عبدالقدوس قمبرانی نا بیگواہی نا برخلاف لسبیلہ یونیورسٹی ٹی برانز 

لسبیلہ یونیورسٹی آف ایگریکلچر واٹر اینڈ میرین سائنس اوتھل (لوامز) نا خوانندہ آک زورٹ بیگواہ خوانندہ قدوس قمبرانی نا یلہ کننگکن یونیورسٹی آن اسہ دپ درشانی اس کشار و برانز ریکارڈ کننگا–

برانز ٹی بھلو کچ اسٹ خوانندہ آک اوار ئسر برانز کروک آک دا وخت پلے کارڈ ارفیسر ہرافتیا خوانندہ نا آجو کننگ و زوراکی ئٹبیگواہی تا لڑ ءِ ایسر کننگ نا نعرہ ہم نوشت کروک اس–

دا وخت آ برانز کروک آتا پاننگ اس کہ بلوچستان ٹی زوراکی ئٹ بیگواہی نا لڑ برجاہ ءِ و برمتہ کروک آک خوانندہ آتا زوراکی ئٹبیگواہی ٹی ترندی ایسنو۔ نن سرپد مرینا کہ دا وڑ ئنا ماحول ودی کننگ و بلوچ خوانندہ آتا برخلاف تعلیم دژمنی پالیسی نا راج ہڈ تننگناانصافی ئسے–

اوفتا پاننگ اس کہ برجاہ وڑ ئٹ خوانندہ آتے بیگواہ کننگ ء ریاست نا قانود آن چپ پالیسی ننے تعلیم نا جاگہ آ کسر تیا پیش تمینگ کنبیوس کرینے، ریاست نا پالیسی بلوچ خوانندہ آتے تعلیم آن مر تخینگءِ۔

او پاریر کہ ملک ئٹ دن انگا طاغت آک اقتدار ء ہرافتے بے دادی آن بیدس ہچ اس بفک داسا ہم وخت ارے کہ بلوچ آتا زیا بے دادی نا مشتے پرغینگ بس کیر، بیگواہ کروک خوانندہ آتون اوار ایلو تیوہ بیگواہ بندغ آتے دمدستی وڑ ئٹ آجو کبو یا عدالت آتیٹ مونا اتبو۔

یاتی مرے لسبیلہ یونیورسٹی آف ایگریکلچر واٹر اینڈ میرین سائنس اوتھل (لوامز) نا خوانندہ علم عبدالقدوس قمبرانی ءِ کوئٹہ سمنگلیروڈ آ ٹہیفوک اسہ ہوٹل ئسے آن 28 دسمبر 2022 نا شام نادرست سلاء بند بندغ آک زوراکی ئٹ گاڑی ٹی تولفیسہ تینتون اوار دریسرہراڑان گڈ او پاش کننگتو،بیگواہ خوانندہ نا خاہوت نا رد ئٹ اودے یک و نیم تو آن زیات وخت گدرینگانے ولے اونا بابت ئسے وڑ ئنا ہم حوالرسینگتنے۔

اندن گیشتر حوال تا رد ئٹ عبدالقدوس قمبرانی یونیورسٹی آن امتحان تریسہ چھٹی گدریفینگ کن کوئٹہ ٹی ساڑی تینا ارا غا ہناسس وہمو شام سنگت آتون اوار بازار آ ہناسس ہراڑے اودے زوراکی ئٹ بیگواہ کریر۔

خوانندہ آک بیگواہ خوانندہ نا دمدستی وڑ ئٹ آجو کننگ نا خواست کریسہ بلوچستان آن زوراکی ئٹ بیگواہی نا لڑ ءِ ہم ایسر کننگ ناخواست کرینو خوانندہ آتا پین پاننگ ءِ اگہ زوراکی ئٹ بیگواہ مروک خوانندہ پاش کننگتو گڑا سخت  برانزی کسر ارفون–