوچ آجوئی خواہوک سلاء بند تنظیم آتیان ءِ و نم دہشت گرد اُرے۔
اوفک پاریر کہ پرنسپل بلوچ آتا نفسیات آن واخب اف و ہڑدے خوانندہ تا بے شرفی ءِ کیک۔ نن دا وڑ نا رویہ تے اسُل سگنگ کپنہ۔ ننا خواست ءِ کہ دا پرنسپل ءِ کشینگ مرے و اسہ لائخ و ایمان دار ءُ پرنسپل ئسے تخنگ مرے تاکن چنا تا بروک آ وخت تارمئی آن رکھوک مرے۔