بلوچستان نا ضلع واشک ٹی سم کاری نا تدینی سیٹ اسہ بندغ ئس بیران اندن اِرا بندغ بھاز ٹپی مسنو۔
سم کاری نا تدینی واشک نا سب تحصیل شاہوگیڑی نا علاقہ خرماگئے ٹی مونا بسونے۔
حوال تا رد ئٹ تدینی ہموتم مونا بس ہراتم اسہ خاہوت نا ورناک اُرا نا تفنگ کن خشت ہتیسہ دڑفنگ بناء کریر تو کلی نا ہندی اسہ بندغ ئس اوفتیا سم کاری کرے۔
سم کاری نا سوب آن اسہ ورنا ئس جاگہ آ بیران اندن اِرٹ بھاز ٹپی مسر۔
ٹپی تے زو ئس ڈویژنل شیخ زاہد اسپتال خاران آ سر کننگا، ہراڑے ڈاکٹر آک ٹپی تے بنائی دارو درمان کریسہ کوئٹہ آ رادہ کریر اندن بیران مروک ورنا نا جون ءِ الّمی کارروائی آن گڈ خاہوت نا حوالہ کننگا۔