بلوچستان نا خوانندہ غاک تینا حق آتیان اسُل پدی مفرور- بلوچستان اسٹوڈنٹس بہاولپور

بلوچستان اسٹوڈنٹس کونسل بہاولپور نا ترجمان تینا شینک کروک بیان ئٹ پارے کہ نن تدوکا 15 دے آن جامعہ نا تہٹی برانز ئٹ تولوک اُن۔ جامعہ نا بست و بند ننا حق ئنا خواست آتے بِننگ نا جاگہ آ خوانندہ تے گیشتر ازیت نا گواچی کننگ ءِ و نن کہی وار درشان ءُ کلہو تسونن کہ دا وڑ نا چم تیان نن ہچبر تینا حق آتیان پدی مفرون۔

او تینا بیان ئٹ ودیک پارے کہ اینو 10 اکتوبر آ جامعہ نا بست و بند فیکلٹی ہراسمنٹ نا چرجوئی ءِ ودفیسہ بلوچستان نا خوانندہ تے فون کال کریسہ ڈپارٹمنٹ تیا خواہفنگا ہراڑے اوفتے پاریر کہ دا ایپلیکیشن آ نوشتہ کبو ایتبو کہ نم تولوک برانز ئٹ ہنوفیرے اگہ نم او برانز نا بشخ مسرے گڑا ڈپارٹمنٹ ئٹ نما داخلہ آ پابندی خلون۔ منہ خوانندہ ءِ دا ہم پاننگانے کہ نم نوشتہ کبو کہ جامعہ اسلامیہ ٹی بلوچستان کن ہچ وڑ نا خاص ءُ نشست اف۔

او پارے کہ نن خوانندہ تا وڑ جامعہ نا غُٹ استاد آتا عزت ءِ کینہ ولے ننے دا محسوس مریسہ کیک کہ جامعہ نا استاد آک تینا فرض و ذمہ واری تیان دو ارفینو ہرا افسوز نا ہیت ئسے۔

او ودیک پارے کہ نن سرپد مرینہ کہ اگہ استاد آک ننتون ہمدردی و ہمکوپئی کننگ کپسہ گڑا دا بیدس اخلاقی کاروائی تا بشخ جوڑ مفس۔

او بیان نا گڈ سر ئٹ پارے کہ جامعہ بست و بند خوانندہ تیان بیر ہلوک کارروائی تے زوت ایسر کے نہ گڑا برانز ءِ ترند کننگ نا نن طاغت ہم تخینہ۔