سندھ بلوچستان نا سیم جیکب آباد نا ہند آ سندھ پولیس یوٹیلیٹی اسٹور آتا نُت آتیان لوڈ ٹرک آتے تورے۔
نصیرآباد و سبی ڈویژن ئٹ نُت ئنا نیستی ترندی ئٹ ودنگ ءِ، 40 کلو نُت ئنا تھیلہ 6600 روپئی آن زیات مس۔
یوٹیلیٹی اسٹور آتیٹ بننگ کن مزور آک کم پوریا ہلوک بندغ آتا قطار لگا، نُت رسینگ کتو تا۔
شابیتی حوال تا رد ئٹ بلوچستان نا علاقہ سبی ریجن نا یوٹیلیٹی اسٹور آتیکن بروکا یوٹیلیٹی اسٹور آتا نُت آتے سندھ پولیس بےچاننگوک سوب سندھ بلوچستان نا بھلا روڈ آ جیک آباد نا سیم آ تورے ہراڑان علاقہ ٹی نُت ئنا نیستی ودی مسنے۔ الس مزور طبقہ کمپوریا سرکاری ملازم آتا نُت ہلنگ کن قطار لگا ولے سندھ پولیس یوٹیلیٹی اسٹور آتا نُت آتے الیتو۔
اندن یوٹیلیٹی اسٹور سبی ریجن نا ریجنل منیجر ملک محمد اکبر شاہوانی حوال کننگا پارے کہ سندھ پولیس نا کنڈ آن یوٹیلیٹی اسٹورآتا نُت آتے توننگ آ نُت ئنا نیستی ودی مرو، یوٹیلیٹی اسٹور آتیا الس ئنا مُچی ودنگ ءِ، سندھ پولیس نا کنڈ آن بلوچستان نا یوٹیلیٹیاسٹور آتا نُت آتے توننگ آ صوبائی وزیر ریونیو سکندر خان عمرانی،صوبائی وزیر ایریگیشن حاجی محمد خان لہڑی سوختئی نادرشانی کریسہ وزیر اعلی سندھ سید مراد علی شاہ آن نوٹس ہلنگ نا خواست کریر۔