کریمہ بلوچ : راجی آجوئی نا راہشون
نوشت: کامریڈ وفا بلوچ
انسان نا سگ و ہمت ہمو وخت ترند مریک کہ ہرا وخت اودے شعور و نظریہ ئس پلویڑ کیک۔ شعور انسان اٹ اسے اندونو حالیت ئس ودیکیک ہراڑان انسان جہان نا ہچو خلیس، جوگہ و دمدری نا گواچی مفک تینا کسر اٹ خوشی و بشخندئی اٹ گام خلیک، ہرا سختیسوری تیتون مون ایتک۔ اندن مونی کائک کہ موت ءِ ہم گیرام کیک۔ جہان نا دیہاڑ اٹ باز پنک گروشک ایترہ، اسے زندہ او پن سیناخواجہ جوڑ مسونو دانا سوب اندا شعوری و نظریاتی جہد و قربانیک ءُ۔ کہی خواجہ غاک تینا جہد اٹ سرسہب مسور و تینا مزل آ سَرمسور و کہی خواجہ غاک تینا جہد اٹ سگ و حوصلہ اٹ گام خلیسہ مرگ ئنا گواچی مسور ولے اسے زندہ ءُ پِن ئس کٹار۔ تاریخ نا پنہغاتیا اینو ہم باز پنک گروشک ایترہ ہرا کے تینا راجی مسخت کن پند خلکور۔ اوفتا فکر و کڑدار بروکا چین نا کسر شونی ءِ کیرہ۔ ہموراج ہچبر بے نشان و گم گار مفک ہرانا باتیک تینا راجی شعور و راجی ذمہ واری تے پُورو کرسہ ہر سختی سوری، ڈکھ ویل آتے سگیسہمُستی پند خلیرہ۔
بلوچ راج ہم تینا راجی جہد ءِ مونی دریسہ ءِ۔ اندا جہد نا وسیلہ اٹ اینو زندہ سلوکے۔ خدا کپ اگہ ہرا وخت بلوچ راج تینا جہد ءِ نیامکسر ہلے و مزل آن مُست ایسر کرے تو ہمو وخت آن بلوچ راج نا گم گار مننگ برجا مریک۔ اینو ہزار آ ورناک زالبولاک، پیر مڑداک دا جہداٹ آجوئی نا مزل ءِ سر کننگ کن تینا ذگر انگا دتر تے شولیفیر ہرافتے تاریخ ساندہ زندہ ءُ پِن سیٹی یات کیک۔
بلوچ راجی جہد اٹ اسے بھلو کڑد ئسے نا گودی ئس پنی مس ہرا دے لمہ وطن نا پِن تننگا۔ آجوئی نا گودی بانک کریمہ بلوچ راجی جہد ءِاندنو ترندی ئس تس ہرانا سوب آن اینو اسکان جہد برجا ءِ و دا ایمان نا بشخ جوڑ مسونے کہ اندا راجی جہد گڈیکو مزل اسکان برجاسلیک۔ بانک نا زند تاریخ نا اسے اندنو باب ئس جوڑ مس ہراڑان بلوچ راج آن بیدس جہان نا ایلو غلام و بزگ آ راج آک ہم سبخ و ہمت وحوصلہ دوئی کیرہ۔
گودی کریمہ بلوچ اسے شیرزال بلوچ ئسے نا دروشم اٹ راجی جہد اٹ ساڑی مس۔ گودی تینا عملی کڑد نا کمک اٹ جہد ءِ مونی درے۔راجی شعور ءِ تالان کننگ کن بلوچستان نا باز خلق و شار، گلی کوچہ غاتیٹی سہب و شام، یخ و باسُنی ہر حالیت اٹ پند خلک، جہدکرے مونی ہنیسہ کرے۔ ہر ہنکین و گدان اٹ راجی جہد نا کوکار ءِ خلک و تینا راج ءِ بیدار کرے۔ بانک نا جہد و کڑد اینو بھلو ترندی ئسراجی جہد نا جنگی و سیاسی پڑ آ ایسونے۔ آجوئی نا کسر اٹ بانک نا جہد چراغ نا مثل اٹ ساندہ روشنائی کرسہ کیک۔
بلوچ راجی جہد ءِ بانک کریمہ بلوچ نا کڑد اسے بھلو ترندی ئس بشخا۔ بانک نا کڑد جہد اٹ سگ و ہمت نا چیدہ ئسے۔ بلوچ راج نا ہرچین کن ہمت و حوصلہ نا وسیلہ جوڑ مریک۔ راجی جہد اٹ ہر وڑ نا ڈکھ و ویل، سختی سوری تے بشخندئی و ہمت اٹ سگیسہ تینا زندنا گڈیکو ساہ اسکان پند خلک۔
زوراک ریاست تینا ہر وڑ و ڈول نا ظلم و زوراکی اٹ بانک ءِ راجی جہد نا کسر آن پَد بٹنگ نا کوشست ءِ کرے ولے بانک کریمہ بلوچ تینافکری و نظریاتی سوچ اٹ ہر وڑ نا ظلم و زوراکی تے سگیسہ ریاست ءِ دا باور کریفے کہ شعوری جہد ءِ ہچو طاغت ئس پد بٹنگ کپک۔تینا جہد آن شہید بانک کریمہ و ایلو ہزار بلوچ شہیداک راجی جہد ءِ اسے گواچنی ءُ دروشم ئس تسور۔
ریاست بانک ءِ کسر آن ہڑسنگ کن ہر وڑ نا ظلم و زوراکی، جوفہ و خلیس، دڑوکو تِس، بانک نا سیال آتے بیگواہ کرے، اراغا جلہو کرے،الہ نا جوْن ءِ تس، بانک نا ہمفسر تے بیگواہ کرے، کہی تا ٹپی آ جون تے خسا ولے بانک بلوچ راج نا لمہ جوڑ مس۔ ہر ڈکھ و ویل ءِ سگاولے تینا مزل آن اسے گام ئس ہم پدی متو۔ گڈیکو ساہ اسکان آجوئی نا کوکار ءِ بڑزا کرے۔ آجوئی نا کلہو ءِ ہر گدان آ سر کرے۔
دا چنکا نوشت اٹ گودی کریمہ بلوچ نا کڑد درشان ہچبر مننگ کپک۔ اونا زند نا سختی سوری، سوگوْ انگا فکر و جوزہ، تینا ذات ناقربانی، سیال و ہمراہ تا بیگوائی و شہادت، تینا وطن آن بدر مننگ نا ڈکھ، سخت انگا حالیت آتیٹی جہد ءِ برجا تخنگ دا سرحال آتیااگہ کتاب آک ہم نوشتہ مریر واہم ایسر مفرور۔ بلوچ سیاسی و ادبی ادارہ غاک بانک نا زند و فکر و جہد آ کتاب شینک کیر و بانک نا پناٹ ریسرچ ادارہ جوڑ کیر۔